លោក សម រង្ស៊ី ចោទលោកម៉ៅ មុន្នីវណ្ណ ត្រង់ៗថា កំពុងប៉ុនប៉ងធ្វើបក្សប្រហារ
លោក សម រង្ស៊ី អតីតប្រធានគណបក្សសង្រ្គោះជាតិ បានចេញមុខមកចោទប្រកាន់ចំៗទៅលើលោក ម៉ៅ មុន្នីវណ្ណ ប្រធានស្តីទីគណៈកម្មាធិការប្រតិបត្តិគណបក្សសង្រ្គោះជាតិ ថាជាជនក្បត់បក្ស និងប៉ុនប៉ងធ្វើបក្សប្រហារ ដើម្បីក្តោបក្តាប់គណបក្សប្រឆាំង ខណៈដែលលោក កឹម សុខា កំពុងជាប់ពន្ធនាគារ។ ប៉ុន្តែលោក ម៉ៅ មុន្នីវណ្ណ បានច្រានចោលចំពោះការចោទប្រកាន់។
ចុះផ្សាយនៅថ្ងៃ៖
ស្តាប់ - ០២:០៦
តាមរយៈវីដេអូឃ្លីបថ្លែងចេញពីទីក្រុងរ៉ូម ប្រទេសអ៊ីតាលី កាលពីថ្ងៃទី ៣០ តុលា លោក សម រង្ស៊ី អតីតប្រធានគណបក្សសង្រ្គោះជាតិ បានចោទប្រកាន់ត្រង់ៗទៅលើលោក ម៉ៅ មុនីវណ្ណ មន្រ្តីជាន់ខ្ពស់គណបក្សសង្រ្គោះជាតិថា បានក្បត់បក្សដោយស្តាប់តាមការបង្គាប់បញ្ជារបស់លោកនាយករដ្ឋមន្រ្តី ហ៊ុន សែន ដើម្បីរៀបចំធ្វើបក្សប្រហារ។
តាមរយៈវីដេអូនេះ លោក សម រង្ស៊ី បានលើកឡើងថា បច្ចុប្បន្ននេះក្នុងគណបក្សសង្រ្គោះជាតិ មានអ្នកដែលចេញមុខធ្វើតាមការណែនាំរបស់លោកនាយករដ្ឋមន្ត្រី ហ៊ុន សែន នោះគឺលោក ម៉ៅ មុន្នីវណ្ណ។ លោក សម រង្ស៊ី បានអះអាងថា លោកមានភស្តុតាងដែលរកឃើញថា លោក ម៉ៅ មុន្នីវណ្ណ កំពុងដើរបញ្ចុះបញ្ចូលសមាជិកជាន់ខ្ពស់គណបក្សសង្រ្គោះជាតិឲ្យមកនៅខាងខ្លួន ដើម្បីក្តោបក្តាប់គណបក្សសង្រ្គោះជាតិទាំងមូល។ លោក សម រង្ស៊ី តាមរយៈវិដេអូកាលពីយប់ថ្ងៃទី៣០ ខែតុលា បានចាត់ទុកទង្វើនេះ ថាជាអំពើក្បត់ ដែលមិនអាចទទួលយកបានទេ។ ប៉ុន្តែលោក ម៉ៅ មុនីវណ្ណ បានបដិសេធ និងបានចាត់ទុកការលើកឡើងរបស់អតីតប្រធានគណបក្សសង្រ្គោះជាតិលោក សម រង្ស៊ី ថា គ្រាន់តែជាសិទ្ធិសេរីភាពរបស់គាត់ប៉ុណ្ណោះ។ លោក ម៉ៅ មុនីវណ្ណ ដែលបច្ចុប្បន្នគឺជាប្រធានស្តីទី គណៈកម្មាធិការប្រតិបត្តិគណបក្សសង្រ្គោះជាតិ បានលើកឡើងថា នឹងមិនមានបុគ្គលណាមួយ អាចធ្វើបក្សប្រហារលើគណបក្សសង្រ្គោះជាតិបាននោះទេ នោះបើយោងលើលក្ខន្តិកៈរបស់គណបក្សសង្រ្គោះជាតិ។
នៅក្នុងវីដេអូឃ្លីបប្រមាណជា៨នាទីនេះ លោក សម រង្ស៊ី ដែលថ្លែងក្នុងនាមជាអតីតប្រធានគណបក្ស និងក្នុងនាមជាអ្នកគាំទ្រគណបក្សប្រឆាំងដែលលោកបានរួមដៃបង្កើតឡើងនៅឆ្នាំ២០១២ជាមួយលោក កឹម សុខា នោះ បានលើកសរសើរពីស្មារតីតស៊ូរបស់លោក កឹម សុខា ប្រធានគណបក្សដែលកំពុងជាប់ពន្ធនាគារ និងបានអំពាវនាវដល់សមាជិកគណបក្សសង្រ្គោះជាតិដែលមានតួនាទីចាប់ពីសមាជិកក្រុមប្រឹក្សាខេត្ត ស្រុក ខណ្ឌ ឡើងទៅ ឲ្យចាកចេញពីប្រទេសកម្ពុជា ប្រសិនបើដឹងថា ជាមុខសញ្ញានៃការគំរាមកំហែង ឬទិញទឹកចិត្ត ពីភាគីណាមួយ។
សូមបញ្ជាក់ថា នេះគឺជាការចេញវីដេអូឃ្លីបលើកទី២ របស់លោក សម រង្ស៊ី គិតត្រឹមរយៈពេលមួយសប្តាហ៍ចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ