លោក អេង ឆៃអ៊ាង ៖ លោក សម រង្ស៊ី ចូលស្រុកឬមិនចូលគឺមិនសំខាន់ទេ ប៉ុន្តែកុំឲ្យតែខាតប្រយោជន៍បក្ស!
«ការវិលត្រឡប់ ឬមិនចូលស្រុកវិញរបស់លោក សម រង្ស៊ី គឺមិនសំខាន់នោះទេ ប៉ុន្តែការសំខាន់ គឺកុំឲ្យតែខាតប្រយោជន៍បក្ស»។ នេះបើតាមការបញ្ជាក់របស់ លោក អេង ឆៃអ៊ាង នៅព្រឹកថ្ងៃសុក្រនេះ។ តាមការបញ្ជាក់របស់អនុប្រធានបក្សប្រឆាំងដដែលនេះ, ប្រសិនបើការធ្វើមាតុភូមិនិវត្តន៍របស់លោក សម រង្ស៊ី នាំឲ្យខាតបង់ប្រយោជន៍បក្ស និងប៉ះពាល់ដល់ការរៀបចំការបោះឆ្នោត គឺលោកមិនបាច់ចូលស្រុក ក៏បានដែរ។ ការចេញមុខប្រកាសរបស់មន្ត្រីជាន់ខ្ពស់បក្សសង្គ្រោះជាតិយ៉ាងដូច្នេះ គឺបន្ទាប់ពីមានការឆ្លើយឆ្លងឌឺដងគ្នាយ៉ាងរដឹករវាងលោក ហ៊ុន សែន និងលោក សម រង្ស៊ី ជុំវិញការហ៊ាន ឬមិនហ៊ានត្រឡប់ចូលស្រុកវិញរបស់អតីតប្រធានបក្សប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ចំពោះរឿងដែលថា លោក សម រង្ស៊ី ក្លាហាន ឬ កំសាក ក្នុងការចូលស្រុកខ្មែរវិញនោះ គឺមិនសំខាន់សម្រាប់គណបក្សសង្គ្រោះជាតិឡើយ។ នេះបើតាមការពន្យល់របស់លោក អេង ឆៃអ៊ាង។ ក៏ប៉ុន្តែ អនុប្រធានបក្សប្រឆាំងរូបនេះ សង្កត់ធ្ងន់ថា រឿងដែលសំខាន់ បើលោក សម រង្ស៊ី ចូលមកស្រុកខ្មែរ ហើយនាំឲ្យគណបក្សសង្គ្រោះជាតិទទួលជោគជ័យ ក្នុងការបោះឆ្នោតឆ្នាំ២០១៨ នោះលោក សម រង្ស៊ី ដាច់ខាតត្រូវតែចូលមកស្រុកវិញ បើទោះជា ត្រូវជាប់គុក ឬក៏ត្រូវស្លាប់បាត់បង់ជីវិតក៏ដោយ ក៏ត្រូវតែត្រឡប់ចូលស្រុកវិញដែរ។
ផ្ទុយពីនេះ ប្រសិនបើការធ្វើមាតុភូមិនិវត្តន៍របស់លោក សម រង្ស៊ី គឺនាំឲ្យក្លាយទៅជាមូលហេតុ ឬជាលេសលើកពេលបោះឆ្នោតជាតិនៅឆ្នាំក្រោយ ឬក៏ ជាលេសសម្រាប់រំលាយគណបក្សសង្គ្រោះជាតិ នោះ ដាច់ខាត លោក សម រង្ស៊ី មិនត្រូវចូលវិញឡើយ។
លោក អេង ឆៃអ៊ាង ពន្យល់បន្ថែមប្រាប់វិទ្យុបារាំងអន្តរជាតិ RFI ថា ពាក្យ កំសាក ឬក្លាហាន សម្រាប់បក្សសង្គ្រោះជាតិ គឺមិនសំខាន់ទេ។ ដ្បិតពាក្យទាំងពីរនេះ សម្រាប់និយាយបញ្ជោរ ឬផ្ចាញ់ផ្ចាល់មនុស្សសាមញ្ញតែប៉ុណ្ណោះ។ ប៉ុន្តែ សម្រាប់បក្សប្រឆាំង និងអ្នកនយោបាយរបស់បក្សនេះ គឺត្រូវតែដើរតាមយុទ្ធសាស្ត្រច្បាស់លាស់ និងមិនត្រូវដេកដួលតាមពាក្យសម្តីទាំងនោះទេ។
អ្នកនយោបាយចាស់វស្សា លោក សម រង្ស៊ី ដែលកំពុងនិរទេសខ្លួននៅបរទេស គឺគ្មានតំណែង គ្មានតួនាទីអ្វីក្នុងបក្សសង្គ្រោះជាតិនោះ ដ្បិតលោកបានលាលែងចេញពីតំណែងបក្សទៅហើយ។ ក៏ប៉ុន្តែសម្រាប់លោក អេង ឆៃអ៊ាង ដែលជិតដិតនឹងអតីតប្រធានរបស់ខ្លួន បានលើកឡើងថា លោក សម រង្ស៊ី ពិតជាគ្មានតំណែងអ្វី និងគ្មានតម្លៃអ្វី នៅលើក្រដាសផ្លូវការរបស់បក្សនោះទេ តែលោក សម រង្ស៊ី មានតម្លៃក្នុងបេះដូងអ្នកគាំទ្របក្សសង្គ្រោះជាតិទាំងអស់នៅទូទាំងប្រទេស។ នេះបើតាមលោក អេង ឆៃអ៊ាង។
គួររម្លឹកជូនថា អតីតប្រធានបក្សប្រឆាំង លោក សម រង្ស៊ី បានអះអាងប្រាប់សារព័ត៌មានវិទ្យុអន្តរជាតិ ផ្សាយជាភាសាខ្មែរ នាពេលថ្មីៗនេះ ថាលោកនឹងវិលត្រលប់ ចូលមកស្រុកខ្មែរវិញភ្លាម បើរដ្ឋាភិបាលកម្ពុជាដកបំរាមរារាំងមិនឲ្យយន្តហោះដឹកអ្នកដំណើរ ដឹករូបលោកមកកាន់កម្ពុជានោះ។ ភ្លាមៗ លោកនាយករដ្ឋមន្ត្រី ហ៊ុន សែន បានចេញបញ្ជាឲ្យដកបំរាមនេះ។ តែនៅទីបំផុត លោក សម រង្ស៊ី ប្តូរចិត្ត និងក្រឡាស់សម្តីថា លោកនឹងវិលត្រឡប់មកកម្ពុជាវិញភ្លាម នៅពេលអស់មានឧបសគ្គរាំងខ្ទប់ដល់សុវត្ថិភាព និងសេរីភាពរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ