អ្នកនាំពាក្យសោកស្តាយលើការលើកឡើងរបស់អង្គការឃ្លាំមើលសិទ្ធិមនុស្សជុំវិញរឿងសន្និសីទ «សារព័ត៌មានអាស៊ី»
ជុំវិញរឿងសន្និសីទសារព័ត៌មានអាស៊ីលើកទី១៦ ដែលកំពុងធ្វើឡើងនៅក្នុងខេត្តសៀមរាបនេះដែរ, អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានបង្ហាញការសោកស្តាយចំពោះការលើកឡើងរបស់ អង្គការឃ្លាំមើលសិទ្ធិមនុស្ស Human Rights Watch ស្តីពីការរៀបចំសន្និសីទ«សារព័ត៌មានអាស៊ី»។ អង្គការនេះបានចាត់ទុកសន្និសីទ«សារព័ត៌មានអាស៊ី»លើកទី១៦ ដែលកំពុងធ្វើឡើងនៅសៀមរាប ថាជារឿងមិនសមហេតុផល។
ចុះផ្សាយនៅថ្ងៃ៖
ស្តាប់ - ០២:២១
លោក ផៃ ស៊ីផាន បញ្ជាក់ថា លោកមានការសោកស្តាយ ដែលអង្គការសិទ្ធិមនុស្សមួយនេះ មានជំហរតែមួយគត់គឺអ្វីដែលគេគិតគឺត្រូវទាំងអស់។ ប៉ុន្តែជាក់ស្តែងអ្វី ដែលបានលើកឡើង មិនបានឆ្លើយតបនឹងស្ថានការណ៍នៅកម្ពុជាទេ។ លោកបន្ថែមថា ការចោទប្រកាន់រដ្ឋាភិបាលកម្ពុជាថាបានបិទសារព័ត៌មានសេរីគឺជាការប្រឌិតតែប៉ុណ្ណោះ។
កាលពីថ្ងៃទី០៩ ខែមិថុនា លោក ហ្វីល រ៉ូបឺតសុន នាយករងទទួលបន្ទុកកិច្ចការតំបន់អាស៊ីនៃអង្គការឃ្លាំមើលសិទ្ធិមនុស្ស បានលើកឡើង ថា“វាជារឿងមិនសមហេតុផលសោះ ដែលសន្និសីទដែលមានអង្គការសហប្រជាជាតិគាំទ្រ ត្រូវបានធ្វើឡើងនៅក្នុងប្រទេសកម្ពុជា ខណៈរដ្ឋាភិបាលកម្ពុជាបានបិទកាសែតឯករាជ្យ និងកម្មវិធីផ្សាយវិទ្យុ ហើយប្រព័ន្ធផ្សព្វផ្សាយភាគច្រើនក្នុងប្រទេសត្រូវបានគ្រប់គ្រង។” លោកបន្តថា អ្នកចូលរួមនៅក្នុងសន្និសីទ«សារព័ត៌មានអាស៊ី» គួរតែអំពាវនាវជាសាធារណៈឲ្យរដ្ឋាភិបាលកម្ពុជាបញ្ឈប់សកម្មភាពធ្វើទុក្ខបុកម្នេញលើអ្នកសារព័ត៌មាន និងអនុញ្ញាតឲ្យមានដំណើរការប្រព័ន្ធផ្សព្វផ្សាយឯករាជ្យឡើងវិញ។
សូមជម្រាបជូនថានៅថ្ងៃទី១២ ខែមិថុនា នេះលោកនាយករដ្ឋមន្ត្រីហ៊ុន សែន បានអញ្ជើញជាអធិបតី បើកជាផ្លូវការនូវសន្និសីទកំពូល «សារព័ត៌មានអាស៊ី» លើកទី១៦ ដែលប្រារព្ធធ្វើឡើងនៅសណ្ឋាគារសុខា ក្នុងខេត្តសៀមរាប។ សន្និសីទ«សារព័ត៌មានអាស៊ី» នាឆ្នាំនេះធ្វើឡើងក្រោមប្រធានបទ «ប្រព័ន្ធផ្សព្វផ្សាយឌីជីថល-អភិវឌ្ឍន៍ទីផ្សារ» និងមានអ្នកចូលរួមប្រមាណ៥០០នាក់ ពីប្រទេសជាង៤០ពីតំបន់ និងពិភពលោក។
កាលពីឆ្នាំ២០១៧ អាជ្ញាធរកម្ពុជាបានបញ្ជាឲ្យបិទហ្រ្វេកង់វិទ្យុប្រមាណ៣២ នៅស្ទើរទូទាំងប្រទេស ដែលវិទ្យុទាំងនោះភាគច្រើនបានផ្សាយការផ្សាយជាភាសាខ្មែររបស់វិទ្យុអាស៊ីសេរី(RFA) វិទ្យុសំឡេងសហរដ្ឋអាមេរិក(VOA) និងសំឡេងប្រជាធិបតេយ្យ(VOD)។ ដោយឡែកកាសែត The Cambodia Daily បានបិទដំណើរការរបស់ខ្លួន បន្ទាប់ពីរងការចោទប្រកាន់ពីរដ្ឋាភិបាលថាមិនបានបង់ពន្ធប្រមាណ៦.៣លានដុល្លារអាមេរិក។
ប៉ុន្តែលោក ផៃ ស៊ីផាន បានលើកឡើងថា រដ្ឋាភិបាលកម្ពុជាមិនបានបង្ខំឲ្យវិទ្យុបរទេសទាំងនោះបិទទេ ប៉ុន្តែដ្ឋាភិបាលសុំឲ្យមានការឆ្លើយតប និងអនុវត្តតាមច្បាប់របស់កម្ពុជា។ លោកបញ្ជាក់ថាការចោទប្រកាន់មកលើរដ្ឋាភិបាល គឺជាការប្រឌិត និងជាការលាបពណ៌តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ