អដ្ឋិធាតុមួយចំណែករបស់លោកវេជ្ជបណ្ឌិត Beat Richner យកមកដល់ខេត្តសៀមរាបហើយ
អដ្ឋិធាតុមួយចំណែករបស់លោកវេជ្ជបណ្ឌិត Beat Richner អតីតប្រធានមន្ទីរទេព្យគន្ធបុប្ផា ត្រូវបានដង្ហែមកដល់មន្ទីរពេព្យគន្ធបុប្ផាខេត្តសៀមរាបហើយនៅព្រឹកថ្ងៃពុធនេះ។ អដ្ឋិធាតុមួយចំណែកនេះ គឺយកមកពីប្រទេសស្វីសជាកន្លែងកំណើតរបស់វេជ្ជបណ្ឌិតរូបនេះ ក្រោយពីលោកទទួលមរណៈភាពកាលពី៤ខែមុន បន្ទាប់ពីលោកបានចំណាយពេលស្ទើរពេញមួយជីវិតដើម្បីព្យាបាលកុមារកម្ពុជាដោយមិនគិតថ្លៃ។
ចុះផ្សាយនៅថ្ងៃ៖
ការដង្ហែរអដ្ឋិធាតុរបស់លោកវេជ្ជបណ្ឌិត Beat Richnerធ្វើឡើងដោយមានការចូលរួមឈរហែហមតាមផ្លូវពីសំណាក់បុគ្គលិកមន្ទីរពេទ្យនេះ សិស្សសាលា និងប្រជាពលរដ្ឋនៅក្រុងសៀមរាបរាប់រយនាក់។
អដ្ឋិធាតុមួយចំណែករបស់លោកត្រូវបានដឹកនាំតាមយន្តហោះពីប្រទេសស្វីសមកដល់ព្រលានយន្តហោះអន្តរជាតិខេត្តសៀមរាបនៅព្រឹកថ្ងៃពុធ ដោយមានការទៅទទួលផ្ទាល់ដោយសម្តេចចៅហ្វីវាំង គង់ សំអុល តំណាងព្រះមហាក្សត្រកម្ពុជា ដង្ហែមកកាន់មន្ទីរពេទ្យគន្ធបុប្ផាខេត្តសៀមរាប។ ចំណែកអដ្ឋិធាតុនេះត្រូវរក្សាទុកធ្វើបុណ្យនៅក្នុងមន្ទីរពេទ្យនេះមួយយប់ដើម្បីធ្វើបុណ្យ ដោយមានព្រះសង្ឃ៧០០អង្គ មុននឹងយកទៅតម្កល់ទុកក្នុងចេតិយទើបសង់រួចថ្មីៗនៅចំពីមុខមន្ទីរពេទ្យគន្ធបុប្ផាខេត្តសៀមរាបតែម្តង។
នៅថ្ងៃទី៦ខែធ្នូស្អែកនេះ ក៏មានព្រះរាជវត្តមានព្រះហាក្សត្រកម្ពុជា យាងថ្វាយគ្រឿងសក្ការៈបូជានៅចេតិយតម្កល់អដ្ឋិធាតុរបស់ លោក ប៊ែអាត រិចន័រ ផងដែរ។ នេះបើតាមសេចក្តីជូនដំណឹងរបស់ព្រះបរមរាជវាំង។
សូមរំឭកថា លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផាបានទទួលមរណភាព ក្នុងវ័យ៧១ឆ្នាំ ដោយរោគាពាធ កាលពីថ្ងៃទី០៩ ខែកញ្ញាឆ្នាំ២០១៨ នៅឯប្រទេសស្វីស។ លោកវេជ្ជបណ្ឌិតជាជនជាតិស្វីសរូបនេះ បានចំណាយពេលស្ទើរពេញមួយជីវិតរបស់លោក ដើម្បីជួយសង្រ្គោះជីវិតកុមារកម្ពុជា តាមរយៈការបង្កើតមូលនិធិទ្រទ្រង់មន្ទីរពេទ្យគន្ធបុប្ផាជិត៣០ឆ្នាំមកនេះ។
ថវិកាទ្រទ្រង់មន្ទីរពេទ្យគន្ធបុប្ផា គឺបានមកពីសប្បុរសជន រដ្ឋាភិបាលស្វីស និងរដ្ឋាភិបាលកម្ពុជា។ មានកុមារចំនួនជាង ១៦លាននាក់ហើយ ត្រូវបានព្យាបាលដោយមន្ទីរពេទ្យគន្ធបុប្ផាក្នុងរយៈពេល២៦ឆ្នាំមកនេះ។
ក្រោយពីចំណាយពេលស្ទើរមួយជីវិតដើម្បីកុមារកម្ពុជា លោកវេជ្ជបណ្ឌិត Beat Richner បានប្រកាសលាលែងពីតំណែងជាប្រធានមន្ទីរពេទ្យនេះ នៅថ្ងៃទី ២៨មីនា ឆ្នាំ២០១៧ ដោយសារលោកធ្លាក់ខ្លួនឈឺធ្ងន់ និងត្រូវសម្រាកព្យាបាលនៅប្រទេសស្វីសជាទីកន្លែងកំណើត។ ក្រោយពីអវត្តមានរបស់លោកបណ្ឌិត Beat Richner រដ្ឋាភិបាលកម្ពុជាបានសម្រេចបង្កើតមួលនិធិគន្ធបុប្ផា ដើម្បីផ្គត់ផ្គង់ការចំណាយនៃមន្ទីរពេទ្យនេះដោយខ្លួនឯង តែនៅរក្សាមូលនិធិចាស់ឲ្យនៅដដែល ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ