ក្រសួងពាណិជ្ជកម្ម៖ ការកំណត់តម្លៃសាំងធ្វើឡើង ដើម្បីជួយពលរដ្ឋ
ក្រសួងពាណិជ្ជកម្ម អះអាងតាមរយៈសន្និសីទកាសែតនាព្រឹកនេះថា ការកំណត់តម្លៃប្រេងសាំងធម្មតា និងប្រេងម៉ាស៊ូតធ្វើឡើង ដើម្បីជួយពលរដ្ឋ ដែលមានប្រាក់ចំណូលទាប ប៉ុន្តែបែរជាមានការយល់ច្រឡំ។ ការអះអាងនេះធ្វើឡើង បន្ទាប់ពីមានការរិះគន់តាមបណ្តាញសង្គមហ្វេសប៊ុក ថារដ្ឋមន្ត្រីក្រសួងពាណិជ្ជកម្ម បានបែងចែកកម្រិតជីវភាពពលរដ្ឋ តាមរយៈការកំណត់តម្លៃប្រេងសាំងស៊ុបពែរ និងសាំងធម្មតា។
ចុះផ្សាយនៅថ្ងៃ៖
ស្តាប់ - ០២:០៦
អ្នកនាំពាក្យក្រសួងពាណិជ្ជកម្ម លោក ស៊ាង ថៃ អះអាងថា ក្រសួងមានការសោកស្តាយចំពោះអ្នកដែលបង្ហោះព័ត៌មានទាំងនោះ នៅលើបណ្តាញសង្គម ដែលជាព័ត៌មានមិនពិត។ លោកបញ្ជាក់ថាការពិតចេតនារបស់ក្រសួងចង់ជួយប្រជាពលរដ្ឋ ដែលមានប្រាក់ចំណូលទាប ប៉ុន្តែបែរជាមានការយល់ច្រឡំ។
កាលពីថ្ងៃទី២៤ ខែមេសា កន្លងទៅ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានបញ្ជាក់យ៉ាងដូច្នេះថា “ដោយសារប្រជាជនប្រើយានយន្តតូច ដែលប្រើសាំងធម្មតាច្រើន ទើបយើងកំណត់តម្លៃសាំងធម្មតា និងម៉ាស៊ូតប៉ុន្តែសាំងស៊ុបពែរមិនបានកំណត់ទេ ព្រោះវាសម្រាប់ឡានទំនើបសម្រាប់អ្នកមាន អញ្ចឹងយើងទៅជួយអ្នកមានធ្វើអ្វី? យើងជួយអ្នកក្រ ដើម្បីលើកដម្កើងជីវភាព”។
ការកំណត់តម្លៃប្រេងឥន្ធនៈនៅក្នុងប្រទេសកម្ពុជាត្រូវបានធ្វើឡើងក្នុងរយៈពេល១០ថ្ងៃម្តង តាមរយៈរូបមន្តដែលកំណត់ដោយអន្តរក្រសួង និងអាស្រ័យលើតម្លៃមធ្យមភាគនៃប្រេងលក់ដុំនៅប្រទេសសិង្ហបុរី បូករួមទាំងអត្រាប្តូរប្រាក់នៅក្នុងប្រទេសកម្ពុជា។ នេះបើតាមសេចក្តីប្រកាសកាលពីខែកញ្ញា ឆ្នាំ២០១៧។ ប៉ុន្តែយ៉ាងណាក៏ដោយការកំណត់នេះ ធ្វើឡើងតែលើប្រេងសាំងធម្មតា ( Max.EA92) និងតម្លៃប្រេងម៉ាស៊ូតប៉ុណ្ណោះ ពោលគឺមិនមានការកំណត់លើប្រេងសាំងស៊ុបពែរនោះទេ។
អ្នកនាំពាក្យក្រសួងពាណិជ្ជកម្មលោក ស៊ាង ថៃ ថ្លែងបញ្ជាក់ពីមូលហេតុថា បច្ចុប្បន្ននេះ សាំងស៊ុបពែរមានតែប្រមាណ១៥ភាគរយប៉ុណ្ណោះ នៃប្រេងនាំចូលសរុបនៅកម្ពុជា ដូច្នេះទើបក្រសួងស្នើសុំឲ្យក្រុមហ៊ុនបញ្ចុះតម្លៃសាំងធម្មតា និងប្រេងម៉ាស៊ូត ដើម្បីទុកប្រេងស៊ុបពែរឲ្យក្រុមហ៊ុនឯកជនលក់ក្នុងតម្លៃសមរម្យណាមួយ ក្នុងការរកប្រាក់ចំណេញទប់ទល់នឹងការបញ្ចុះតម្លៃសាំងធម្មតា និងប្រេងម៉ាស៊ូត។
តម្លៃប្រេងនៅក្នុងប្រទេសកម្ពុជាមានការកើនឡើង ដោយសារតម្លៃប្រេងនៅក្នុងទីផ្សារអន្តរជាតិ។ នេះបើតាមលោក ស៊ាង ថៃ។ លោកបន្តថាក្រសួងតែងតែចង់ឲ្យតម្លៃប្រេងធ្លាក់ចុះ ប៉ុន្តែមិនអាចធ្វើទៅបានដោយសារតែប្រទេសកម្ពុជានាំចូលប្រេងពីខាងក្រៅទាំងស្រុង។
សូមជម្រាបជូនថា ប្រេងសាំងធម្មតាក្នុង១លីត្រមានតម្លៃ៤,១០០រៀល ហើយប្រេងម៉ាស៊ូត១លីត្រមានតម្លៃ៣,៩០០រៀល។ នេះបើតាមការកំណត់របស់ក្រសួងពាណិជ្ជកម្មកាលពីសប្តាហ៍មុន។ ចំណែកប្រេងសាំងស៊ុបពែរ ដែលមិនបានកំណត់ដោយក្រសួងនោះ បានឡើងច្រើនបំផុតត្រឹម៤,៤៥០រៀលក្នុង១លីត្រ នាសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ