អង្កការជនពិការកម្ពុជា៖ ជនពិការនៅតែជួបការលំបាកក្នុងការបោះឆ្នោត
ក្រោយពីដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ បានបញ្ចប់ អង្គការជនពិការកម្ពុជាបានសង្កេតឃើញថាជនពិការនៅតែជួបការលំបាកក្នុងការចូលរួមការបោះឆ្នោត ហើយស្នើគ.ជ.ប ឲ្យដាក់បញ្ចូលពិការភាព៣ប្រភេទ ក្នុងបញ្ជីឈ្មោះ។ ចំណែក គ.ជ.ប វិញ កំពុងពិចារណាចំពោះការលើកឡើងនេះ។
ចុះផ្សាយនៅថ្ងៃ៖
ស្តាប់ - ០២:០៣
លោកងិន សៅរ័ត្ន នាយកប្រតិបត្តិអង្កការជនពិការកម្ពុជាបានថ្លែងប្រាប់វិទ្យុបារាំងអន្តរជាតិនៅថ្ងៃទី១៧ ខែមិថុនាថា ជនពិការដែលចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីថ្ងៃទី៤ ខែមិថុនាកន្លងទៅ នៅតែជួបការលំបាកដូចជា ការិយាល័យបោះឆ្នោតប្រមាណ៧០ភាគរយខ្វះជម្រាល ហិបឆ្នោតនៅខ្ពស់ ការផ្តល់អាទិភាពឲ្យជនពិការនៅមានកម្រិត ឬមិនមានការជួយសម្រួលដល់ជនពិការជាដើម។
ការរកឃើញរបស់អង្គការជនពិការកម្ពុជាធ្វើឡើង តាមរយៈការដាក់ពង្រាយភ្នាក់ងារជនពិការជាង១៥០នាក់នៅទូទាំងប្រទេស ដើម្បីសង្កេតមើលជនពិការ ដែលចូលរួមនៅក្នុងការបោះឆ្នោតជ្រើសរើសក្រុមប្រឹក្សាអាណត្តិទី៤។
លោកហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងថាអ្នកដែលមានពិការភាពត្រូវបានយកចិត្តទុកដាក់ ដូចជាការរៀបចំក្រដាស់ចោះប្រហោងសម្រាប់អ្នកពិការភ្នែក ហើយអ្នកពិការភ្នែកអាចស្នើសុំជំនួយពីប្រធានការិយាល័យ ឬសាច់ញាតិបាន បើចាំបាច់។ លោកបន្ថែមថា គ.ជ.ប ក៏បានណែនាំទៅមន្ត្រីរបស់ខ្លួនឲ្យបង្កលក្ខណៈងាយស្រួលដល់ជនពិការអាចបោះឆ្នោតមុនគេ ហើយគ.ជ.ប ក៏បានរៀបចំឲ្យមានជម្រាលសម្រាប់ជនពិការដែលប្រើរទេះដែរ។
ដោយផ្អែកតាមទិន្នន័យរបស់រដ្ឋាភិបាល នាយកប្រតិបត្តិអង្គការជនពិការកម្ពុជាបានឲ្យដឹងថា ការបោះឆ្នោតកាលពីថ្ងៃទី៤ មិថុនា កន្លងទៅ មានជនពិការចូលរួមប្រមាណ៣០ម៉ឺននាក់។ ប៉ុន្តែលោកហង្ស ពុទ្ធា អ្នកនាំពាក្យ គ.ជ.ប បានប៉ាន់ស្មានថាមានជនពិការប្រមាណ៣ម៉ឺននាក់ ប៉ុណ្ណោះ។
លោកងិន សៅរ័ត្ន បានបង្ហាញក្តីសង្ឃឹមថា គ.ជ.ប នឹងបង្កើតឲ្យមានទិន្នន័យច្បាស់លាស់ពីចំនួនជនពិការដែលចូលរួមក្នុងការបោះឆ្នោតអាណត្តិក្រោយ។ លោកក៏ចង់ឲ្យ គ.ជ.ប បង្កើតតារាងបញ្ជាក់ពីពិការភាពរបស់ជនពិការ ក្នុងបញ្ជីបោះឆ្នោត ដើម្បីឲ្យគ.ជ.បជួយសម្របសម្រួលបានល្អដល់ជនពិការ។ បើតាមលោកងិន សៅរ័ត្ន ពិការភាព ដែលលោកចង់ឲ្យដាក់បញ្ជាក់នៅក្នុងបញ្ជីឈ្មោះបោះឆ្នោតនោះរួមមាន ជនពិការភ្នែក និងដៃទាំងសងខាង និងជនពិការដែលប្រើរទេះ។
លោកហង្ស ពុទ្ធាបានលើកឡើងថា គ.ជ.បនៅតែបន្តពិភាក្សាលើបញ្ហានេះនៅឡើយ ប៉ុន្តែលោកបញ្ជាក់ថាការបន្ថែមតារាងបញ្ជាក់ពីពិការភាពនេះ គឺជាការលំបាកមួយទាក់ទងនឹងបញ្ហាបច្ចេកទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ