សេចក្តីព្រាងច្បាប់ស្តីពីប្រេងកាតត្រូវបានអនុម័ត ខណៈកម្ពុជានឹងទទួលតំណក់ប្រេងកាតលើកដំបូងនៅឆ្នាំនេះ
គណៈរដ្ឋមន្រ្តីរបស់កម្ពុជានៅថ្ងៃសុក្រនេះ បានអនុម័តលើសេចក្តីព្រាងច្បាប់ស្តីពីប្រេងកាតរួចរាល់ហើយ ខណៈដែលប្រទេសកម្ពុជានឹងទទួលបានតំណក់ប្រេងកាតជាលើកដំបូងនៅក្នុងឆ្នាំ២០១៩នេះ។ បើតាមអ្នកនាំពាក្យរដ្ឋាភិបាល សេចក្តីព្រាងច្បាប់នេះត្រូវបាន កែប្រែពាក្យពេចន៍មួយចំនួនដើម្បីឱ្យស្របនឹងបរិបទនៃវិស័យប្រេងកាតនៅកម្ពុជានាពេលបច្ចុប្បន្ននេះ។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីព្រាងច្បាប់ស្តីពី «ការគ្រប់គ្រងប្រេងកាត និងផលិតផលប្រេងកាត»ត្រូវបានរៀបចំ និងតាក់តែងឡើងក្នុងគោលបំណងជំរុញការអភិវឌ្ឍន៍វិស័យប្រេងកាតប្រកបដោយនិរន្តភាព និងប្រសិទ្ធភាព។ នេះបើតាមការបញ្ជាក់របស់អ្នកនាំពាក្យរដ្ឋាភិបាលកម្ពុជា។
លោក ផៃ ស៊ីផាន បានឱ្យដឹងថា សេចក្តីព្រាងច្បាប់ដែលមាន៩ជំពូក និង៧២មាត្រានេះត្រូវបានកាត់តែងឡើងជាលើកដំបូងដោយ អតីតក្រសួងឧស្សាហកម្ម រ៉ែ និងថាមពល ដោយមានការជួយឧបត្ថម្ភពីអ្នកជំនាញការច្បាប់នៃធនាគារអភិវឌ្ឍន៍អាស៊ីតាំងពីឆ្នាំ១៩៩៦។ បន្ទាប់មកមានការជួយឧបត្ថម្ភពីអ្នកជំនាញការច្បាប់មកពីក្រុមហ៊ុនជប៉ុន Idemitsu Oil and Gas ដើម្បីពិនិត្យ និងកែសម្រួលបន្ថែមទៀត។
មកដល់ឆ្នាំ២០០៦ អតីតអាជ្ញាធរប្រេងកាតជាតិកម្ពុជាបានយកសេចក្តីព្រាងច្បាប់នេះមកកែសម្រួលឡើងវិញ ដោយមានការពិគ្រោះយោបល់ជាមួយអ្នកជំនាញបច្ចេកទេស និងអ្នកជំនាញផ្នែកច្បាប់ជាតិ និងអន្តរជាតិផងដែរ។
ការអនុម័តសេចក្តីព្រាងច្បាប់ស្តីពី«ការគ្រប់គ្រងប្រេងកាត និងផលិតផលប្រេងកាត»នេះបានធ្វើឡើង បន្ទាប់ពីរដ្ឋាភិបាលកម្ពុជា និងក្រុមហ៊ុន Kris Energy បានចុះកិច្ចព្រមព្រៀងមួយ កាលពីឆ្នាំ ២០១៧ សម្រាប់ការអភិវឌ្ឍន៍ អណ្តូងប្រេងកាតនៅក្នុងប្លុង A នៃដែនសមុទ្រកម្ពុជា។
ក្រុមហ៊ុន Kris Energy របស់សិង្ហបុរីនេះ គឺជាអ្នកទិញភាគហ៊ុនពីក្រុមហ៊ុនរបស់អាមេរិកឈ្មោះ Chevron។ ក្រុមហ៊ុន Kris Energy មានភាគហ៊ុន៩៥% នៅក្នុងតំបន់នោះ ត្រូវគេរំពឹងថា នឹង អាចផលិតប្រេងឆៅ ប្រមាណ ៧០០០បារ៉ែល ក្នុងមួយថ្ងៃ។ ដោយឡែកកម្ពុជា ជាដៃគូ នៃភាគហ៊ុនសេសសល់ រំពឹងថា នឹងចំណេញ ប្រាក់ប្រមាណ ៧៨០លានដុល្លារ ក្នុងអំឡុងពេល ៩ឆ្នាំ។ នេះបានតាមការផ្សាយរបស់កាសែតបាងកកប៉ុស្ដិ៍។
កាលពីក្រុមហ៊ុនChevronរបស់អាមេរិក កាន់កាប់អាជ្ញាប័ណ្ណរុករកប្រេង គេបានរកឃើញប្រេង និងឧស្ម័នហ្គាសនៅតាមបណ្តោយឈូងសមុទ្រកម្ពុជា និងឈូងសមុទ្រថៃ ដោយនៅក្នុងប្លុក A មាន៤អណ្តូង។ ប្លុក A ដែលស្ថិតនៅចម្ងាយ ១៦០ គីឡូម៉ែត្រពី កំពង់ផែភាគខេត្តព្រះសីហនុ លើទំហំ ៣០៨៣គីឡូម៉ែត្រការេ ក្នុងជម្រៅប្រមាណ ៥០ ទៅ៨០ម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ