លោក សម រង្ស៊ី ប្រកាសបង្កើតសមាគមថ្មីមួយនៅប្រទេសបារាំង
លោក សម រង្ស៊ី អតីតប្រធានបក្សសង្រ្គោះជាតិនៅថ្ងៃអង្គារនេះ បានប្រកាសបង្កើតអង្គការសង្គមស៊ីវិលមួយឈ្មោះថា “សមាគមដើម្បីលើកតម្កើងលទ្ធិប្រជាធិបតេយ្យនៅកម្ពុជា”។ តាមលោក សម រង្ស៊ី គោលបំណងនៃការបង្កើតសមាគមនេះ គឺដើម្បីសម្រេចឲ្យបាននូវឯកភាពជាតិ ដោយមានលទ្ធិប្រជាធិបតេយ្យជាមូលដ្ឋាន។ ជាការកត់សម្គាល់ ការប្រកាសបើកសមាគមលើកកម្ពស់លទ្ធិប្រជាធិបតេយ្យនេះ ធ្វើឡើងចំពេលដែលបក្សប្រឆាំងនៅកម្ពុជាកំពុងជួបបញ្ហា ដោយសារមេបក្សបច្ចុប្បន្នត្រូវបានឃុំខ្លួនក្រោមបទចោទក្បត់ជាតិ។
ចុះផ្សាយនៅថ្ងៃ៖
ស្តាប់ - ០២:២៣
តាមរយៈទំព័រហ្វេសប៊ុករបស់ខ្លួន លោក សម រង្ស៊ី បានបញ្ជាក់ថា លោកបង្កើតសមាគមនេះ គឺដោយសារតែលោកចង់ជួយ និងចង់បម្រើប្រទេសកម្ពុជា ដោយយកសេរីភាពនិងឯករាជ្យភាពដែលលោកមានមកប្រើប្រាស់ ដើម្បីបង្រួបបង្រួមជនជាតិខ្មែរទាំងអស់ ក្នុងគោលបំណងសម្រេចឯកភាពជាតិដោយមានលទ្ធិប្រជាធិបតេយ្យជាមូលដ្ឋាន។ បើតាមលោក សម រង្ស៊ី ឯកភាពជាតិ ជាកត្តាចាំបាច់ណាស់ដើម្បីដោះស្រាយវិបត្តិសព្វថ្ងៃ និងដើម្បីបញ្ចៀសប្រទេសកម្ពុជាពីមហន្តរាយផងដែរ។ លោកថា មានតែលទ្ធិប្រជាធិបតេយ្យទេ ដែលបើកផ្លូវឲ្យខ្មែរនិងខ្មែរគ្រប់និន្នាការនយោបាយ អាចនិយាយគ្នាបានដោយគោរពគ្នាទៅវិញទៅមក ហើយអាចធ្វើការជាមួយគ្នាបានក្នុងគោលបំណងការពារឧត្តមប្រយោជន៍ជាតិ និងនាំមកនូវវឌ្ឍនភាពក្នុងវិស័យសេដ្ឋកិច្ចនិងសង្គម។
“សមាគមដើម្បីលើកតម្កើងលទ្ធិប្រជាធិបតេយ្យនៅកម្ពុជា” របស់ លោក សម រង្ស៊ី នេះ នឹងត្រូវបង្កើតឡើង តាមច្បាប់ប្រទេសបារាំង ដោយមានទីស្នាក់ការនៅទីក្រុងប៉ារីស ប្រទេសបារាំងតែម្តង។ លោកសម រង្ស៊ី បានអំពាវនាវឲ្យជនជាតិខ្មែរគ្រប់រូប គ្រប់មជ្ឈដ្ឋាន គ្រប់និន្នាការនយោបាយ នៅលើទឹកដីប្រទេសកម្ពុជា ក៏ដូចជានៅក្រៅប្រទេស ចូលរួមក្នុងសមាគមនេះ។ តាមលោកសម រង្ស៊ី សមាគមនេះក៏នឹងបើកទ្វារឲ្យជនបរទេសដែលលោកសម រង្ស៊ី ហៅថាជា “មិត្តប្រទេសកម្ពុជា” អាចចូលធ្វើជាសមាជិកបានផងដែរ។
សូមរំឭកជូនថា លោកសម រង្ស៊ី ត្រូវបានតុលាការខ្មែរកាត់ទោសឲ្យក្លាយជាទណ្ឌិត នៅក្នុងសំណុំរឿងជាច្រើនស្ទើររាប់មិនអស់។ ព្រោះតែភាពជាទណ្ឌិតនេះហើយ ទើបលោកអតីតប្រមុខគណបក្សប្រឆាំងរូបនេះត្រូវបង្ខំចិត្តលាលែងពីតំណែងជាប្រធានគណបក្សសង្រ្គោះជាតិ ដើម្បីការពារអាយុជីវិតបក្ស ក្រោមអំណាចច្បាប់ស្តីគណបក្សនយោបាយដែលបានធ្វើវិសោធនកម្មដោយតំណាងរាស្រ្តគណបក្សកាន់អំណាច។ មិនតែប៉ុណ្ណោះ តំណាងរាស្រ្តបក្សកាន់អំណាចដដែលនេះ ក៏បានចូលរួមកែច្បាប់គណបក្សនយោបាយមួយលើកទៀត ដោយហាមមិនឲ្យបក្សនយោបាយជាប់ពាក់ព័ន្ធនឹងទណ្ឌិត។ និយាយឲ្យខ្លីស្រួលយល់ទៅ គឺកាត់ផ្តាច់លោក សម រង្ស៊ី ពីគណបក្សសង្រ្គោះជាតិតែម្តង។
សម្រាប់លោកសម រង្ស៊ី លោកបង្កើតសមាគមនេះឡើងដោយលោកឈប់ជាសមាជិកគណបក្សនយោបាយណាមួយ និងឈប់មានតួនាទី ឬមុខងារនយោបាយអ្វីទៀតឡើយ។ ដូច្នេះលោកមានសេរីភាពពេញលេញនៅពេលនេះក្នុងការបង្កើតសមាគមនៅក្រៅប្រទេសនេះ។ លោកក៏បានគូសបញ្ជាក់ដែរថា សមាគមថ្មីរបស់លោកមិនគាំទ្រគណបក្សនយោបាយណាមួយទេ ហើយក៏មិនប្រឆាំងគណបក្សនយោបាយណាមួយដែរ គឺគាំទ្រតែគោលការណ៍ប្រជាធិបតេយ្យ ដែលមានលក្ខណៈជាសកល និងលើកទឹកចិត្តចំពោះការផ្តួចផ្តើមគំនិតក៏ដូចជាសកម្មភាពរបស់គណបក្សនយោបាយនិងប្រជាពលរដ្ឋទាំងអស់ ដែលជួយពង្រឹងនិងលើកតម្កើងលទ្ធិប្រជាធិបតេយ្យនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ