កំណើនលក់ខុនដូនៅកម្ពុជាធ្លាក់ចុះ២% តែការផ្គត់ផ្គង់កើនឡើងជាង៥០%
របាយការណ៍ទីផ្សារខុនដូនៅក្នុងប្រទេសកម្ពុជាបានបង្ហាញថា នៅឆមាសទី១ ឆ្នាំ២០១៦នេះ ការផ្គត់ផ្គង់លក់ខុនដូមានចំនួន១ម៉ឺន៣ពាន់៧៣០យូនីត(Unit) គឺបានកើនឡើង៥២ភាគរយ បើប្រៀបធៀបនឹងរយៈពេលដូចគ្នាកាលឆ្នាំ២០១៥កន្លងទៅ។ ប៉ុន្តែសម្រាប់កំណើនការលក់វិញ បែរជាធ្លាក់ចុះតិចតួចគឺ២ភាគរយបើប្រៀបធៀបនឹងឆមាសទី១ ឆ្នាំមុន។
ចុះផ្សាយនៅថ្ងៃ៖
ស្តាប់ - ០២:២០
នៅក្នុងឆមាសទី១ ឆ្នាំ២០១៦នេះ ការលក់ខុនដូនៅក្នុងប្រទេសកម្ពុជាបានកើនឡើងប្រមាណ១៣ភាគរយ ប៉ុន្តែកំណើននេះ គឺមានការធ្លាក់ចុះប្រមាណ២ភាគរយបើប្រៀបធៀបនឹងរយៈពេលដូចគ្នាកាលពីឆ្នាំទៅដែលមានកំណើនដល់ទៅ១៥ភាគរយ។ បើទោះបីកំណើនលក់មានការធ្លាក់ចុះបន្តិចក្តី ប៉ុន្តែការផ្គត់ផ្គង់បែរជាមានការកើនឡើងជាង៥០ភាគរយឯណោះ។
លោកកុយ វ៉ាត ប្រធានក្រុមប្រឹក្សាភិបាល និងជាអគ្គនាយកក្រុមហ៊ុនCentury 21 Cambodia ដែលជាក្រុមហ៊ុនធ្វើរបាយការណ៍ស្តីពីទីផ្សារខុនដូនៅក្នុងប្រទេសកម្ពុជា បានលើកឡើងថា មូលហេតុដែលការផ្តត់ផ្គង់ខុនដូមានការកើនឡើងនេះ គឺដោយសារតែអ្នកវិនិយោគលើវិស័យអចលនវត្ថុមានទំនុកចិត្ត និងចាប់អារម្មណ៍វិនិយោគនៅក្នុងប្រទេសកម្ពុជា។
មកដល់ពេលនេះ គម្រោងអភិវឌ្ឍន៍ខុនដូទាំងសាងសង់រួច ទាំងកំពុងដំណើរការ និងមិនទាន់ចាប់ផ្តើមសាងសង់មានចំនួនសរុប ១១០គម្រោង ស្មើនឹង ១៤៨អាគារមាន៣ម៉ឺន៦ពាន់៧រយ៤២យូនីត។ ក្នុងនោះបើគិតមកត្រឹមឆមាសទី១ឆ្នាំ ២០១៦នេះ អាគារខុនដូចំនួន២៤ មាន៥ពាន់១៤យូនីត ត្រូវបានសាងសង់រួចរាល់។ បើគិតកំណើនជាមធ្យមក្នុងមួយឆ្នាំវិញ អត្រាសាងសង់ខុនដូរួចរាល់បានកើន៥៣ភាគរយក្នុងចន្លោះឆ្នាំ២០០៨ ដល់ឆមាសទី១ ឆ្នាំ២០១៦។
អាគារខុនដូត្រូវបានប្រមូលផ្តុំសាងសង់ឡើងក្នុងរាជធានីភ្នំពេញដោយភាគច្រើនត្រូវបានសាងសង់នៅក្នុងខណ្ឌចំការមន ដែលមាន៣៩ភាគរយ ខណ្ឌទួកគោកមាន១២ភាគរយ ខណ្ឌសែនសុខមាន១២ភាគរយ និងខណ្ឌជ្រោយចង្វារជាដើមមាន៩ភាគរយ។ បើតាមរបាយការណ៍ទីផ្សារខុនដូនៅក្នុងប្រទេសកម្ពុជា យូនីតនៅក្នុងខុនដូត្រូវបានចែកចេញជាបីប្រភេទ គឺប្រភេទបន្ទប់គេង១ មានតម្លៃចាប់ពី១ម៉ឺន៣ពាន់ដល់៣៣ម៉ឺនដុល្លារ។ ប្រភេទបន្ទប់គេងពីរ មានតម្លៃចាប់ពីជាង១ម៉ឺន៤ពាន់ដុល្លារ ដល់៦៩ម៉ឺនដុល្លារ។ ចំណែកប្រភេទបន្ទប់គេង៣ មានតម្លៃចាប់ពី២ម៉ឺន៩ពាន់ដុល្លារដល់១លាន២សែនដុល្លារ។ តម្លៃទាំងនេះ អាស្រ័យទៅលើទំហំរបស់យូនីត។
សូមបញ្ជាក់ថា នារយៈពេលប៉ុន្មានឆ្នាំចុងក្រោយនេះ ការសាងសង់ និងការលក់ខុនដូនៅក្នុងប្រទេសកម្ពុជាបានកើនឡើងគួរឲ្យកត់សម្គាល់។ ជាក់ស្តែងពីឆ្នាំ២០១៣ដល់ឆ្នាំ២០១៦នេះ ប្រតិបត្តិការលក់ខុនដូប្រចាំឆ្នាំបានកើនឡើង១០៤ភាគរយ ដែលចំនួននេះលើសកាលពីចន្លោះឆ្នាំ២០០៧ដល់ឆ្នាំ២០១២។ អតិថិជនដែលទិញខុនដូស្នាក់នៅក្នុងប្រទេសកម្ពុជា គឺ៧០ភាគរយជាជនបរទេស ចំណែកជនជាតិខ្មែរវិញមានត្រឹមតែចំនួន៣០ភាគរយតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ