ទណ្ឌិត៤៨នាក់ក្នុងចំណោម៤០០នាក់ត្រូវបានស្នើលើកលែងនិងបន្ថយទោស
ក្រសួងយុត្តិធម៌ នៅរសៀលថ្ងៃទី២៦ ខែតុលានេះ បានពិភាក្សាសំណើបន្ធូរបន្ថយ និងលើកលែងទោស ដល់ទណ្ឌិត សម្រាប់ឱកាសបុណ្យអុំទូក ដែលនឹងចូលមកដល់នៅចុងសប្តាហ៍ក្រោយនេះ។ បើតាមមន្រ្តីផ្លូវការ គឺមានទណ្ឌិតជាង៤០០នាក់ ត្រូវបានស្នើសុំការលើកលែងទោស ដោយប្រធានពន្ធនាគារខេត្តចំនួន១៩ និងមណ្ឌលអប់រំកែប្រែទាំង៤។ ប៉ុន្តែមានតែទណ្ឌិតជាង១០% ក្នុងចំណោមនោះ ឬស្មើនឹង៤៨នាក់ប៉ុណ្ណោះ ដែលត្រូវបានក្រសួងទទួលយក។ ចំនួនផ្សេងក្រៅពីនោះត្រូវទាត់ចោល។
ចុះផ្សាយនៅថ្ងៃ៖ កែប្រែថ្ងៃទី៖
លោក គឹម សន្តិភាព អ្នកនាំពាក្យក្រសួងយុត្តិធម៌ បានប្រាប់វិទ្យុបារាំងនៅម៉ោង៦ល្ងាចនេះថា ក្នុងចំណោមទណ្ឌិតទាំង៤២១នាក់នោះ គឺមានតែជាង ១០% ឬស្មើនឹង៤៨នាក់ប៉ុណ្ណោះ ដែលគណៈកម្មការបានឯកភាពតាមសំណើរបស់ប្រធានពន្ធនាគារនីមួយៗ ខណៈជិត ៩០% ទៀតត្រូវបានទាត់ចោល។ ទាត់ចោលដោយសារទណ្ឌិតទាំងនោះ គឺដោយសារតែទណ្ឌិតខ្លះប្រព្រឹត្តិបទល្មើសកាចសាហាវ និងខ្លះទៀតស្នើសុំខុសលក្ខខណ្ឌ។
សូមបញ្ជាក់ថា ទណ្ឌិតចំនួន៤២១នាក់ ក្នុងនោះស្រី៣៧នាក់ ត្រូវបានប្រធានពន្ធនាគារខេត្តចំនួន១៩ និងមណ្ឌលអប់រំកែប្រែទាំង៤ ស្នើមកក្រសួងយុត្តិធម៌ ដើម្បីពិនិត្យលក្ខខណ្ឌមុននឹងបញ្ជូនទៅនាយករដ្ឋមន្រ្តីដើម្បីថ្វាយព្រះមហាក្សត្រសុំលើកលែងទោស។ នេះបើតាមការឲ្យដឹងពីអ្នកនាំពាក្យក្រសួងយុត្តិធម៌។
យ៉ាងណាក៏ដោយ អ្នកនាំពាក្យរូបនេះក៏អះអាងថា លោកមិនដឹងថាមានសកម្មជនគណបក្សសង្រ្គោះជាតិ និងសកម្មជនដីធ្លីអ្នកស្រីទេព វន្នី ត្រូវបានដាក់បញ្ចូលក្នុងបញ្ជីសុំលើកលែងទោសឬយ៉ាងណានោះទេ។
ការស្នើសុំបន្ធូរបន្ថយ និងលើកលែងទោសសម្រាប់ទណ្ឌិត ត្រូវបានវាយតម្លៃដោយគណៈកម្មការពន្ធនាគារនៅតាមខេត្ត និងគណៈកម្មការថ្នាក់ជាតិ ហើយថ្វាយព្រះមហាក្សត្រ ដើម្បីសុំព្រះរាជទានបន្ធូរបន្ថយ និងលើកលែងទោស នៅក្នុងឱកាសបុណ្យជាតិធំៗ ដូចជា បុណ្យអុំទូក បុណ្យចូលឆ្នាំខ្មែរ និងពិធីបុណ្យវិសាខបូជាជាដើម។
បើតាមអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ អ្នកកំពុងជាប់ឃុំឃាំងនៅពន្ធនាគារទូទាំងប្រទេសមានជាង ២ម៉ឺន ៤ពាន់នាក់។
កាលពីឱកាសបុណ្យចូលឆ្នាំខ្មែរកន្លងទៅនេះ មានទណ្ឌិតចំនួន ៣១៤ នាក់ត្រូវបានស្នើសុំបន្ធូរបន្ថយទោស និងទណ្ឌិតចំនួន ៧៧នាក់ ត្រូវបានស្នើសុំលើកលែងទោស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ