របាយការណ៍៖ ការកាប់ឈើខុសច្បាប់នៅព្រៃឡង់មានតិចជាងមុន តែមិនទាន់បញ្ឈប់ទាំងស្រុង
សកម្មភាពកាប់ឈើខុសច្បាប់នៅក្នុងព្រៃឡង់ មានចំនួនតិចជាងពេលមុនៗ។ នេះបើតាមរបាយការណ៍ថ្មីពីបណ្ដាញសហគមន៍ព្រៃឡង់ ដែលបានចេញផ្សាយកាលពីថ្ងៃទី២០ តុលា ថ្មីៗនេះ។ បើតាមរបាយការណ៍ដដែល បើទោះបីជាការកាប់ឈើខុសច្បាប់នៅព្រៃឡង់មានតិចជាងមុនក៏ពិតមែន ប៉ុន្តែសកម្មភាពកាប់ឈើនេះមិនទាន់បានបញ្ឈប់នៅឡើយទេ។
ចុះផ្សាយនៅថ្ងៃ៖
ស្តាប់ - ០២:២៧
របាយការណ៍លើកទី៦ ដែលជារបាយការណ៍ថ្មីបំផុតរបស់បណ្ដាញសហគមន៍ព្រៃឡង់ កត់ត្រាសកម្មភាពកាប់ឈើខុសច្បាប់ចាប់តាំងពីខែសីហាឆ្នាំ២០១៦ ដល់ខែកុម្ភៈឆ្នាំ២០១៧។ បើតាមរបាយការណ៍ សកម្មភាពកាប់ឈើខុសច្បាប់ក្នុងរយៈពេលនេះ ថយចុះ៦៥ភាគរយ បើធៀបនឹងរយៈពេលដូចគ្នាកាលពីឆ្នាំមុន។
បើតាមបណ្ដាញសហគមន៍ព្រៃឡង់ ការថយចុះនៃសកម្មភាពកាប់ឈើខុសច្បាប់នៅក្នុងអំឡុងពេលនេះ អាចបណ្ដាលមកពីការដាក់ព្រៃឡង់ចូលជាដែនជម្រកសត្វព្រៃ ប្រសិទ្ធភាពនៃវិធានការបង្ក្រាបការកាប់ព្រៃឈើខុសច្បាប់របស់រដ្ឋាភិបាល និងការផ្លាស់ប្ដូរឥរិយាបថរបស់ពួកអ្នកកាប់ព្រៃ ដែលបានស្គាល់ពីសកម្មភាពរបស់បណ្ដាញសហគមន៍ព្រៃឡង់ជាដើម។
បើទោះបីជាការកាប់ឈើថយចុះក៏ពិតមែន ប៉ុន្តែបណ្ដាញសហគមន៍ព្រៃឡង់ គូសបញ្ជាក់ថា សកម្មភាពកាប់បំផ្លាញព្រៃឈើខុសច្បាប់មិនទាន់បញ្ឈប់ទាំងស្រុងទេ ព្រោះក្នុងមួយខែៗ បណ្ដាញសហគមន៍ព្រៃឡង់បានកត់ត្រាសកម្មភាពកាប់ឈើខុសច្បាប់ជាមធ្យម៧២ករណី។ នៅក្នុងរបាយការណ៍របស់ខ្លួនចេញផ្សាយនាថ្ងៃទី២០តុលា បណ្ដាញសហគមន៍ព្រៃឡង់ បានសម្ដែងការព្រួយបារម្ភយ៉ាងខ្លាំង ចំពោះការកាប់ឈើខុសច្បាប់ ដែលនៅតែបន្តកើតមាននៅតំបន់ព្រៃឡង់។
ក្នុងន័យនេះ បណ្ដាញសហគមន៍ព្រៃឡង់ បានលើកទឹកចិត្តឲ្យក្រសួងបរិស្ថាន និងរដ្ឋាភិបាលកម្ពុជា ធានាថាការកាប់ឈើខុសច្បាប់នឹងមិនកើតឡើងបន្ថែទៀតនៅក្នុងដែនជម្រកសត្វព្រៃ ព្រៃឡង់។ បន្ថែមពីលើនេះ បណ្ដាញសហគមន៍ព្រៃឡង់សង្ឃឹមថា រដ្ឋាភិបាលនឹងបន្តពង្រឹងការអនុវត្តច្បាប់ បញ្ឈប់អំពើពុករលួយ បញ្ចប់ការនាំចូលរណារយន្ត និងបង្ក្រាបការកាប់ព្រៃឈើខុសច្បាប់យ៉ាងពិតប្រាកដ ដោយផ្ដន្ទាទោសដល់ក្រុមហ៊ុនធំៗដែលលាងសម្អាតឈើតាមរយៈកិច្ចសន្យាដីសម្បទានសេដ្ឋកិច្ចស្របច្បាប់ជាមួយរដ្ឋាភិបាលជាដើម។
ក្រៅពីនោះ បណ្ដាញសហគមន៍ព្រៃឡង់យល់ឃើញថា ការចូលរួមរបស់ប្រជាសហគមន៍មូលដ្ឋានក្នុងតំបន់ គឺជាគន្លឹះក្នុងការប្រយុទ្ធប្រឆាំងនឹងការកាប់ឈើខុសច្បាប់។ ដូច្នេះ បណ្ដាញការពារព្រៃឈើនេះ ចង់ឲ្យក្រសួងបរិស្ថាននិយាយដោយឡែក និងរដ្ឋាភិបាលនិយាយជារួម ទទួលស្គាល់នូវតួនាទីដ៏សំខាន់នៃការចូលរួមតាមប្រពៃណីនិងទំនៀមទម្លាប់របស់បណ្ដាញសហគមន៍ព្រៃឡង់ ក្នុងបុព្វហេតុការពារព្រៃឡង់ និងចាត់វិធានការត្រឹមត្រូវដើម្បីពង្រឹងការចូលរួមរបស់បណ្ដាញសហគមន៍ព្រៃឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ