ក្រសួងកសិកម្មនឹងផ្ដល់ជំនួយបច្ចេកទេសដើម្បីជំរុញការចិញ្ចឹមជ្រូកក្នុងស្រុកបន្ថយការនាំចូលពីថៃ
ក្រសួងកសិកម្មនិងវិស័យឯកជនបានជួបគ្នានៅថ្ងៃទី៥ខែមិថុនានេះដើម្បីស្វែងរកដំណោះស្រាយកាត់បន្ថយការនាំចូលជ្រូកពីថៃ។ ជំនួបនេះធ្វើឡើងបន្ទាប់ពីការនាំចូលជ្រូករស់ពីថៃមានការកើនឡើង ក្រោយកម្ពុជាផ្អាកនាំចូលជ្រួកពីវៀតណាម ដោយសារតែជំងឺប៉េស្ដជ្រូកអាហ្វ្រិក។ ក្នុងនោះរដ្ឋមន្ត្រីក្រសួងកសិកម្មជាថ្មីទៀត បានជំរុញឲ្យមានការចិញ្ចឹមជ្រូកក្នុងស្រុក ដើម្បីកាត់បន្ថយការនាំចូល ហើយក្រសួងនឹងត្រៀមជួយផ្នែកបច្ចេកទេស។
ចុះផ្សាយនៅថ្ងៃ៖
ស្តាប់ - ០១:៥៥
ថ្លែងប្រាប់វិទ្យុបារាំងអន្តរជាតិRFI នៅថ្ងៃទី៥ខែមិថុនានេះ រដ្ឋមន្ត្រីក្រសួងកសិកម្ម លោកវេង សាខុន បានគូសបញ្ជាក់ថា ជំនួបរវាងអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម និងវិស័យឯកជននៅថ្ងៃពុធនេះ ផ្ដោតទៅលើការជំរុញឲ្យវិស័យឯកជនចិញ្ចឹមជ្រូកបន្ថែម និងរកវិធានការទប់ស្កាត់ការកើនឡើងតម្លៃសាច់ជ្រូកនៅលើទីផ្សារ។ បច្ចុប្បន្នតម្លៃសាច់ជ្រូកនៅលើទីផ្សារ លោករដ្ឋមន្ត្រីអះអាងថា មានការឡើងថ្លៃ ដោយសារទីផ្សារថៃដែលកម្ពុជានាំចូលផ្ដាច់មុខនោះកំពុងប្រឈមនឹងកង្វះជ្រូករស់ដែរ។
បើតាមលោក វេង សាខុន មិនថា ដំណោះស្រាយរយៈពេលវែង និងខ្លីនោះទេគឺមានតែជំរុញការចិញ្ចឹមជ្រូកក្នុងស្រុកប៉ុណ្ណោះទើបកាត់បន្ថយការនាំចូលជ្រូករស់ពីប្រទេសក្បែរខាងកម្ពុជា។ ក្នុងនោះក្រសួងកសិកម្មនឹងផ្ដល់ជំនួយបច្ចេកទេសទៅវិស័យឯកជនដើម្បីរួមចំណែកដល់ការចិញ្ចឹម ខណៈប្រភពថវិកាស្ថិតក្នុងដែនសមត្ថកិច្ចរបស់ធនាគារអភិវឌ្ឍជនបទ។ចំពោះក្រសួងកសិកម្មលោករដ្ឋមន្ត្រីគូសបញ្ជាក់ថា មិនមានប្រភពថវិកាផ្ដល់ឲ្យវិស័យឯកជនឡើយ។
ជាការកតសម្គាល់ មុនពេលផ្ទុះជំងឺប៉េស្តជ្រូកអាហ្វ្រិកនៅវៀតណាមការនាំចូលជ្រូកពីថៃនិងវៀតណាម មកកម្ពុជាក្នុង១ថ្ងៃអាចមានចំនួនពី ១,០០០-១,៥០០ ក្បាល។ បន្ទាប់ពីជ្រូកនៅវៀតណាម ត្រូវបានវាយប្រហារដោយជំងឺប៉េស្តជ្រូកអាហ្វ្រិក កម្ពុជាក៏សម្រេចហាមឃាត់ការនាំចូលជ្រូកពីវៀតណាម ដោយងាកទៅពឹងផ្អែកលើការនាំចូលមកពីប្រទេសថៃតែមួយប៉ុណ្ណោះ។ ហើយជាមធ្យមក្នុង១ថ្ងៃ កម្ពុជាមានតម្រូវការជ្រូកប្រមាណ ៥ ០០០-៦ ០០០ ក្បាល ដោយក្នុងនោះប្រមាណជិត ២០ ភាគរយ ជាជ្រូកនាំចូលពីប្រទេស ថៃ និងវៀតណាម។
បច្ចុប្បន្នក្រុមហ៊ុនក្នុងស្រុកពីរដែលផ្គត់ផ្គង់ការចិញ្ចឹមជ្រូកគឺក្រុមហ៊ុនCPនិងក្រុមហ៊ុន ម៉ុង រិទ្ធី។ បើតាមវិស័យឯកជនធ្លាប់លើកឡើងថា ពួកគេនៅរួញរាក្នុងការបន្ថែមបរិមាណចិញ្ចឹមជ្រួកដោយសារតែខ្លាចឆ្លងជំងឺប៉េស្ដជ្រូកអាហ្វ្រិកដែលបានកើតមានរួចហើយនៅក្នុងស្រុកពីរក្នុងខេត្តរតនគិរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ