ព្រឹត្តិការណ៍មហោស្រពរូបថតភ្នំពេញត្រឡប់មកវិញជាមួយស្នាដៃរបស់សិល្បករថតរូប៣០នាក់
ព្រឹត្តិការណ៍មហោស្រពរូបថតភ្នំពេញ បានត្រឡប់មកវិញហើយនៅឆ្នាំ២០១៧នេះ ចាប់ផ្ដើមពីថ្ងៃសៅរ៍ទី២១ ដល់ថ្ងៃចន្ទទី២៣តុលាខាងមុខ។ នៅក្នុងមហោស្រពនេះ ស្នាដៃសិល្បៈរបស់ក្រុមសិល្បករកម្ពុជា៥រូប និងអន្ដរជាតិ២៥រូប នឹងត្រូវដាក់បង្ហាញនៅលើផ្ទាំងសំពត់សនៅទីតាំងចំនួន១០កន្លែងទូទាំងរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងសន្និសីទសារព័ត៌មាននៅព្រឹកថ្ងៃពុធនេះ វិទ្យាស្ថានបារាំងនៅកម្ពុជា និងសមាគមរូបថតភ្នំពេញ បានប្រកាសជាផ្លូវការនូវការរៀបចំមហោស្រពរូបថតភ្នំពេញ សម្រាប់ឆ្នាំ២០១៧។ រៀបចំឡើងជាលើកទី៨ ចាប់តាំងពីឆ្នាំ២០០៨មក មហោស្រពរូបថតភ្នំពេញនៅឆ្នាំនេះ នឹងដាក់តាំងបង្ហាញស្នាដៃសិល្បៈរូបថត នៅទីតាំងសាធារណៈចំនួន១០កន្លែងនៅទីក្រុងភ្នំពេញ រាប់ចាប់តាំងពីរបងស្ថានទូតបារាំង របងវិទ្យាស្ថានបារាំងនៅកម្ពុជា មជ្ឈមណ្ឌលពិព័រណ៍កោះពេជ្រ និងសាកលវិទ្យាល័យភូមិន្ទភ្នំពេញជាដើម។
អនុប្រធានសមាគមរូបថតភ្នំពេញ លោក សុវណ្ណ ភីឡុង បញ្ជាក់ថា មហោស្រពរូបថតនេះ បង្កើតឡើងដើម្បីផ្ដល់ឱកាសឲ្យអ្នកថតរូបខ្មែរ មានឱកាសបង្ហាញស្នាដៃរបស់ខ្លួនជូនសាធារណជន។ មិនត្រឹមតែប៉ុណ្ណោះ តាមរយៈព្រឹត្តិការណ៍នេះ លោកសង្ឃឹមថា សិល្បករអ្នកថតរូបខ្មែរនិងអន្ដរជាតិសរុប៣០រូបនឹងមានឱកាសជួបគ្នាផ្លាស់ប្ដូរបទពិសោធដើម្បីអភិវឌ្ឍស្នាដៃសិល្បៈរបស់ពួកគេបន្ថែមទៀត។
សម្រាប់អនុប្រធានសមាគមរូបថតភ្នំពេញរូបនេះ ការចូលរួមរបស់សិល្បករអ្នកថតរូបខ្មែរ មានសារៈសំខាន់ខ្លាំងណាស់ ហើយលោកចង់ឲ្យអ្នកថតរូបខ្មែរចូលរួមក្នុងមហោស្រពរូបថតភ្នំពេញឲ្យបានកាន់តែច្រើន ខណៈឆ្នាំនេះ សិល្បករអ្នកថតរូបខ្មែរដែលចូលរួម មានចំនួនតែ៥រូបប៉ុណ្ណោះ។
ត្បិតតែមានចំនួនតិច ប៉ុន្តែសិល្បករថតរូបខ្មែរដែលចូលរួមនៅក្នុងមហោស្រពរូបថតភ្នំពេញឆ្នាំ២០១៧នេះ បានលើកយកនូវរូបថតដ៏គួរឲ្យចាប់អារម្មណ៍មកដាក់បង្ហាញជូនសាធារណជន។ ក្នុងនោះ យុវសិល្បករ លោក សួន សាយ័ន្ត តាំងបង្ហាញរូបថតពណ៌សខ្មៅរបស់ខ្លួននៅកោះពេជ្រ, និងលោក គីម ហាក់ សមាជិកម្នាក់នៃស្ទូឌីយោរូបភាព ដាក់បង្ហាញស្នាដៃស្ដីពីអគារប៊ូឌីញនៅមជ្ឈមណ្ឌលបូផាណាជាដើម។ ចំណែកអ្នកថតរូបអន្ដរជាតិ មាន២៥រូប មកពីប្រទេសបារាំង អង់គ្លេស ជប៉ុន វៀតណាម និងប្រទេសដទៃទៀតជាច្រើន។
ក្រៅពីការតាំងបង្ហាញស្នាដៃរូបថត ព្រឹត្តិការណ៍មហោស្រពរូបថតភ្នំពេញក៏មានរួមបញ្ចូលកម្មវិធីផ្សេងៗទៀតផងដែរ ដូចជា៖ កម្មវិធីចាក់បញ្ចាំងរូបថតព្រមជាមួយការប្រគំតន្ដ្រីផ្ទាល់ ជំនួបសិល្បករថតរូប និងការចាក់បង្ហាញរូបថតដែលត្រូវបានជ្រើសរើសជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ