តំណាងគណបក្សនយោបាយនិងអ្នកឃ្លាំមើលថា ទឹកថ្នាំជ្រលក់ដៃអ្នកបោះឆ្នោត គ្មានការសង្ស័យទេ
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានធ្វើការពិសោធន៍លើ ទឹកថ្នាំពណ៌ខ្មៅលុបមិនជ្រះ ដល់តំណាងគណបក្សនយោបាយ និងភាគីពាក់ព័ន្ធ នៅព្រឹកថ្ងៃទី ១៧ កក្កដានេះ។ ជាលទ្ធផល គ្មានឡើយការតវ៉ា ឬការរកឃើញថា ទឹកថ្នាំនេះ លុបជ្រះ ឬប៉ះពាល់ដល់សុខភាពរបស់មនុស្ស។ ទឹកថ្នាំជ្រលក់ដៃអ្នកបោះឆ្នោតនេះ មានចំនួន៥ម៉ឺន១ពាន់ដប ដែល គ.ជ.ប បានបញ្ជាទិញពីក្រុមហ៊ុនរដ្ឋឥណ្ឌា។
ចុះផ្សាយនៅថ្ងៃ៖
ស្តាប់ - ០២:១១
ទំនងជាគ្មានការសង្ស័យទៀតឡើយ ចំពោះបញ្ហាទឹកខ្មៅជ្រលក់ដៃអ្នកបោះឆ្នោត ដែល គ.ជ.ប បានបញ្ជាទិញមកពីប្រទេសឥណ្ឌា។ គ្មានការសង្ស័យ ដ្បិតនៅក្នុងការធ្វើពិសោធន៍ កាលពីព្រឹកថ្ងៃទី ១៧ កក្កដា នេះ គ្មានឡើយការតវ៉ា ឬ ដាក់ការសង្ស័យទៅលើទឹកថ្នាំពណ៌ខ្មៅនេះថា លាងជ្រះឡើយ។
បើតាមនីតិវិធី ដើម្បីជម្រះមន្ទិលសង្ស័យនេះ ដំបូងឡើយ គ.ជ.ប បានដាក់ទឹកថ្នាំពណ៌ខ្មៅចំនួន៣០ប្រអប់ ដែលក្នុងមួយប្រអប់មានចំនួន១០ដប ឲ្យភាគីពាក់ព័ន្ធជ្រើសរើស មកធ្វើពិសោធន៍។ ក្នុងនោះ មានតំណាងគណបក្សនយោបាយចំនួន១២ រួមជាមួយតំណាងអង្គការសង្គមស៊ីវិល សមាជិក គជប បានជ្រលក់ម្រាមដៃម្នាក់ម្តង មុនពេលលាងជម្រះដោយទឹក៥ប្រភេទ។ ទី១.គឺទឹកធម្មតា ទី២.ទឹកលាងបង្គន់ ទី៣.ទឹកថ្នាំអ៊ុតសក់ ទី៤.សាប៊ូ និងទឹកអូសាវែលសម្រាប់លាងជម្រះសម្លៀកបំពាក់ជាដើម។
នៅទីបំផុត លោក ទេព នីថា អគ្គលេខាធិការ គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បានសរុបជារួមថា ទឹកខ្មៅជ្រលក់ដៃដែលបម្រើដល់ការបោះឆ្នោតជ្រើសតាំងតំណាងរាស្ត្រនីតិកាលទី០៦ឆ្នាំ២០១៨នេះ មានគុណភាពល្អ ដូចទឹកខ្មៅដែលបានប្រើសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីឆ្នាំ២០១៧នោះដែរ។
ទន្ទឹមគ្នានេះ លោក សំ គន្ធាមី នាយកអង្គការឃ្លាំមើលការបោះឆ្នោតនិចហ្វិច ដែលបានចូលរួមធ្វើពិសោធន៍នេះដោយផ្ទាល់ បានវាយតម្លៃថា ទឹកថ្នាំពណ៌ខ្មៅនេះ ពិតជាមានគុណភាពល្អ ដែលអាចជឿទុកចិត្តបាន។ ប៉ុន្តែលោកនៅស្ទាក់ស្ទើរបន្តិចត្រង់ថា ពណ៌នៃទឹកថ្នាំហាក់មិនសូវដិតខ្លាំង ដែលនេះ ទំនងជាមកពីបរិយាកាសនៅក្នុងបន្ទប់ត្រជាក់ ហើយឲ្យគុណភាពថ្នាំមិនទាន់បញ្ចេញប្រតិកម្មខ្លាំង។ ដោយឡែកតំណាងគណបក្សប្រជាធិបតេយ្យមូលដ្ឋាន (GDP) ក៏បានវាយតម្លៃដូចគ្នានេះដែរ។
ទឹកថ្នាំជ្រលក់ដៃពណ៌ខ្មៅ ត្រូវបាន គ.ជ.ប បញ្ជាទិញពីក្រុមហ៊ុនរដ្ឋឥណ្ឌា Mysore Paints and Varnish LTD ចំនួន ៥១០០ ប្រអប់ ស្មើនឹង ៥១០០០ដប ដោយចំណាយថវិកាជាង៨០ម៉ឺនដុល្លារសហរដ្ឋអាមេរិក សម្រាប់ប្រើប្រាស់ក្នុងការិយាល័យបោះឆ្នោតជាង២ម៉ឺនការិយាល័យនៅទូទាំងប្រទេស ដោយក្នុង១ការិយាល័យ តម្រូវឱ្យប្រើទឹកខ្មៅចំនួន២ដប។ បច្ចុប្បន្នទឹកថ្នាំទាំងនេះ ត្រូវបានដឹកជញ្ជូនទៅកាន់បណ្តាខេត្តមួយចំនួនរួចហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ