លោកហ៊ុន សែន ប្រកាសឲ្យបិទបញ្ចប់ការផ្សព្វផ្សាយរឿងអាស្រូវលោកសង្ឃក្នុងខេត្តបន្ទាយមានជ័យ
នៅក្នុងពិធីសម្ពោធដាក់ឲ្យប្រើប្រាស់ជាផ្លូវការនូវកំណាត់ផ្លូវជាតិលេខ៦ពីខេត្តកំពង់ចាមទៅខេត្តសៀមរាប នៅព្រឹកថ្ងៃចន្ទនេះ លោកនាយករដ្ឋមន្រ្តីហ៊ុន សែន បានប្រតិកម្មខ្លាំងៗទៅលើការផ្សព្វផ្សាយរឿងអាស្រូវ ព្រះសង្ឃមួយអង្គ និងនារីម្នាក់នៅក្នុងខេត្តបន្ទាយមានជ័យ។ លោកហ៊ុន សែន បានអំពាវនាវឲ្យបញ្ចប់ការផ្សព្វផ្សាយពីរឿងនេះតទៅទៀត ដើម្បីការពារតម្លៃពុទ្ធសាសនា និងតម្លៃស្ត្រីខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ប្រតិកម្ម និងការអំពាវនាវរបស់ប្រមុខរដ្ឋាភិបាលកម្ពុជានេះ ធ្វើឡើងក្រោយពីលោកមើលឃើញថា ដំណើររឿងអាស្រូវរបស់អតីតព្រះសង្ឃ និងនារីវ័យក្មេងម្នាក់នៅក្នុងខេត្តបន្ទាយមានជ័យ នៅតែបន្តកើតឡើងមិនចប់សោះ។ លោកនាយករដ្ឋមន្រ្តីហ៊ុន សែន បានចោទមន្រ្តីយោធាពីររូប គឺលោកផែង វណ្ណៈ និងលោកខណ្ឌ័ ច័ន្ទសុផលថា ជាអ្នកបញ្ឆេះរឿងនេះឲ្យកាន់តែសុះសាយឡើងមិនចេះចប់មិនចេះហើយ។
លោកផែង វណ្ណៈ និងលោកខណ្ឌ័ ច័ន្ទសុផល ដែលសុទ្ធតែជាអ្នកល្បីល្បាញនៅលើទំព័រហ្វេសប៊ុកបានចុះទៅសម្ភាសន៍ដាច់ដោយឡែកពីគ្នាជាមួយអតីតព្រះសង្ឃ និងនារីដែលពាក់ព័ន្ធក្នុងរឿងអាស្រូវផ្លូវភេទនេះ។ លោកផែង វណ្ណៈ បានចុះទៅសម្ភាសន៍ដោយផ្សាយផ្ទាល់តាមហ្វេសប៊ុកជាមួយអតីតព្រះសង្ឃនោះ ដើម្បីឲ្យបកស្រាយរឿងរ៉ាវដែលបានកើតឡើង។ រីឯលោកខណ្ឌ័ ច័ន្ទសុផលវិញ បានចុះទៅសម្ភាសន៍ជាមួយខាងនារី ដើម្បីឲ្យឆ្លើយតប។ ទង្វើទាំងនេះត្រូវបានលោកនាយករដ្ឋមន្រ្តីចាត់ទុកថា ជាការបង្កើតរឿងឲ្យកាន់តែវែងឆ្ងាយ ដែលគ្មានការចំណេញអ្វីសោះដល់សង្គម។ លោកហ៊ុន សែន បានប្រាប់ឲ្យអ្នកទាំងពីរនេះបញ្ចប់ការផ្សព្វផ្សាយបន្តនូវរឿងនេះទៀត បើពុំដូច្នោះទេពួកគេនឹងត្រូវបណ្តេញចេញពីជួរកងទ័ពកម្ពុជា។
ភ្លាមៗក្រោយពីរងការស្តីបន្ទោសនិងព្រមានពីនាយករដ្ឋមន្រ្តីនេះ លោកផែង វណ្ណៈនិងលោកខណ្ឌ័ ច័ន្ទសុផល តាមរយៈទំព័រហ្វេសប៊ុករៀងខ្លួនបានចេញមកសន្យាឈប់ផ្សព្វផ្សាយបន្តនូវរឿងអាស្រូវនេះ។ ក្រៅពីសន្យា លោកផែង វណ្ណៈ ក៏បានសុំទោសលោកនាយករដ្ឋមន្រ្តីចំពោះកំហុសដែលខ្លួនបានប្រព្រឹត្ត។ ចំណែកលោកខណ្ឌ័ ច័ន្ទសុផលវិញ បានអរគុណលោកនាយករដ្ឋមន្រ្តីដែលបានណែនាំដល់រូបលោកចំពោះរឿងនេះ។
សូមរំឮកបន្តិចថា រឿងអាស្រូវផ្លូវភេទខុសសីលធម៌រវាងព្រះសង្ឃ និងគ្រហស្ថនេះ បានកើតឡើងនៅក្នុងខេត្តបន្ទាយមានជ័យ កាលពីសប្តាហ៍មុន។ ក្រោយបែករឿងអាស្រូវនេះ ព្រះសង្ឃអង្គនោះត្រូវបានចាប់ផ្សឹកហើយត្រូវនារីជាដៃគូប្តឹងទៅកាន់តុលាការថែមទៀត។ បើទោះបីរឿងនេះបានបញ្ចប់តាមវិន័យសង្ឃយ៉ាងណាក៏ដោយ ប៉ុន្តែមកដល់ពេលនេះ វានៅតែកក្រើកនៅក្នុងចំណោមមហាជនខ្មែរដដែល ជាពិសេសតាមបណ្តាញសង្គមហ្វេសប៊ុក។ ប្រឈមនឹងបញ្ហានេះ លោកនាយករដ្ឋមន្រ្តីហ៊ុន សែន បានអំពាវនាវឲ្យប្រជាពលរដ្ឋធ្វើចិត្តឲ្យស្ងប់ និងបញ្ចប់ការផ្សព្វផ្សាយរឿងរ៉ាវនេះតទៅទៀត។ សម្រាប់លោកនាយករដ្ឋមន្រ្តី បើសិនរឿងនេះនៅតែមិនព្រមចប់ នោះវានឹងប៉ះពាល់ដល់ពុទ្ធសាសនា និងតម្លៃនៃស្រ្តីខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ