លោក ស ខេង៖ ការគោរពច្បាប់ចរាចរណ៍ធ្លាក់ចុះ
ករណីគ្រោះថ្នាក់ចរាចរណ៍នៅក្នុងប្រទេសកម្ពុជាមិនមានការថយចុះនោះទេ នេះជាសញ្ញាមួយបង្ហាញថាការគោរពច្បាប់ក្នុងពេលធ្វើដំណើរហាក់បីដូចជាមានការធ្លាក់ចុះ។ នេះជាការលើកឡើង របស់លោករដ្ឋមន្ត្រីក្រសួងមហាផ្ទៃក្នុងទិវាសប្តាហ៍ជាតិសុវត្ថិភាពចរាចរណ៍លើកទី១២ នាព្រឹកថ្ងៃទី១១ ខែមិថុនា ពីស្រុកពញាក្រែក ខេត្តត្បូងឃ្មុំ។
ចុះផ្សាយនៅថ្ងៃ៖
បើតាមលោកឧបនាយករដ្ឋមន្ត្រី ក៏មានកត្តាផ្សេងទៀត ដែលបណ្តាលឲ្យមានការកើនឡើងចំនួនគ្រោះថ្នាក់ចរាចរណ៍ ដូចជាការកើនឡើងចំនួនយានយន្ត ដែលមានកំណើនប្រមាណ៣០ភាគរយនៅក្នុងឆ្នាំ២០១៨កន្លងទៅ ហើយពីដើមឆ្នាំ២០១៩ រហូតមកដល់ពេលនេះ ក៏បន្តកើនឡើងបន្ថែមទៀត។ តួលេខនេះមិនរាប់បញ្ចូលចំនួនម៉ូតូ និងទោចក្រយានផង។ នេះបើតាមលោក ស ខេង។
លោក គង់ រតនៈ ប្រធានស្តីទីវិទ្យាស្ថានសុវត្ថិភាពចរាចរណ៍ផ្លូវគោកបានចាត់ទុកការលើកឡើងរបស់លោកស ខេង នាពេលនេះថាជាការក្រើនរំលឹកមួយដល់សមត្ថកិច្ចឲ្យខិតខំបន្ថែមទៀត។ លោកបញ្ជាក់ថា តួលេខអ្នកស្លាប់ក្នុងករណីគ្រោះថ្នាក់ចរាចរណ៍នៅកម្ពុជាបច្ចុប្បន្នមានជាមធ្យមច្រើនជាង៥នាក់ក្នុងមួយថ្ងៃ ហើយអ្នករបួសធ្ងន់មាន១៣នាក់ និងរបួសស្រាលប្រមាណ២០នាក់។ លោកចាត់ទុកតួលេខខាងលើនេះថាជាចំណុច ដែលត្រូវប្រកាសអាសន្នលើបញ្ហាគ្រោះថ្នាក់ចរាចរណ៍នៅក្នុងប្រទេសកម្ពុជា។
ប្រធានស្តីទីវិទ្យាស្ថានសុវត្ថិភាពចរាចរណ៍ផ្លូវគោកបន្ថែមថាករណីគ្រោះថ្នាក់ចរាចរណ៍ គឺជាការខាតបង់មួយ ហើយបើគិតលើផ្នែកសេដ្ឋកិច្ចកម្ពុជាខាតបង់ប្រមាណ៣៥០លានដុល្លារក្នុងមួយឆ្នាំ នេះបើតាមតួលេខពីឆ្នាំ២០១៣មក។ លោកបញ្ជាក់ថាការចូលរួម ដើម្បីឆ្លើយតបនឹងករណីគ្រោះថ្នាក់ចរាចរណ៍នេះ គឺមិនមែនភាគីសមត្ថកិច្ចតែម្ខាងអាចធ្វើបានទេ តែទាមទារការចូលរួមពីអ្នកពាក់ព័ន្ធជាពិសេសអ្នកបើកបរត្រូវគោរពច្បាប់ដែរ ទើបអាចធ្វើទៅបាន៕
សូមជម្រាបជូនថាកាលពីថ្ងៃទី០៨ ខែមិថុនា កន្លងទៅនេះ មានករណីគ្រោះថ្នាក់ចរាចរណ៍មួយបានកើតឡើងលើកំណាត់ផ្លូវជាតិលេខ៤ បណ្តាលឲ្យមនុស្ស១០នាក់ ស្លាប់ និង៤នាក់ទៀតបានរងរបួស។ នេះគឺជាករណីគ្រោះថ្នាក់ចរាចរណ៍ ដែលមានមនុស្សស្លាប់ច្រើនបំផុតមូយនាដើមខែមិថុនានេះ។
យោងតាមរបាយការណ៍របស់ក្រសួងមហាផ្ទៃ នៅក្នុងរយៈពេលមួយត្រីមាសដើមឆ្នាំ២០១៩នេះ មានករណីគ្រោះថ្នាក់ចរាចរណ៍សរុប ១ ០៧៦លើក បានកើនឡើងចំនួន២៥៧លើក ឬ៣១ភាគរយប្រៀបធៀបនឹងរយៈពេលដូចគ្នាកាលពីឆ្នាំ២០១៨។ ចំណែកឯចំនួនអ្នកស្លាប់ដោយសារករណីគ្រោះថ្នាក់ចរាចរណ៍ខាងលើនេះមាន៥១៣នាក់ កើនឡើងចំនួន៣៣នាក់ ឬប្រមាណ៧ភាគរយ និងមានអ្នករបួសចំនួន ១ ៥៩២នាក់ កើនឡើងចំនួន៣៥៨នាក់ ឬ២៩ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ