ប៉ូលីសខណ្ឌពោធិ៍សែនជ័យម្នាក់ ត្រូវតុលាការចោទប្រកាន់ពីបទ«មនុស្សឃាតដោយអចេតនា»
សាលាដំបូងរាជធានីភ្នំពេញ នៅព្រឹកថ្ងៃទី ២៤មករានេះ បានសម្រេចចោទប្រកាន់ មន្ត្រីនគរបាលខណ្ឌពោធិ៍សែនជ័យម្នាក់ ពីបទ «មនុស្សឃាតដោយអចេតនា» ដែលអាចប្រឈមនឹងការជាប់ពន្ធនាគារពី ១ឆ្នាំ ទៅ ៣ឆ្នាំ។ សវនាការនៅថ្ងៃនេះ ធ្វើឡើងបន្ទាប់ពីមន្ត្រីនគរបាលរូបនោះ បានបាញ់កាំភ្លើងខុសបច្ចេកទេស បណ្តាលឲ្យស្លាប់បុរសមិនដឹងអីម្នាក់ ក្នុងអំឡុងយុទ្ធនាការបង្ក្រាបទីតាំងល្បែងជល់មាន់មួយកន្លែង កាលពីថ្ងៃអាទិត្យ។ នេះក៏ជាសវនាការភ្លាមៗផងដែរ បន្ទាប់ពីមេបញ្ជាការអគ្គស្នងការនគរបាលជាតិ និងមេបញ្ជាការស្នងការនគរបាលរាជធានីភ្នំពេញ បានប្រកាសមិនលើកលែងឲ្យមន្ត្រីណា ទោះបីជាបានប្រព្រឹត្តិដោយអចេតនា ក្នុងបេសកកម្មក៏ដោយ។
ចុះផ្សាយនៅថ្ងៃ៖
ស្តាប់ - ០១:៥៤
មន្ត្រីនគរបាលខណ្ឌពោធិ៍សែនជ័យនោះ ឈ្មោះ ចន វិរៈ មានឋានន្តរស័ក្តិអនុសេនីយ៍ត្រី ឬ ស័ក្តិ១ បម្រើផ្នែកអន្តរាគមន៍ នៃអធិការដ្ឋាននគរបាល ខណ្ឌពោធិ៍សែនជ័យ។ កាលពីព្រឹកថ្ងៃអាទិត្យ ទី ២១មករា នៅពេលកម្លាំងអន្តរាគមន៍នៃអធិការដ្ឋាននគរបាលខណ្ឌពោធិ៍សែនជ័យ បានបើកយុទ្ធនាការចុះទៅបង្ក្រាបសង្វៀនជល់មាន់ និងបាញ់អាប៉ោង នៅក្នុងចំណុចដីឡូតិ៍ ក្រោយផ្សារកាណាស៊ីធី ក្នុងភូមិចោមចៅទី ២ ខណ្ឌពោធិ៍សែនជ័យ រហូតដល់មានការផ្ទុះអាវុធ បាញ់ឡើងលើ បណ្តាលឲ្យផ្លាំងទៅត្រូវនឹងបុរសវ័យ ៣៣ឆ្នាំម្នាក់ ដែលកំពុងតែអឺតមើល នៅលើផ្ទះជួលជាន់ទី ៣ បណ្តាលឲ្យស្លាប់ភ្លាមៗ។
តាមមន្ត្រីជំនាញ បន្ទាប់ពីបានធ្វើកោសល្យវិច្ច័យ គេបានរកឃើញថា ក្បាលគ្រាប់នៅលើសពជនរងគ្រោះ មានសភាពបែក ដែលគេហ៊ានអះអាងថា គ្រាប់នោះបានទៅបុកជញ្ជាំងថ្ម ហើយក៏ផ្លាតត្រូវចំជនរងគ្រោះ។ ទោះជាយ៉ាងនេះក្តី លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងលោក ជួន សុវណ្ណ មេបញ្ជាការស្នងការនគរបាលរាជធានីភ្នំពេញ បានប្រកាសភ្លាមៗដែរថា មិនអនុគ្រោះ ហើយត្រូវតែអនុវត្តតាមនីតិវិធីច្បាប់ ដើម្បីស្វែងរកយុត្តិធម៌ជូនក្រុមគ្រួសារជនរងគ្រោះ។
នៅព្រឹកថ្ងៃទី ២៤មករា សាលាដំបូងរាជធានីភ្នំពេញ បានសម្រេចចោទប្រកាន់មន្ត្រីនគរបាលរូបនោះ តាមមាត្រា ២០៧ នៃក្រមព្រហ្មទណ្ឌ ដែលចែងថា «បទមនុស្សឃាតដោយអចេតនា គឺជាអំពើបណ្តាលឲ្យស្លាប់អ្នកដទៃ ដោយការធ្វេសប្រហែស ការមិនប្រុងប្រយ័ត្ន ឬ ការខ្ជីខ្ជា ត្រូវផ្តន្ទាទោសដាក់ពន្ធនាគារ ពី ១ឆ្នាំ ទៅ ៣ឆ្នាំ និងពិន័យជាប្រាក់ ពី ២លានរៀល ទៅ ៦លានរៀល»។ នេះបើតាមលោកលី សុផាណា អ្នកនាំពាក្យសាលាដំបូងរាជធានីភ្នំពេញ។
បន្ទាប់ពីបានប្រកាសអនុវត្តតាមនីតិវិធីច្បាប់ គេក៏ឃើញសាលារាជធានីភ្នំពេញ ស្នងការនគរបាលរាជធានីភ្នំពេញ និងមជ្ឈដ្ឋានផ្សេងទៀត ឧបត្ថម្ភជាទឹកប្រាក់មួយចំនួន ដល់ក្រុមគ្រួសារជនរងគ្រោះផងដែរ។ ជាការកត់សម្គាល់ កំហុសបច្ចេកទេសដោយអចេតនារបស់មន្ត្រីបម្រើសាធារណជនបែបនេះ មិនមែនទើបតែកើតឡើងជាលើកទី១នោះទេ ប៉ុន្តែគេក៏កម្រឃើញណាស់ នូវការចេញមកទទួលខុសត្រូវនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ