នាយករដ្ឋមន្រ្តីកម្ពុជា-ឡាវ នឹងស្នើសុំផែនទីពីបារាំង ដើម្បីកំណត់បញ្ហាទឹកដីបញ្ចប់ជម្លោះនៅតាមព្រំដែន
នៅព្រឹកនេះ លោកនាយករដ្ឋមន្ត្រីកម្ពុជាហ៊ុន សែន និងលោកថងលន់ ស៊ីស៊ូលីតនាយករដ្ឋមន្ត្រីឡាវបានជួបប្រជុំគ្នានៅវិមានសន្តិភាព ដើម្បីពិភាក្សាលើការដោះស្រាយបញ្ហានៅតាមព្រំដែនរវាងប្រទេសទាំងពីរ។ ក្នុងជំនួបទ្វេភាគីនេះ នាយករដ្ឋមន្រ្តីទាំងពីរប្រទេស បានឯកភាពគ្នានឹងស្នើទៅកាន់ប្រធានាធិបតីបារាំង ដើម្បីស្នើសុំផែនទី និងឯកសារផ្សេងៗទៀតដែលទាក់ទងនឹងព្រំដែននៃប្រទេសទាំងពីរ ដើម្បីយកមកធ្វើជាគោលដោះស្រាយបញ្ហានៅតាមព្រំដែនកម្ពុជា-ឡាវ។
ចុះផ្សាយនៅថ្ងៃ៖
ស្តាប់ - ០២:៣២
ជំនួបដ៏កម្រអំពីបញ្ហាព្រំដែនរវាងនាយករដ្ឋមន្រ្តីកម្ពុជា និងឡាវនាពេលនេះ បានសម្រេចចេញនូវចំណុចឯកភាពគ្នាចំនួន៤។ ទីមួយ គឺភាភីទាំងពីរសម្រេចឲ្យរដ្ឋមន្រ្តីការបរទេសទាំងសងខាងជួបប្រជុំគ្នានៅក្នុងទីក្រុងភ្នំពេញនាពេលខាងមុខនេះ ដើម្បីរកដំណោះស្រាយក៏ដូចជាការយោគយល់អំពីបញ្ហាព្រំដែន។ ទីពីរ ភាគីឡាវបានយល់ព្រមដោះស្រាយលើចំណុចសំខាន់ៗទៅតាមសំណើរបស់នាយករដ្ឋមន្រ្តីកម្ពុជាដែលរួមមានដូចជា គឺចំណុចបង្គោលព្រំដែនលេខ៣៣០៣៣ ក៏ដូចជានៅតំបន់អូស្វាយវ៉ឺនខាំជាដើម។ ចំណុចទីបី គឺភាគីទាំងពីរបានឯកភាពឲ្យគណៈកម្មការព្រំដែនចុះទៅដោះស្រាយដោយផ្ទាល់នៅតំបន់អូតាង៉ាវដែលនៅសេសសល់។ រីឯចំណុចទីបួន គឺនាយករដ្ឋមន្រ្តីកម្ពុជា និងឡាវបានឯកភាពគ្នាសរសេរលិខិតទៅកាន់ប្រធានាធិបតីបារាំង ដើម្បីស្នើសុំបារាំងផ្ទេរផែនទីពីខ្នាត១លើ១០០ពាន់មក១លើ៥០ពាន់ និងស្នើសុំឲ្យបារាំងជួយផ្តល់ឯកសារផ្សេងទៀតដែលទាក់ទងនឹងព្រំដែនកម្ពុជា-ឡាវ។
នៅក្នុងសន្និសីទកាសែតរួមគ្នាក្រោយជំនួបទ្វេភាគីជាមួយភាគីឡាវនេះ លោកនាយករដ្ឋមន្រ្តីហ៊ុន សែន បានសង្កត់ធ្ងន់ថា ការបញ្ចូនគណៈកម្មការព្រំដែនទាំងពីរទៅចុះដោះស្រាយដោយផ្ទាល់នៅចំណុចដែលសេសសល់នោះ គឺថាបើរកឃើញថាដីជារបស់កម្ពុជា និងដីណាជារបស់ឡាវត្រូវកំណត់ភ្លាមនិងបោះបង្គោលតែម្តង។ ចំណែកលោកនាយករដ្ឋមន្រ្តីឡាវថងលន់ ស៊ីស៊ូលីត បានប្រកាសនូវមុខលោកនាយករដ្ឋមន្រ្តីហ៊ុន សែន និងអ្នកកាសែតថា លោកយល់ព្រមទាំងអស់ទៅនឹងដំណោះស្រាយបញ្ហាព្រំដែនរវាងប្រទេសទាំងពីរលោកហ៊ុន សែនបានលើកឡើងនេះ។ លោកនាយករដ្ឋមន្រ្តីឡាវបានបង្ហាញពីការជឿជាក់របស់ខ្លួនថា ដំណោះស្រាយនេះ គឺគោលលើមិត្តភាព ស្មើភាព មិនឲ្យអ្នកណាខាត អ្នកណាចំណេញឡើយ។
សូមបញ្ជាក់ថា ជំនួបរវាងប្រមុខដឹកនាំប្រទេសទាំងពីរនៅភ្នំពេញនេះ បានធ្វើឡើងបន្ទាប់ភាគីឡាវសម្រេចដកទ័ពរបស់ខ្លួនភា្លមៗចេញពីទឹកដីកម្ពុជានៅក្នុងខេត្តស្ទឹងត្រែង។ ការដកកងទ័ពគ្មានបង្អង់នេះ ធ្វើឡើងក្រោយពីលោកនាយករដ្ឋមន្រ្តីហ៊ុន សែនបានទៅជួបនិយាយជាមួយនាយករដ្ឋមន្រ្តីឡាវដោយផ្ទាល់នៅក្នុងទីក្រុងវៀងច័ន្ទកាលពីថ្ងៃទី១២ សីហា បន្ទាប់ដាក់ឱសានវាទមួយសប្តាហ៍ឲ្យកងទ័ពឡាវដកចេញ និងបានបញ្ជូនកងទ័ពកម្ពុជាទៅកាន់តំបន់ព្រំដែនមានបញ្ហានោះ។
ទាំងលោកនាយករដ្ឋមន្រ្តីកម្ពុជា និងឡាវ សុទ្ធតែអះអាងដូចគ្នាថា ដំណោះស្រាយបញ្ហាព្រំដែនឈានដល់ដំណាក់កាលនេះ គឺកើតឡើងជាចម្បងដោយសារតែទំនាក់ទំនងផ្ទាល់ខ្លួនរវាងអ្នកទាំងពីរក៏ដូចជាក្រុមគ្រួសារ។ ប្រមុខដឹកនាំទាំងពីរ ក៏បានឯកភាពគ្នាព្យាយាមរក្សាឲ្យមានសន្តិសុខ និងសនិ្តភាពនៅចំណុចព្រំដែននៃប្រទេសទាំងពីរដែលមិនទាន់ដោះស្រាយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ