លោក ហ៊ុន សែន៖ កូនប្រុសច្បងរបស់លោក អាចក្លាយជាមេដឹកនាំរបស់កម្ពុជានៅថ្ងៃអនាគត
លោកនាយករដ្ឋមន្ត្រី ហ៊ុន សែន បានអះអាងប្រាប់ទីភ្នាក់ងារសារព័ត៌មានជប៉ុន ក្យូដូ កាលពីថ្ងៃសៅរិ៍ថា លោក ហ៊ុន ម៉ាណែត កូនប្រុសច្បងរបស់លោក អាចក្លាយជាមេដឹកនាំរបស់ប្រទេសកម្ពុជានៅថ្ងៃអនាគត។ នេះគឺជាការទម្លាយជាសាធារណៈជាលើកដំបូង របស់លោកនាយករដ្ឋមន្ត្រី ហ៊ុន សែន ទាក់ទងនឹងអនាគតមេដឹកនាំកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
តាមរយៈទីភ្នាក់ងារព័ត៌មានជប៉ុន Kyodo លោកនាយករដ្ឋមន្ត្រី ហ៊ុន សែន បានអះអាងថា កូនប្រុសច្បងរបស់លោក គឺលោកឧត្ដមសេនីយ៍ឯក ហ៊ុន ម៉ាណែត អាចនឹងក្លាយជាមេដឹកនាំរបស់ប្រទេសកម្ពុជានៅថ្ងៃអនាគត។ ប៉ុន្តែលោកមិនប្រាកដថា នៅពេលណា នោះទេ។
នៅក្នុងអំឡុងពេលបំពេញទស្សនកិច្ចរយៈពេលប្រាំថ្ងៃនៅប្រទេសជប៉ុនដើម្បីចូលរួមកិច្ចប្រជុំកំពូល ជប៉ុន-មេគង្គ លើកទី១០ លោកនាយករដ្ឋមន្ត្រី ហ៊ុន សែន បានលើកឡើងថា លោកបានចាត់ទុក កូនប្រុសច្បងរបស់លោក គឺលោក ហ៊ុន ម៉ាណែត ថាអាចជាមេដឹកនាំមួយរូបទៅថ្ងៃអនាគត នៃប្រទេសក្នុងតំបន់អាស៊ីអាគ្នេយ៍មួយនេះ។ តែលោកបានទទួលស្គាល់ដែរថា« ទោះបីជាលោក ហ៊ុន ម៉ាណែត មានសមត្ថភាពដល់កម្រិតណាក៏ដោយ នៅពេលដែលពេលវេលាមកដល់ មានតែប្រជាជនកម្ពុជាប៉ុណ្ណោះ ដែលអាចសម្រេចថា តើអ្នកណានឹងក្លាយជាមេដឹកនាំថ្មីរបស់កម្ពុជា»។
នេះគឺជាការទម្លាយជាសាធារណៈជាលើកដំបូងរបស់លោកនាយករដ្ឋមន្ត្រី ហ៊ុន សែន ទាក់ទងនឹងអនាគតមេដឹកនាំកម្ពុជា នៅថ្ងៃអនាគត។ តែទោះបីជាលោក បានបង្ហើបបែបនេះក្តី លោកនាយករដ្ឋមន្ត្រីដែលកាន់អំណាច៣៣ឆ្នាំនៅកម្ពុជា បានប្រកាសម្តងហើយ ម្តងទៀតថា លោកនឹងកាន់តំណែងជានាយករដ្ឋមន្ត្រីកម្ពុជារយៈពេល១០ឆ្នាំទៀត។
គួរជំរាបជូនថា លោកឧត្ដមសេនីយ៍ឯក ហ៊ុន ម៉ាណែត ដែលបានបញ្ចប់ការសិក្សានៅសាលាបណ្ឌិត្យសភាយោធាសហរដ្ឋអាមេរិក West Points បានបង្ហាញនូវការប្រុងប្រយ័ត្ន ដោយមិនផ្ដល់ចម្លើយចំៗទេទាក់ទងនឹងសំណួរថា តើលោកចង់ ឬមិនចង់ ស្នងតំណែងជានាយករដ្ឋមន្ត្រីពីឪពុករបស់លោក នៅពេលផ្តល់បទសម្ភាសន៍ដល់ទូរទស្សន៍អូស្ត្រាលី ABC កាលពីឆ្នាំ២០១៥កន្លងទៅ។
កាលពីខែកញ្ញាកន្លងទៅ លោកឧត្ដមសេនីយ៍ឯក ហ៊ុន ម៉ាណែត ត្រូវបានព្រះមហាក្សត្រកម្ពុជា ត្រាស់បង្គាប់តែងតាំងជាមេបញ្ជាការកងទ័ពជើងគោក នៃកងយោធពលខេមរភូមិន្ទ ជំនួសនាយឧត្តមសេនីយ៍ មាស សុភា ដែលត្រូវទៅទទួលតំណែងជាទេសរដ្ឋមន្ត្រីនៅក្នុងគណៈរដ្ឋមន្ត្រីថ្មីរបស់លោក ហ៊ុន សែន នៅក្នុងអាណត្តិទី៦នេះ។
សូមបញ្ជាក់ជូនថា លោកនាយករដ្ឋមន្ត្រី ហ៊ុន សែន កំពុងដឹកនាំគណៈប្រតិភូកម្ពុជាមួយក្រុមដើម្បីចូលរួមកិច្ចប្រជុំកំពូល ជប៉ុន-មេគង្គ លើកទី១០ ចាប់ពីថ្ងៃទី ៦ ដល់ថ្ងៃទី ១០ ខែតុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ