អង្គការតម្លាភាពអន្តរជាតិ៖ អំពើពុករលួយរបស់កម្ពុជាឆ្នាំ២០១៨នៅលេខរៀងដដែល ខណៈពិន្ទុធ្លាក់ចុះ
អង្គការតម្លាភាពអន្តរជាតិ ដែលមានមូលដ្ឋាននៅទីក្រុងប៊ែឡាំង ប្រទេសអាឡឺម៉ង់ បានចេញផ្សាយរបាយការណ៍មួយនៅថ្ងៃទី ២៩ មករានេះ ស្តីពីសន្ទទស្សន៍នៃការយល់ឃើញពីអំពើពុករលួយនៃប្រទេសចំនួន១៨០នៅលើពិភពលោក ក្នុងនោះប្រទេសកម្ពុជាត្រូវបានវាយតម្លៃថា ស្ថិតនៅលេខរៀងទី ១៦១ ក្នុងចំណោមប្រទេស១៨០។ បើផ្អែកតាមចំណាត់ថ្នាក់នេះ កម្ពុជានៅរក្សាបានលេខរៀង ១៦១ ដដែល បើធៀបនឹងឆ្នាំ២០១៧។ ប៉ុន្តែអ្វីជាការកត់សំគាល់ កម្ពុជាបានរមៀលធ្លាក់ចុះ ១ ពិន្ទុ ពោលគឺពី២១ពិន្ទុនៅឆ្នាំ ២០១៧ មកនៅត្រឹម ២០ពិន្ទុនៅឆ្នាំ ២០១៨។ សម្រាប់ចំណាត់ថ្នាក់នេះ កម្ពុជានៅតែមានអំពើពុករលួយខ្ពស់ដដែល។
ចុះផ្សាយនៅថ្ងៃ៖
ស្តាប់ - ០២:៥០
យោងតាមរបាយការណ៍នេះ បើទោះបីកម្ពុជារក្សាបានលេខរៀង១៦១ ក្នុងចំណោមប្រទេស១៨០ ដូចឆ្នាំមុនក្តី ប៉ុន្តែ ២០ពិន្ទុនេះ មានន័យថា កម្ពុជានៅតែមានកំរិតអំពើពុករលួយខ្ពស់ និងនៅតែជាប់ចំណាត់ថ្នាក់ទាបបំផុតក្នុងចំណោមប្រទេសជាសមាជិកអាស៊ានទាំង១០ និងចំណាត់ថ្នាក់ទាបបំផុតទី៣ នៅក្នុងតំបន់អាស៊ីប៉ាស៊ីហ្វិក។ នេះបើយោងតាមរបាយការណ៍របស់អង្គការតម្លាភាពអន្តរជាតិ ដែលមានមូលដ្ឋាននៅទីក្រុងប៊ែឡាំង ប្រទេសអាឡឺម៉ង់ នៅថ្ងៃទី ២៩ មករានេះ។
បើតាមអង្គការតម្លាភាពអន្តរជាតិ កត្តាដែលទាញទម្លាក់ពិន្ទុកម្ពុជាឲ្យធ្លាក់ ១ពិន្ទុ ពោលគឺពី២១ពិន្ទុនៅឆ្នាំ ២០១៧ មកនៅត្រឹម ២០ពិន្ទុនៅឆ្នាំ ២០១៨ នេះ គឺបណ្តាលមកពីការធ្លាក់ចុះនៃ លទ្ធិប្រជាធិបតេយ្យនៅកម្ពុជាពី១៩ពិន្ទុនៅឆ្នាំ ២០១៧ មកនៅត្រឹម ១២ពិន្ទុនៅឆ្នាំ២០១៨។ នោះបើយោងតាមសូចនាករចំនួន៨ ដែលត្រូវបានយកមកធ្វើជាប្រភពក្នុងការវាយតម្លៃនៃអំពើពុករលួយនៅកម្ពុជា។ ក្នុងនោះ រួមមានប្រភពមកពី ទីភ្នាក់ងារប្រឹក្សាហានិភ័យនយោបាយ និងសេដ្ឋកិច្ចទ្វីបអាស៊ី (PERC) ការស្ទង់មតិពីធុរជននៃវេទិការសេដ្ឋកិច្ចពិភពលោក (WEF) ចំណាត់ថ្នាក់ហានិភ័យប្រចាំប្រទេសស្តីពីការយល់ដឹងជាសកល ឆ្នាំ ២០១៧-២០១៦ (GI) ចំណាត់ថ្នាក់ហានិភ័យប្រចាំប្រទេសរបស់ទីភ្នាក់ងារសេដ្ឋវិទូ ឆ្នាំ ២០១៨ និងឆ្នាំ២០១៧ (EIU) សន្ទស្សន៍ស្តីពី នីតិរដ្ឋរបស់គម្រោងយុត្តិធម៌ពិភពលោក (WJP) សន្ទស្សន៍នៃបម្រែបម្រួលរបស់មូលនិធិ Bertelsmann (BF) និងការវាយតម្លៃស្ថាប័ន និងគោលនយោបាយប្រចាំប្រទេសរបស់ធនាគារពិភពលោកឆ្នាំ ២០១៧ ជាដើម។
នាយកអង្គការតម្លាភាពកម្ពុជា លោក ព្រាប កុល បានកត់សំគាល់ថា រាល់ឆ្នាំដែលកម្ពុជាមានការរៀបចំការបោះឆ្នោត គឺតែងតែទាញទម្លាក់ពិន្ទុនៃអំពើពុករលួយរបស់កម្ពុជាឲ្យធ្លាក់ចុះ១ពិន្ទុ។ ជាក់ស្តែងកាលពីឆ្នាំ២០១៣ សន្ទស្សន៍នៃការយល់ឃើញពីអំពើពុករលួយរបស់កម្ពុជាបានធ្លាក់ចុះពី២២ពិន្ទុនៅឆ្នាំ ២០១២ មកនៅត្រឹម ២០ពិន្ទុនៅឆ្នាំ ២០១៣ ហើយបានធ្លាក់ចុះម្តងទៀត ពី២១ពិន្ទុក្នុងរយៈពេល៤ឆ្នាំជាប់គ្នាពីឆ្នាំ ២០១៤មកដល់ឆ្នាំ២០១៧នៅត្រឹម២០ពិន្ទុនៅឆ្នាំ ២០១៨នេះ។ ទោះជាចំណាត់ថ្នាក់នេះ មានន័យថា អំពើពុករលួយនៅក្នុងវិស័យសាធារណៈរបស់រដ្ឋនៅតែមានកម្រិតធ្ងន់ធ្ងរក្តី តែ លោក ព្រាប កុល បានលើកឡើងពីការកាត់បន្ថយអំពើពុករលួយនៅលើវិស័យមួយចំនួន ដូចជា ក្នុងវិស័យសេដ្ឋកិច្ច ពាណិជ្ជកម្ម វិស័យអប់រំ និងការផ្តល់សេវានៅតាមមូលដ្ឋាន ខណៈប្រព័ន្ធយុត្តិធម៌ និងតុលាការនៅតែមានកម្រិតអំពើពុករលួយខ្ពស់នៅឡើយនោះ។
សូមជំរាបជូនថា ផ្អែកតាមរបាយការណ៍នេះ ប្រទេស Denmark គឺជាប្រទេសដែលត្រូវបានវាយតម្លៃថា ជាប្រទេសស្អាតស្អំជាងគេក្នុងចំណោម១៨០ប្រទេស ខណៈដែលប្រទេសស៊ូម៉ាលី ស៊ីរី ស៊ូដង់ខាងត្បូង យ៉េម៉េន និងកូរ៉េខាងជើង ជាប្រទេសដែលស្ថិតនៅបាតតារាងដែលមានអំពើពុករលួយខ្លាំងក្លាជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ