សមត្ថកិច្ចបានរឹបអូសឯកសារ និងសម្ភារៈមួយចំនួនពីស្នាក់ការគណបក្សអំណាចខ្មែរ បន្ទាប់ពីឆែកឆេរ
សមត្ថកិច្ចចំរុះរដ្ឋាភិបាល នៅថ្ងៃទី១៥ សីហា នេះបានឆែកឆេរស្នាក់ការគណបក្សអំណាចខ្មែរស្ថិតក្នុងខ័ណ្ឌទួលគោក បន្ទាប់ពីបានឆែកឆែរផ្ទះរបស់ប្រធានគណបក្សនេះកាលពីថ្ងៃអាទិត្យកន្លងទៅ ជាថ្ងៃដែលលោក សួន សេរីរដ្ឋា ត្រូវបានចាប់ខ្លួន។ ការឆែកឆេរនេះ ដើម្បីស្វែងរកភស្ដុតាងថ្មីៗបន្ថែមទៀត បញ្ជាក់អំពីទំនាក់ទំនងរបស់ប្រធានគណបក្សនេះ ជាមួយចលនារណសិរ្សរំដោះជាតិខ្មែរ របស់ លោក សម សេរី ដែលកំពុងធ្វើសកម្មភាពនៅក្រៅប្រទេសប្រឆាំងរដ្ឋាភិបាលកម្ពុជាបច្ចុប្បន្ន។
ចុះផ្សាយនៅថ្ងៃ៖
ស្តាប់
អត្ថបទដោយ៖ យ៉ា រសាត់
ចាប់តាំងពីម៉ោងប្រមាណ៩ ព្រឹកមក កម្លាំងប៉ូលីសជាង៥០រូបមកពីក្រសួងមហាផ្ទៃ សហការជាមួយសមត្ថកិច្ចមូលដ្ឋាន បានបិទផ្លូវមុខស្នាក់ការគណបក្សអំណាចខ្មែរមិនឲ្យឆ្លងកាត់ឡើយ។ ក្នុងដីកាបង្គាប់ដែល ព្រះរាជអាជ្ញាអមសាលាដំបូងរាជធានីភ្នំពេញលោក សៀង សុខ បានអាននៅមុខការិយាល័យគណបក្សមុនផ្ដើមឆែកឆេរនោះ បង្ហាញថា ទីស្នាក់ការគណបក្សអំណាចខ្មែរអាចមានរក្សាតម្រុយ និងភស្ដុតាងផ្សេងៗ របស់លោក សួន សេរីរដ្ឋា។ បើតាមព្រះរាជអាជ្ញាដដែល ភស្ដុតាងក្នុងស្នាក់ការនេះអាចបញ្ជាក់ពីទំនាក់ទំនងរវាងលោក សួន សេរីរដ្ឋា ជាមួយចលនារណសិរ្សរំដោះជាតិខ្មែរ ដែលកំពុងធ្វើសកម្មភាពក្រៅប្រទេសប្រឆាំងនិងរដ្ឋាភិបាលកម្ពុជាបច្ចុប្បន្ន។ ក្រោយពីបញ្ចប់ការឆែកឆេរនៅម៉ោងជាង១ រសៀល សមត្ថកិច្ចមិនបានបញ្ជាក់ពីលទ្ធផលយ៉ាងណានោះទេ ដោយសមត្ថកិច្ចបានដកហូតឯកសារ កំព្យូទ័រ និងសំភារៈមួយចំនួននៅក្នុងស្នាក់ការគណបក្សនោះដាក់ចូលទៅក្នុងរថយន្ដ។
ទាក់ទងនឹងការឆែកឆេរនេះ ប្រធានស្ដីទីគណបក្សអំណាចខ្មែរ លោក សួង សុភ័ណ្ឌ បានចាត់ទុកថា រដ្ឋាភិបាលកំពុងមានចេតនាផ្សេងទៅលើគណបក្សអំណាចខ្មែរ។ ប្រធានស្ដីទីរូបនេះបានប្រាប់វិទ្យុបារាំងអន្ដរជាតិនៅក្បែរទីស្នាក់គណបក្សលោកដែលគេកំពុងតែឆែកឆេរកាលពីព្រឹកមិញនោះ ថាអ្វីដែលលោក សួន សេរីរដ្ឋា បានលើកឡើងទាក់ទងនឹងកងទ័ព ជារឿងរិះគន់ក្នុងន័យស្ថាបនា មិនមែនជារឿងញុះញង់ ឬប្រមាថកងទ័ពនោះទេ។ ហើយលោកថា រឿងនេះទៀតសោត វាជាការបញ្ចេញមតិផ្ទាល់ខ្លួនរបស់លោក សួន សេរីរដ្ឋា ប៉ុណ្នោះ មិនពាក់ព័ន្ធនិងគណបក្សអំណាចខ្មែរឡើយ។
បើតាមប្រធានស្ដីទីរូបនេះ រដ្ឋាភិបាលគួរទម្លាក់បទចោទលើលោក សួន សេរីរដ្ឋា ដោយបង្វែឲ្យទៅសុំទោសកងទ័ពវិញ។ លោកថា កន្លងមកមានមន្ដ្រីរដ្ឋាភិបាល លោក ទៀ បាញ់ ធ្លាប់ប្រើពាក្យ “វាយបាក់ធ្មេញ” និង លោក វង សូត ធ្លាប់ប្រើពាក្យ “វាយក្បាលនឹងគល់ឬស្សី” ទៅលើអ្នកតវ៉ាលទ្ធផលបោះឆ្នោត ប៉ុន្ដែលោកថា អ្នកនិយាយទាំងនោះមិនបានទទួលទោសអ្វីទេ។
គួររម្លឹកថា កាលពីថ្ងៃទី១២ ខែសីហា ប្រធានគណបក្សអំណាចខ្មែរ លោកសួន សេរីរដ្ឋា បានសរសេរសារនៅក្នុងទំព័រហ្វេសប៊ុករបស់ខ្លួនថា “ពេលសង្គ្រាមកើតឡើងជាមួយនឹងប្រទេសឡាវនោះ លទ្ធផលវាហ្នឹងមិនខុសពីសង្គ្រាម ដែលកើតឡើងជាមួយនឹងប្រទេសសៀមទេ។ លោកថា គឺ កូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា... ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីញីយ៉ាងគគ្រឹកគគ្រេង”។
មួយថ្ងៃបន្ទាប់ លោក សួន សេរីរដ្ឋា ត្រូវបានសមត្ថកិច្ចចាប់ខ្លួនបញ្ជូនទៅស្នងការដ្ឋាននគរបាលរាជធានីភ្នំពេញ។ នៅរសៀលថ្ងៃទី ១៤ សីហា ព្រះរាជអាជ្ញារងអមតុលាការក្រុងភ្នំពេញ បានចោទប្រកាន់លោកចំនួន៣បទល្មើស។ ទី១. គឺបទញុះញង់កុំឲ្យយោធិនស្តាប់បង្គាប់ តាមមាត្រា ៤៧១ នៃក្រមព្រហ្មទណ្ឌកម្ពុជា ទី២.បទល្មើសធ្វើឲ្យខូចទឹកចិត្តកងទ័ព តាមមាត្រា ៤៧២ និងទី៣ គឺបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌកម្ពុជា។ ក្រោយមកទៀតប្រធានគណបក្សរូបនេះត្រូវបានតុលាការសម្រេចបញ្ជូនទៅឃុំឃាំងបណ្ដោះអាសន្ននៅពន្ធនាគារដើម្បីរង់ចាំការកាត់ទោសនៅសប្ដាហ៍ក្រោយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ