លោក ផៃ ស៊ីផាន៖ ជាកាតព្វកិច្ច លោក ព្រាប កុល ឬតំណាងត្រូវតែចូលខ្លួនតាមការអញ្ជើញ
លោក ផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុក ជាអ្នកនាំពាក្យរដ្ឋាភិបាល បានបញ្ជាក់នៅថ្ងៃចន្ទនេះថា លោក ព្រាប កុល នាយកប្រតិបត្តិ អង្គការតម្លាភាពកម្ពុជា ឬតំណាងរបស់លោកត្រូវតែចូលខ្លួនមកជជែកដោយបិទទ្វារនៅទីស្តីការគណៈរដ្ឋមន្រ្តីនៅព្រឹកថ្ងៃទី១១ ខែកញ្ញា ឆ្នាំ២០១៩។ ការគូសបញ្ជាក់របស់លោក ផៃ ស៊ីផាន គឺបន្ទាប់ពីលោក ព្រាប កុល បានឆ្លើយតបដោយប្រយោលថា លោកកំពុងជាប់រវល់បំពេញបេសកកម្មអន្តរជាតិនៅទ្វីបអឺរ៉ុប ដូចនេះលោកមិនអាចទៅចូលរួមប្រជុំតាមកាលវិភាគនៃការអញ្ជើញនេះបានទេ។
ចុះផ្សាយនៅថ្ងៃ៖
ស្តាប់ - ០២:០១
ប្រាប់វិទ្យុបារាំងអន្តរជាតិRFIនៅថ្ងៃចន្ទនេះ លោក ផៃ ស៊ីផាន បានសង្កត់ធ្ងន់ថា ជាកាតព្វកិច្ច លោក ព្រាប កុល ឬតំណាងត្រូវតែចូលខ្លួនមកជជែកគ្នាតាមការអញ្ជើញនេះ។ ការកោះអញ្ជើញរបស់អង្គភាពអ្នកនាំពាក្យរដ្ឋាភិបាល គឺតម្រូវឲ្យនាយកប្រតិបត្តិអង្គការតម្លាភាពកម្ពុជា ចូលរួមក្នុងកិច្ចពិភាក្សាចង្អៀត(Closed Door Meeting) ចំពោះអ្វីដែលលោក ព្រាប កុល បាននិយាយជាមួយសារព័ត៌មានបរទេសមួយឈ្មោះថា Southeast Asia Globe។
ទស្សនាវដ្ដីនេះ បានចុះផ្សាយកាលពីថ្ងៃទី២១ ខែសីហា កន្លងមក ដោយបានលើកថា កម្ពុជាបានទទួលកំណើនសេដ្ឋកិច្ចរីកលូតលាស់ខ្លាំងនៅក្នុងរយៈពេលប៉ុន្មានទសវត្សរ៍ចុងក្រោយនេះ។ ប៉ុន្តែបានដកស្រង់សំដី លោក ព្រាប កុល ដែលនិយាយថា ពលរដ្ឋកម្ពុជាភាគច្រើន ជាពិសេសអ្នកក្រ ឬពលរដ្ឋងាយរងគ្រោះ មិនទទួលបានផលប្រយោជន៍ពីកំណើនសេដ្ឋកិច្ចដ៏គួរឱ្យកត់សម្គាល់នេះឡើយ។
ចំណុចនេះហើយដែល លោក ផៃ ស៊ីផាន អះអាងថា អ្វីដែល លោក ព្រាប កុល បានធ្វើអត្ថាធិប្បាយនោះជាព័ត៌មានមិនពិត គឺផ្ទុយពីអ្វីដែលរដ្ឋាភិបាលរបស់លោកកំពុងតែធ្វើ។
យ៉ាងណាក៏ លោក ព្រាប កុល បានកត់សម្គាល់ឃើញថា ថ្មីៗនេះ មានការអញ្ជើញប្រធានស្ថាប័ន ឬអង្គការសង្គមស៊ីវិលពីសំណាក់រដ្ឋាភិបាល ក្រោយមានការធ្វើអត្ថាធិប្បាយអំពីបញ្ហាសង្គម ឬក្រោយមានការសម្តែងមតិនៅតាមរយៈសារព័ត៌មាន ដែលនេះគឺជាការវិវត្តថ្មីមួយនៅកម្ពុជា ដែលគួរជាទីចាប់អារម្មណ៍។
បើតាម លោក ផៃ ស៊ីផាន យន្តការកោះហៅមន្រ្តីសង្គមស៊ីលវិលទៅជជែកគ្នាដោយបិទទ្វារនេះ មិនមែនជារឿងចម្លែកទេ ដោយលោកបានភ្ជាប់យន្តការនេះទៅនឹងអ្វីដែល លោក ស ខេង បានលើកឡើងកន្លងមកថា អង្គការសង្គមស៊ីវិលជាដៃគូរដ្ឋាភិបាល ដែលត្រូវតែចែករំលែកព័ត៌មានឲ្យគ្នាទៅវិញទៅមក។
សូមបញ្ជាក់ថា នៅថ្ងៃទី១១កញ្ញាឆ្នាំ២០១៩នោះ តំណាងអង្គការលីកាដូ និងសមាគមធាងត្នោតក៏ត្រូវបានអង្គភាពអ្នកនាំពាក្យរដ្ឋាភិបាលកោះអញ្ជើញទៅចូលរួមក្នុងកិច្ចពិភាក្សាចង្អៀតផងដែរ ស្ដីពី «មីក្រូហិរញ្ញវត្ថុ និងផលប៉ះពាល់» បន្ទាប់ពីអង្គការទាំងពីរបានចេញរបាយការណ៍ថា ពលរដ្ឋមួយចំនួនកំពុងវ័ន្តកនឹងបំណុលរបស់ស្ថាប័នមីក្រូហិរញ្ញវត្ថុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ