ជំនួបលើកទី៣ជាមួយអ្នកកាសែត នាយករដ្ឋមន្ត្រីស្នើឲ្យផ្សាយព័ត៌មានវិជ្ជមានពិតប្រាកដដើម្បីទាក់ទាញទេសចរ និងវិនិយោគិន
លោកនាយករដ្ឋមន្ត្រី ហ៊ុន សែន នៅថ្ងៃសុក្រនេះ បានគ្រោងជួបជាមួយអ្នកសារព័ត៌មានក្នុងស្រុកមកពីស្ថាប័នជាតិ និងឯកជនប្រមាណជាង៤០០០នាក់ នៅមជ្ឈមណ្ឌលកំសាន្តកោះពេជ្រ។ គឺជាជំនួបសំណេះសំណាលប្រចាំឆ្នាំលើកទី៣ បន្ទាប់ពីជំនួបដំបូង ត្រូវបានរៀបចំឡើងកាលពីខែមករា ឆ្នាំ២០១៧ នៅសណ្ឋាគារសុខា។
ចុះផ្សាយនៅថ្ងៃ៖
ស្តាប់ - ០២:០៧
ដូចជំនួបកាលពី២លើកកន្លងមក នៅក្នុងជំនួបលើកទី៣ រវាងលោកនាយករដ្ឋមន្ត្រី ហ៊ុន សែន និងអ្នកសារព័ត៌មាន ដែលបំរើការនៅក្នុងប្រទេសកម្ពុជាពេលនេះ មានអ្នកកាសែតចូលរួម ប្រមាណជាង ៤៥០០នាក់ គឺកើនលើសពីជំនួបលើកទី១និងលើកទី២។
លោកនាយករដ្ឋមន្ត្រី ហ៊ុន សែន កាលពីថ្ងៃព្រហស្បតិ៍ម្សិលមិញ បានសរសេរនៅលើទំព័រហ្វេសប៊ុកផ្លូវការរបស់លោកថា ពិតប្រាកដណាស់ ការរីកចម្រើនរបស់ប្រទេសជាតិ គឺមិនអាចកាត់ផ្តាច់ពីការចូលរួមរបស់អ្នកសារព័ត៌មានបានឡើយ។
លោកបន្តថា យើងបានបាត់បង់ឱកាសកសាងប្រទេសជាច្រើនឆ្នាំមកហើយដោយសារសង្គ្រាម។ ក្រោយពីប្រទេសជាតិមានសុខសន្តិភាពពេញលេញ គឺយើងត្រូវការទេសចរ ពាណិជ្ជករ និងអ្នកវិនិយោគទុនបរទេសជាច្រើនមកវិនិយោគនៅកម្ពុជា។ ដូច្នេះការចូលរួមផ្សព្វផ្សាយព័ត៌មានវិជ្ជមានពិតប្រាក គឺកាន់តែផ្តល់នូវទំនុកចិត្តដល់ទេសចរបរទេស និងវិនិយោគគិនបរទេស។ នេះបើតាមសំណេររបស់ លោក ហ៊ុន សែន នៅលើទំព័រហ្វេសប៊ុក។
ទាក់ទងទៅនឹងជំនួបលើកទី៣ រវាងប្រមុខរដ្ឋាភិបាល និងអ្នកសារព័ត៌មាននេះដែរ អង្គការសមាគមសារព័ត៌មាននានា បានមើលឃើញថាជាជំនួបដែលមានសារៈសំខាន់ ដោយផ្តល់ឱកាសដល់អ្នកសារព័ត៌មានបង្កើតទំនាក់ទំនង និងភាពស្និទ្ធស្នាលជាមួយថ្នាក់ដឹកនាំប្រទេស។ ជាមួយគ្នានេះ ក៏មានការលើកឡើងផងដែរ ថាជំនួបនេះ គេគួរតែលើកយកបញ្ហារបស់សារព័ត៌មាន និងអ្នកសារព័ត៌មាន មកជជែកលើសពីការជួបដើម្បីទទួលទានអាហារ។
យោងតាមក្រសួងព័ត៌មាន អគ្គនាយកដ្ឋានព័ត៌មាន និងសោតទស្សន៍ ក្រសួងព័ត៌មានបានផ្តល់កាតសរុបកាលពីថ្ងៃម្សិលមិញ ចំនួន ៤ ៥៧៩នាក់ ដល់បណ្តាក្រសួង-ស្ថាប័ន និងប្រព័ន្ធផ្សព្វផ្សាយឯកជន ដើម្បីចូលរួមក្នុងជំនួបរវាងលោកនាយករដ្ឋមន្ត្រី ហ៊ុន សែន និង ក្រុមអ្នកសារព័ត៌មានក្នុងស្រុកលើកទី៣។
អ្នកចូលរួមក្នុងជំនួបលើកទី៣នេះ រួមមានថ្នាក់ដឹកនាំ និងមន្ត្រីក្រសួងព័ត៌មាន ស្ថានីយវិទ្យុ និងទូរទស្សន៍ សារព័ត៌មានបោះពុម្ពផ្សាយ ក្រុមការងារពត៌មាន Facebook គេហទំព័រ និង TV Online និង អ្នកនាំពាក្យក្រសួង-ស្ថាប័ន រាជធានី-ខេត្ត និងមន្ទីរព័ត៌មានរាជធានី-ខេត្ត ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ