កម្ពុជា-សារព័ត៌មាន

អង្គការការពារអ្នកកាសែតគ្មានព្រំដែនអះអាងថាសារព័ត៌មាន“ឯករាជ្យ”នៅកម្ពុជាកំពុងស្ថិតក្នុងភាពមហន្តរាយ

អង្គការការពារអ្នកកាសែតគ្មានព្រំដែន(Reporters Sans Frontières) របស់បារាំងកាលថ្ងៃទី១៣ កុម្ភៈបានចេញរបាយការណ៍មួយក្រោមចំណងជើងថា “ប្រទេសកម្ពុជា សារព័ត៌មានឯករាជ្យកំពុងស្ថិតនៅក្នុងភាពមហន្តរាយ”។ របាយការណ៍នេះ បានលើកឡើងពីប្រព័ន្ធផ្សព្វផ្សាយមួយចំនួនត្រូវរដ្ឋាភិបាលបិទ និងមួយចំនួនទៀតបិទទ្វារដោយខ្លួនឯង។ សកម្មភាពទាំងនេះ ត្រូវបានអង្គការការពារអ្នកកាសែតគ្មានព្រំដែនចង្អុលបង្ហាញថាជាការរៀបចំធ្វើឡើងដោយមនុស្សមួយក្រុមរបស់រដ្ឋាភិបាលកម្ពុជា។

ចុះផ្សាយនៅថ្ងៃ៖ 14/02/2018 - 11:48

រូបភាពចាស់៖ អ្នកសារព័ត៌មានខ្មែរ ក្នុងពេលបំពេញការងារ RFI/Channa Siv

ផ្សាយពាណិជ្ជកម្ម

គឺនៅក្នុងរបាយការណ៍កម្រាស់២៧ទំព័រ អង្គការការពារអ្នកកាសែតគ្មានព្រំដែនបានកត់សម្គាល់ថា គឺនៅក្នុងអំឡុងខែសីហានិងខែកញ្ញា កាលពីឆ្នាំ២០១៧កន្លងទៅ ជាពេលវេលាដែលប្រព័ន្ធផ្សព្វផ្សាយខ្លះបានបិទទ្វារដោយរដ្ឋាភិបាល និងខ្លះទៀតបិទទ្វារដោយខ្លួនឯង។ ក្នុងនោះរួមមានដូចជា កាសែតខេមបូឌា ដេលី វិទ្យុអាស៊ីសេរី សុទ្ធតែបានប្រកាសបិទទ្វារដោយខ្លួនឯង។ រីឯស្ថានីយ៍វិទ្យុក្នុងស្រុកមួយចំនួនត្រូវបានបញ្ជាឲ្យបិទ និងមួយចំនួនទៀត ត្រូវបានដាក់កម្រិតមិនឲ្យផ្សាយបន្តនូវកម្មវិធីព័ត៌មានរបស់វិទ្យុអាស៊ីសេរី វិទ្យុសំឡេងសហរដ្ឋអាមេរិក VOA និង វិទ្យុសំឡេងប្រជាធិបតេយ្យVOD។ អង្គការការពារអ្នកកាសែតគ្មានព្រំដែនបានកត់ត្រាថា គ្រាន់តែនៅក្នុងខែសីហា និងខែកញ្ញា ប្រព័ន្ធផ្សព្វផ្សាយសារព័ត៌មានប្រមាណ២៥ស្ថាប័នត្រូវបានបិទ ឬត្រូវផ្អាកសកម្មភាពផ្សាយតាមរលកធាតុអាកាស។

ចំពោះសកម្មភាពទាំងនេះ អង្គការការពារអ្នកកាសែតគ្មានព្រំដែនគូសបញ្ជាក់ថា វាកើតឡើងក្រោយការបោះឆ្នោតឃុំសង្កាត់ដែលអតីតគណបក្សសង្រ្គោះជាតិទទួលលទ្ធផលប្រកៀកប្រកិត នឹងគណបក្សប្រជាជនកម្ពុជារបស់លោកនាយករដ្ឋមន្រ្តីហ៊ុន សែន។ ដូច្នេះអង្គការការពារអ្នកកាសែតគ្មានព្រំដែនយល់ថា លទ្ធផលនេះ ជាការគំរាមកំហែងដល់អំណាចរបស់លោកហ៊ុន សែន។ អង្គការការពារអ្នកកាសែតរបស់បារាំងមួយនេះ អះអាងថា ដោយសារមើលឃើញពីបញ្ហាប្រឈមនេះ លោកហ៊ុន សែនត្រូវតែទប់ស្កាត់វាតាមរយៈចំណាត់ការតាមប្រព័ន្ធផ្សព្វផ្សាយ។

ចំពោះការលើកឡើងនៅក្នុងរបាយការណ៍នេះ លោកអ៊ុក គឹមសេង អ្នកនាំពាក្យក្រសួងព័ត៌មានកម្ពុជាបានច្រានចោល។ ច្រានចោល ក៏ដោយសារតែលោកមើលឃើញថា របាយការណ៍នេះ គ្មានអ្វីថ្មីនោះទេ គឺលើកឡើងតែបញ្ហាដដែលៗ ដើម្បីជាកេងចំណេញផ្នែកនយោបាយ។ តាមលោកអ៊ុក គឹមសេង អ្វីៗដែលបានកើតឡើង គឺរដ្ឋាភិបាលកម្ពុជាអនុវត្តទៅតាមច្បាប់របស់ខ្លួនតែប៉ុណ្ណោះ។ សម្រាប់អ្នកនាំពាក្យរូបនេះ ស្ថានភាពសារព័ត៌មាននៅកម្ពុជានៅតែមានភាពល្អប្រសើរបើទុកណាមានការបិទទ្វារប្រព័ន្ធផ្សព្វផ្សាយមួយចំនួនក៏ដោយ។

ផ្ទុយពីក្រសួងព័ត៌មានកម្ពុជា អង្គការការពារអ្នកកាសែតគ្មានព្រំដែនបានរកឃើញថា ក្រៅពីប្រព័ន្ធផ្សព្វផ្សាយ អ្នកសារព័ត៌មានក៏កំពុងរងការធ្វើទុក្ខបុកម្នេញផងដែរនៅក្នុងប្រទេសកម្ពុជា ក្នុងនោះអតីតអ្នកកាសែតខេមបូឌា ដេលីពីរម្នាក់ត្រូវតុលាការចោទប្រកាន់ ខណៈអតីតអ្នកកាសែតវិទ្យុអាស៊ីសេរីពីរនាក់ទៀតកំពុងត្រូវបានឃុំខ្លួននៅក្នុងពន្ធនាគារជាដើម។ ប្រឈមនឹងបញ្ហានេះ អង្គការការពារអ្នកកាសែតគ្មានព្រំដែនបានផ្តល់អនុសាសន៍ដល់រដ្ឋាភិបាលកម្ពុជាឲ្យដោះលែង និងទម្លាក់ចោលបទចោទប្រកាន់ទៅកាន់អ្នកកាសែតទាំងនេះ និងត្រូវអនុញ្ញាតប្រព័ន្ធផ្សព្វផ្សាយទាំងនោះបើកដំណើរការឡើងវិញ។ ក្រៅពីនេះ អង្គការ អ្នកកាសែតគ្មានព្រំដែនក៏បានអំពាវនាវឲ្យអង្គការសហប្រជាជាតិ សហភាពអឺរ៉ុប សហរដ្ឋអាមេរិក ប្រទេសជប៉ុន និងសមាគមអាស៊ានជាដើម ចាត់វិធាននានាមកលើរដ្ឋាភិបាលខ្មែរ ដើម្បីធានាដល់សេរីភាព សារព័ត៌មាននៅក្នុងប្រទេសកម្ពុជា