អង្គការ Save the Children រំពឹងថា កុមាររស់ក្នុងមណ្ឌលជាង១០០០នាក់នឹងធ្វើសមាហរណកម្មចូលក្នុងគ្រួសារ
អង្គការ Save the Children រំពឹងថា កុមារកំពុងរស់នៅក្នុងមណ្ឌលកុមារកំព្រាជាង១០០០នាក់នឹងធ្វើសមាហរណកម្មចូលក្នុងគ្រួសារវិញសម្រាប់រយៈពេលបីឆ្នាំពីឆ្នាំ២០១៩ដល់ឆ្នាំ២០២១។ ក្ដីរំពឹងនេះត្រូវបានលើកបង្ហាញនៅក្នុងការដាក់ឲ្យដំណើរការគម្រោងមួយឈ្មោះថា«ការឆ្លើយតបដោយប្រសិទ្ធភាពដើម្បីឱ្យប្រសើរឡើងនូវប្រព័ន្ធសុខុមាលភាពកុមារ»ហៅកាត់ថា REACTនៅថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ក្រសួងសង្គមកិច្ច អង្គការ Save the Children និងអង្គការពាក់ព័ន្ធឯទៀតបានជ្រើសយកខេត្តចំនួន៥រួមមានៈបាត់ដំបង សៀមរាប ព្រះសីហនុ កណ្ដាល និងភ្នំពេញ ក្នុងការដាក់ឲ្យដំណើរការគម្រោងឆ្លើយតបដោយប្រសិទ្ធិភាព ដើម្បីធ្វើឲ្យប្រសើរឡើងនូវប្រព័ន្ធសុខុមាលភាពកុមារហៅកាត់ថាREACTជាលើកដំបូង។ គម្រោងនេះមានរយៈពេលបីឆ្នាំពីឆ្នាំ២០១៩ដល់២០២១ក្រោមទំហំទឹកប្រាក់៣លានអឺរ៉ូផ្ដល់ដោយសហភាពអឺរ៉ុប ដើម្បីធ្វើយ៉ាងណាបង្ការកុមារកុំឲ្យបែកបាក់ពីគ្រួសារ។
តាមរយៈការដាក់ឲ្យដំណើការគម្រោងនេះ អង្គការ Save the Children រំពឹងថា កុមាររស់នៅក្នុងមណ្ឌលជាង១០០០នាក់ នឹងធ្វើសមាហរណកម្មចូលក្នុងគ្រួសារ ខណៈឱពុកម្ដាយ៨៥ភាគរយបានយកកូនទៅដាក់ក្នុងមណ្ឌលកុមារកំព្រា។ ជាក់ស្ដែងក្នុងឆ្នាំ២០១៨មណ្ឌលកុមារកំព្រាមានចំនួន២៥២មណ្ឌល និងមានកុមាររស់នៅចំនួនជាង៧ពាន់នាក់។ បើតាមអ្នកជំនាញមុនបញ្ជូនកុមារឲ្យទៅរស់នៅជួបគ្រួសារវិញ ត្រូវពិនិត្យលើលក្ខខណ្ឌស្ម័គ្រចិត្តពីកុមារ ស្ថានភាពនិងលទ្ធភាពរបស់ឱពុកម្ដាយ។ ប៉ុន្តែយ៉ាងណាមិញ បើទោះជាពួកគេត្រូវបានបញ្ជូនឲ្យទៅរស់នៅជាមួយគ្រួសារក៏ដោយ តែពួកគេនៅតែស្ថិតក្រោមការឃ្លាំមើលរបស់អង្គការ និងក្រសួងជាដើម។
រដ្ឋលេខាធិការក្រសួងសង្គមកិច្ច លោក នឹម ថូត លើកឡើងថា ជាធម្មតាកុមាររស់នៅក្នុងមណ្ឌលកុមារកំព្រា ការមើលថែមិនដូចកុមាររស់នៅជួបជុំជាមួយគ្រួសារឡើយ។ បើតាម លោក នឹម ថូត ស្ថានភាពកុមាររស់នៅក្នុងមណ្ឌលពួកគេប្រឈមនឹងខ្វះភាពកក់ក្ដៅមានភាពអៀនខ្មាស មិនហ៊ានចេញក្រៅចូលរួមជាមួយកុមារដែលមានការមើលថែត្រឹមត្រូវឡើយ។
អ្នកស្រី លន់ បរមី តំណាងអង្គការ Save the Children លើកបង្ហាញថា មណ្ឌលមិនមែនជាជម្រើសល្អសម្រាប់កុមារឡើយ ហើយភាគច្រើនកុមារដែលត្រូវបញ្ជូនឲ្យទៅរស់នៅក្នុងមណ្ឌលដោយសារតែការលែងលះ ឱពុកឬម្ដាយរៀបការគូរថ្មី កុមារដែលគេបោះបង់ចោលនិងកត្តាជីវភាពជាដើម។ ផ្អែកតាមការស្រាវជ្រាវជាអន្តរជាតិឲ្យដឹងថា ការថែទាំកុមារក្នុងមណ្ឌល អាចផ្ដល់ផលប៉ះពាល់រយៈពេលវែងទៅដល់ការអភិវឌ្ឍផ្នែករាងកាយ សង្គម អារម្មណ៍ និងសតិបញ្ញារបស់កុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ