កម្ពុជា-នយោបាយ

តុលាការប្រកាសផ្តន្ទាទោស លោក សម រង្ស៊ី និងមន្ត្រី៣នាក់ទៀត ឲ្យជាប់ពន្ធនាគារម្នាក់ៗជិត២ឆ្នាំ ក្នុងសំណុំរឿងបង្កអសន្តិសុខ

ជនជាប់ចោទ ៤នាក់ រួមមានលោក សម រង្ស៊ី លោក ហូ វ៉ាន់ លោក កាក់ កុម្ភារ និងលោក គង់ ម៉ាស់ ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសឲ្យជាប់ពន្ធនាគារ ក្នុងម្នាក់ៗ ជិត ២ឆ្នាំ ក្នុងសំណុំរឿងបង្កអសន្តិសុខដល់សង្គម។ ការផ្តន្ទាទោសនេះ បានធ្វើឡើង នៅរសៀលថ្ងៃទី ១៨ខែតុលានេះ បន្ទាប់ពីចៅក្រមសាលាដំបូងរាជធានីភ្នំពេញ បានបើកសវនការជាសាធារណៈ ដើម្បីជំនុំជម្រះលើសំណុំរឿងព្រហ្មទណ្ឌ លើជនជាប់ចោទទាំង ៤នាក់នៃអតីតគណបក្សសង្គ្រោះជាតិនេះ។

ចុះផ្សាយនៅថ្ងៃ៖ 18/10/2019 - 14:15

ដោយ៖ សួង សុខភារី

ផ្សាយពាណិជ្ជកម្ម

លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ និងមន្ត្រីជាន់ខ្ពស់អតីតបក្សប្រឆាំងផ្សេងទៀត រួមមាន លោក ហូ វ៉ាន់ និងលោក កាក់ កុម្ភារ ត្រូវបានសាលាដំបូងរាជធានីភ្នំពេញ ប្រកាសសាលក្រមផ្តន្ទាទោស នៅរសៀលថ្ងៃទី ១៨ខែតុលានេះ ឲ្យជាប់ពន្ធនាគារ ក្នុងម្នាក់ៗ ១ឆ្នាំ និង ៨ខែ ពីបទផ្តើមគំនិតប្រមាថ ញុះញង់ឲ្យប្រព្រឹត្តិបទឧក្រិដ្ឋជាអាទិ៍ បង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម តាមមាត្រា ២៨ មាត្រា ៤៩៥ និងមាត្រា ៥០២ នៃក្រមព្រហ្មទណ្ឌ។

ចំណែក លោក គង់ ម៉ាស់ សកម្មជនអតីតគណបក្សសង្គ្រោះជាតិ ក៏ត្រូវបានសាលាដំបូងរាជធានីភ្នំពេញ ផ្តន្ទាទោស ដាក់ពន្ធនាគារ ១ឆ្នាំ និង៦ខែ ពីបទប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍។ នេះបើតាមការបញ្ជាក់របស់ លោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញ នៅល្ងាចថ្ងៃទី ១៨តុលានេះ។

សាលក្រម ដែលប្រកាសនៅចំពោះមុខលោក គង់ ម៉ាស់ នេះ ក៏មានចេញដីកាបង្គាប់ឲ្យតាមចាប់ខ្លួនលោក សម រង្ស៊ី លោកហូ វ៉ាន់ និងលោក កាក់ កុម្ភារ មកអនុវត្តន៍ទោសទណ្ឌតាមអំណាចសាលក្រមផងដែរ។ គួរជម្រាបជូនថា លោក គង់ ម៉ាស់ គឺជាមនុស្សម្នាក់ ដែលសមត្ថកិច្ចបានចាប់ខ្លួន កាលពីថ្ងៃទី ១៦ខែមករា ឆ្នាំ ២០១៩ នៅស្រុករមាសហែក ខេត្តស្វាយរៀង ដោយចោទប្រកាន់ពីបទប្រមាថ និងបទញុះញង់ឲ្យបង្កចលាចល។

បើគិតមកដល់ពេលនេះ លោក សម រង្ស៊ី ត្រូវបានតុលាការជំនុំជម្រះក្តីរួច ចំនួន ៩បណ្តឹងហើយ ដែលត្រូវជាប់ពន្ធាគារសរុបចំនួន ១៥ឆ្នាំ ហើយត្រូវបង់ប្រាក់ទាំងអស់សរុប ១.០៥៨.២៥០ ដុល្លារ និង ១០០រៀល។ យ៉ាងណាក៏ដោយ មកដល់ពេលនេះ លោក សម រង្ស៊ី មិនទាន់បានអនុវត្តទោសក្នុងពន្ធនាគារនោះទេ ត្បិតលោក កំពុងស្ថិតនៅក្រៅប្រទេសឯណោះ។ ចំណែកប្រាក់ទាំងប៉ុន្មាន ដែលតុលាការ តម្រូវឲ្យលោកបង់ ក៏លោក មិនទាន់បានបង់ដែរ។ ប៉ុន្តែ កន្លងមក តុលាការ បានរឹបអូសយកទ្រព្យសម្បត្តិរបស់លោក ក្នុងប្រទេសកម្ពុជាជាបណ្តោះអាសន្ន គឺអតីតទីស្នាក់ការកណ្តាលគណបក្សសង្គ្រោះជាតិ៕