ក្រសួងពាណិជ្ជកម្មហៅការយកពន្ធអង្ករកម្ពុជាថាជាអាវុធធ្វើឃាតកសិករកម្ពុជា
ក្រសួងពាណិជ្ជកម្មកម្ពុជា កាលពីថ្ងៃម្សិលមិញ បានសម្តែងនូវការសោកស្តាយចំពោះសេចក្តីសម្រេច របស់សហភាពអឺរ៉ុប ដែលបានអនុវត្តនូវវិធានការការពារទីផ្សារមកលើអង្ករកម្ពុជា និងភូមា។ ប្រតិកម្មរបស់ក្រសួងពាណិជ្ជកម្មដូច្នេះ ធ្វើឡើងខណៈសហភាពអឺរ៉ុបតម្រូវឲ្យកម្ពុជាបង់ពន្ធអង្កររបស់ខ្លួននាំចូលអឺរ៉ុប(Indica Rice) ចាប់ពីពេលនេះទៅរហូតរយៈពេល៣ឆ្នាំខាងមុខ។
ចុះផ្សាយនៅថ្ងៃ៖
ស្តាប់ - ០២:៣១
ក្រៅពីការសោកស្តាយ ក្រសួងពាណិជ្ជកម្មកម្ពុជា បានហៅការសម្រេចរបស់សហភាពអឺរ៉ុប ដែលឈប់ផ្តល់ភាពអនុគ្រោះពន្ធនាំចូលអង្ករកម្ពុជាទៅកាន់អឺរ៉ុប ថាមិនបានឆ្លុះបញ្ចាំងទាំងស្រុងលើទិដ្ឋភាពច្បាប់ពាណិជ្ជកម្មអន្តរជាតិ បទដ្ឋានបច្ចេកទេស និងសច្ចភាព នៃទំនាក់ទំនងកន្លងមករវាងរដ្ឋាភិបាល និងវិស័យឯកជនកម្ពុជាជាមួយសហភាពអឺរ៉ុប។
សេចក្តីថ្លែងការណ៍របស់ក្រសួងពាណិជ្ជកម្មកម្ពុជា ក៏បានគូសបញ្ជាក់ដែរថា ការសម្រេចដាក់វិធានការការពារទីផ្សារដោយសហភាពអឺរ៉ុប មកលើអង្ករកម្ពុជា គឺមានឥទ្ធិពលគ្រប់គ្រាន់ សម្រាប់ដកហូតចំណូលរបស់ប្រជាកសិករក្រីក្រកម្ពុជា និងជាអាវុធសម្រាប់ធ្វើឃាតពួកគាត់ និងក្រុមគ្រួសារ ដែលកំពុងជាប់បំណុល ជាមួយនឹងស្ថាប័នឥណទាន ដែលបានផ្តល់ប្រាក់កម្ចី ដល់ពួកគាត់។
កាលពីថ្ងៃព្រហស្បតិ៍ម្សិលមិញ គណៈកម្មការអឺរ៉ុប បានចេញសេចក្តីសម្រេច តម្រូវឲ្យអង្ករនាំចូលពីកម្ពុជា និងភូមា ត្រូវបង់ពន្ធរយៈពេល៣ឆ្នាំ ក្នុងអត្រា១៧៥អឺរ៉ូ(ប្រហែល២០០ដុល្លារ) ក្នុង១តោន នៅឆ្នាំដំបូង និងត្រូវបង់១៥០អឺរ៉ូ និង១២៥អឺរ៉ូ នៅឆ្នាំទី២ និងទី៣។ តាមរយៈ សេចក្តីសម្រេច ដែលចាប់ផ្តើមអនុវត្តពីថ្ងៃទី១៨ ខែមករានេះ គណៈកម្មការអឺរ៉ុបបញ្ជាក់ថា ការនាំចូលអង្ករ (Indica Rice) ពីកម្ពុជា ក៏ដូចជាភូមា បានធ្វើឲ្យប៉ះពាល់ដល់សេដ្ឋកិច្ចនៃប្រទេសផលិតអង្កររបស់សហភាពអឺរ៉ុប។
ទោះយ៉ាងណា ក្រសួងពាណិជ្ជកម្ម បានអះអាងថា ក្រសួងមួយនេះ កំពុងពិនិត្យផ្ទៀងផ្ទាត់សេចក្តីសម្តេចនេះ ដោយផ្អែកលើទិដ្ឋភាពច្បាប់ និងវិធានពាណិជ្ជកម្មអន្តរជាតិ ដើម្បីបន្តធ្វើការតវ៉ាជាមួយនឹងសេចក្តីសម្រេច ដែលប្រជាជនកម្ពុជាយល់ថា ជាសេចក្តីសម្រេចដែលគ្មានសុក្រឹតភាព សច្ចភាពសង្គម និងសេដ្ឋកិច្ច។
សូមបញ្ជាក់ថាកាលពីឆ្នាំ២០១៨ កម្ពុជាបាននាំអង្ករសរុបទៅក្រៅប្រទេសចំនួនជាង៦០ម៉ឺនតោន ក្នុងនោះជាង៤០% ទៅកាន់ទីផ្សារអឺរ៉ុប។ ហេតុដូច្នេះហើយ ប្រតិបត្តិករនាំអង្ករចេញពីកម្ពុជាទៅកាន់អឺរ៉ុបនានា នៅតែចាត់ទុកថា សហភាព ដែលមានប្រជាជាតិ២៨ប្រទេសនេះ នៅតែជាទីផ្សារអង្ករដ៏សំខាន់របស់កម្ពុជា។ កាលពីថ្ងៃពុធនាយកគ្រប់គ្រងក្រុមហ៊ុន Amru Rice លោក សុង សារ៉ន ដែលធ្វើការនាំអង្ករចេញទៅអឺរ៉ុបដ៏ធំមួយរបស់កម្ពុជានោះ ថ្លែងថា កម្ពុជានៅតែមានឱកាសចរចា ក្នុងការរិះរកដំណោះស្រាយត្រលប់ចូលទៅទីផ្សារអឺរ៉ុបវិញក្នុងកំរិតណាមួយចៀសវាង ការបាត់បង់អ្នកបញ្ជាទិញ ដែលត្រូវរាំងស្ទះដោយរបាពន្ធខ្ពស់ហួសហេតុនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ