រដ្ឋមន្ត្រីការបរទេសកម្ពុជាធ្វើទស្សនកិច្ចទៅកាន់ប្រទេសឡាវនៅថ្ងៃនេះ ក្រោយមានបញ្ហាព្រំដែន
រដ្ឋមន្ត្រីការបរទេសកម្ពុជា លោក ប្រាក់ សុខុន បានដឹកនាំគណៈប្រតិភូកម្ពុជា ធ្វើទស្សនកិច្ចនៅក្នុងប្រទេសឡាវនៅថ្ងៃនេះ ក្នុងគោលបំណងដើម្បីពង្រឹងនិងពង្រីក វិសាលភាពនិងជម្រៅនៃកិច្ចសហប្រតិបត្តិការទ្វេភាគី។ ដំណើរទស្សនកិច្ចនេះ ក៏ធ្វើឡើង ដើម្បីពិភាក្សាលើបញ្ហាព្រំដែនរវាងប្រទេសទាំងពីរ បន្ទាប់ពីមានការប្រឈមដាក់គ្នាកាលពីពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:៣៩
ដំណើរទស្សនកិច្ចរបស់រដ្ឋមន្ត្រីការបរទេសកម្ពុជាទៅកាន់ប្រទេសឡាវនៅពេលនេះ ធ្វើឡើងតបតាមការអញ្ជើញរបស់រដ្ឋមន្ត្រីការបរទេសឡាវ លោក សាលើមសៃ កុំម៉ាស៊ីត ចាប់ពីថ្ងៃទី ០៥ ដល់ថ្ងៃទី ០៦ខែកញ្ញា។ យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ដំណើរទស្សនកិច្ចនេះ គឺធ្វើឡើងក្នុងគោលបំណងដើម្បីពង្រឹងនិងពង្រីកវិសាលភាពនិងជម្រៅ នៃកិច្ចសហប្រតិបត្តិការទ្វេភាគី រួមទាំងបញ្ហាព្រំដែននៃប្រទេសទាំងពីរផងដែរ។ ក្រៅពីនេះ ដំណើរទស្សនកិច្ចនេះ ក៏នឹងពិភាក្សាគ្នាលើកិច្ចសហប្រតិបត្តិការនៅក្នុងវេទិកាតំបន់និងអន្តរជាតិនានា ដែលមានផលប្រយោជន៍រួមគ្នារវាងប្រទេសទាំងពីរ។ នេះបើតាមសេចក្តីប្រកាសព័ត៌មាន។
លោក កេត សោផាន់ អ្នកនាំពាក្យក្រសួងការបរទេសកម្ពុជា មិនអាចទាក់ទងដើម្បីផ្តល់ព័ត៌មានបន្ថែម ជុំវិញរបៀបវារៈនៃដំណើរទស្សនកិច្ចរបស់រដ្ឋមន្ត្រីការបរទេសកម្ពុជា លោក ប្រាក់ សុខុន ទៅកាន់ប្រទេសឡាវនេះបាននៅឡើយទេ។ ប៉ុន្តែយ៉ាងណាក៏ដោយ ដំណើរទស្សនកិច្ចនេះ ត្រូវបានគេមើលឃើញថា គឺបានធ្វើឡើង នៅប៉ុន្មានសប្តាហ៍ ក្រោយពីមានការប្រឈមមុខដាក់គ្នារវាងកងទ័ពឡាវនិងកម្ពុជា នៅចំណុចទន្លេពៅក្នុងតំបន់មុំ៣នៃខេត្តព្រះវិហារ ឈមនឹងខេត្តចំប៉ាសាក់ប្រទេសឡាវ កាលពីអំឡុងខែសីហាកន្លងទៅ។ ការប្រឈមមុខដាក់គ្នានោះ បានកើតឡើងក្រោយពីយោធាឡាវបានចូលមកដកដំណាំកសិករខ្មែរនៅក្នុងតំបន់ដែលគេអះអាងថា មិនទាន់បានបោះបង្គោលព្រំដែនដាច់ស្រេចនៅឡើយ។ យ៉ាងណាក៏ដោយ ភ្លាមៗនោះ ប្រមុខរដ្ឋាភិបាលកម្ពុជា លោក ហ៊ុន សែន បានចូលមកអន្តរាគមន៍និងបានអះអាងថា លោកបានហៅទូរស័ព្ទទៅកាន់នាយករដ្ឋមន្ត្រីឡាវ លោក ថងលូន ស៊ីស៊ូលីត (Thongloun Sisoulith) កាលពីព្រឹកថ្ងៃទី ២៤ ខែសីហា ដើម្បីដកទ័ពរៀងៗខ្លួនចេញពីតំបន់នោះ។ កាលណោះប្រមុខរដ្ឋាភិបាលកម្ពុជា បានគូសបញ្ជាក់ថា នៅតំបន់នោះមិនមានភាពតានតឹងនោះទេ ពោលគឺកងទ័ពកម្ពុជានិងឡាវ កំពុងនៅជាមួយគ្នា និងបរិភោគអាហារជាមួយគ្នាថែមទៀត។
ជាការកត់សម្គាល់ ដំណើរទស្សនកិច្ចរបស់រដ្ឋមន្ត្រីការបរទេសកម្ពុជាលោក ប្រាក់ សុខុន ទៅកាន់ប្រទេសឡាវនៅពេលនេះ ក៏បានធ្វើឡើង នៅមុនពេលដែលមានដំណើរទស្សនកិច្ចរបស់នាយករដ្ឋមន្ត្រីឡាវមកកម្ពុជា ដែលគ្រោងធ្វើនៅពាក់កណ្តាលខែកញ្ញានេះផងដែរ។ ជាដំណើរទស្សនកិច្ច ដែលនឹងផ្តោតសំខាន់លើការស្វែងរកដំណោះស្រាយលើបញ្ហាព្រំដែនរវាងប្រទេសជិតខាងទាំងពីរ។
សូមជម្រាបថា រហូតមកទល់ពេលនេះ បញ្ហាព្រំដែនកម្ពុជា-ឡាវ នៅមានប្រមាណ១៦ភាគរយទៀត ដែលមិនទាន់ដោះស្រាយរួចរាល់។ ក្នុងនោះ តំបន់អូរតាង៉ាវ ត្រូវបាន កម្ពុជានិងឡាវ ចាត់ទុកថាជាតំបន់ដែលមិនទាន់បានដោះស្រាយ ហើយបានព្រមព្រៀងគ្នាដាក់ជាតំបន់ស ដោយគ្មានវត្តមានកងទ័ព គ្មានប្រជាជនធ្វើអាជីវកម្ម ហើយប្រសិនបើមានតម្រូវការចុះត្រួតពិនិត្យ គឺទាំងឡាវ និងកម្ពុជា ត្រូវចុះទៅពិនិត្យរួមគ្នា ទាំងនៅលើគោក លើទឹក និងផ្លូវអាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ