មេបក្សប្រឆាំងអំពាវនាវសុំឲ្យសហប្រធាននៃកិច្ចព្រមព្រៀងសន្តិភាពក្រុងប៉ារីសកោះប្រជុំ
មេបក្សប្រឆាំង ដែលកំពុងជាប់ឃុំបានអំពាវនាវសុំឲ្យសហប្រធាននៃកិច្ចព្រមព្រៀងសន្តិភាពក្រុងប៉ារីសកោះប្រជុំ ដើម្បីជួយស្រោចស្រង់ស្ថានការណ៍នយោបាយនៅកម្ពុជា។ ចំណែកលោកនាយករដ្ឋមន្ត្រីហ៊ុន សែន នៅថ្ងៃទី២៣ ខែតុលានេះ បានលើកឡើងថារដ្ឋាភិបាលរបស់លោកកំពុងគោរពកិច្ចព្រមព្រៀងក្រុងប៉ារីស ព្រោះកិច្ចព្រមព្រៀងនេះ បានរលាយធាតុចូលទៅក្នុងរដ្ឋធម្មនុញ្ញរបស់ប្រទេសកម្ពុជារូចទៅហើយ។
ចុះផ្សាយនៅថ្ងៃ៖
ស្តាប់ - ០៣:២៦
លោកនាយករដ្ឋមន្ត្រីហ៊ុន សែនបានលើកឡើងថា បើយកកិច្ចព្រមព្រៀងក្រុងប៉ារីសមកគោរព សួរថាតើការកាត់ទោសខៀវ សំផន នួន ជា សមស្រប ឬអត់? កិច្ចព្រមព្រៀងក្រុងប៉ារីសមិនបានតម្រូវឲ្យមានការកាត់ទោស ខៀវ សំផន នួន ជា ឬកាត់ទោសខ្មែរក្រហមទេ។
លោកបន្ថែមថារដ្ឋាភិបាលរបស់លោកបាននឹងកំពុងគោរពកិច្ចព្រមព្រៀងសន្តិភាពក្រុងប៉ារីស។ លោកថាដោយសារតែគេមិនគោរពកិច្ចព្រមព្រៀងក្រុងប៉ារីសនេះហើយ ទើបអង្គការចាត់តាំងនយោបាយ និងយោធារបស់ខ្មែរក្រហមត្រូវបានរំលាយ ដោយសារតែគេមិនគោរពកិច្ចព្រមព្រៀងក្រុងប៉ារីសនេះហើយ បានជាមានគណបក្សនយោបាយមួយនឹងអាចត្រូវរំលាយនៅពេលខាងមុខ។
ក្នុងឱកាសបើកការដ្ឋានសាងសង់ស្ពានបេតុងមួយខ្សែប្រវែងជិត១គីឡូម៉ែត្រ ឆ្លងកាត់ទន្លេសាបពីតំបន់អភិវឌ្ឍន៍ក្រុងរណបជ្រោយចង្វារ ទៅកាន់ផ្លូវជាតិលេខ៥ លោកហ៊ុន សែនបានចំណាយពេលជាងមួយម៉ោង ដើម្បីបកស្រាយពីការលើកឡើងផ្សេងៗចំពោះកិច្ចព្រមព្រៀងសន្តិភាពក្រុងប៉ារីស។ លោកហ៊ុន សែនបានបញ្ជាក់ថា ដូច្នេះរបស់ដែលហៅថាការអំពាវនាវឲ្យបណ្តាប្រទេសជាហត្ថលេខីនៃកិច្ចព្រមព្រៀងក្រុងប៉ារីស ប្រជុំឡើងវិញ វាជារឿងហួសសម័យ ហើយធ្វើមិនកើតទេ។
គួរជម្រាបថាការប្រារព្ធខួប២៦ឆ្នាំនៃកិច្ចព្រមព្រៀងក្រុងប៉ារីស២៣តុលា នៅឆ្នាំ២០១៧នេះ គឺចំពេលដែលស្ថានការណ៍នយោបាយប្រទេសកម្ពុជាត្រូវបានគេមើលឃើញថាកំពុងតែមានភាពតានតឹង ក្រោយពីការជាប់ឃុំខ្លួនមេបក្សប្រឆាំងក្នុងពន្ធនាគារ និងការប្តឹងរំលាយគណបក្សប្រឆាំងជាដើម។
នៅព្រឹកថ្ងៃទី២៣ ខែតុលានេះ គណបក្សប្រឆាំងដែលកំពុងរងបណ្តឹងរំលាយនោះ បានប្រារព្ធខួប២៦ឆ្នាំនៃកិច្ចព្រមព្រៀងសន្តិភាពក្រុងប៉ារីស នៅឯស្នាក់ការបក្ស។ លោកកឹម សុខា ប្រធានគណបក្សប្រឆាំង ដែលកំពុងជាប់ឃុំនៅឯពន្ធនាគារក្នុងខេត្តត្បូងឃ្មុំ បានចេញសារលិខិតមួយក្នុងឱកាសខួប២៦ឆ្នាំនៃកិច្ចព្រមព្រៀងក្រុងប៉ារីស ហើយលោកប្រធានគណបក្សប្រឆាំងរូបនេះ បានសង្កេតឃើញថាកម្ពុជាកំពុងដើរផ្ទុយពីស្មារតីនៃកិច្ចព្រមព្រៀងនេះ។ ក្នុងលិខិតដដែលលោកកឹម សុខាបានអំពាវនាវដល់ប្រជាពលរដ្ឋខ្មែរគ្រប់និន្នាការទាំងអស់ ចូលរួមការពារស្មារតីកិច្ចព្រមព្រៀងសន្តិភាពក្រុងប៉ារីស និងជាពិសេសការពាររដ្ឋធម្មនុញ្ញ។
លោកកឹម សុខាក៏បានអំពាវនាវឲ្យសហគមន៍អន្តរជាតិ ជាពិសេសប្រទេសហត្ថលេខីនៃកិច្ចព្រមព្រៀងសន្តិភាពក្រុងប៉ារីស ជួយជាបន្ទាន់ដល់ប្រទេសកម្ពុជា ដោយមិនត្រឹមតែចេញសេចក្តីថ្លែងការណ៍ តែសុំឲ្យមានវិធានការជាក់ស្តែង និងស្នើសុំឲ្យសហប្រធាននៃកិច្ចព្រមព្រៀងសន្តិភាពក្រុងប៉ារីសកោះប្រជុំ ដើម្បីជួយស្រោចស្រង់ស្ថានការណ៍ក្នុងប្រទេសកម្ពុជាឡើងវិញ។
កាលពីថ្ងៃទី២២ ខែតុលា ប្រជាជនខ្មែរនៅប្រទេសបារាំង និងមកពីប្រទេសអឺរ៉ុបដទៃទៀត និងមានការចូលរួមពីលោកសម រង្ស៊ីអតីតប្រធានគណបក្សប្រឆាំងផង បានទៅជួបជុំគ្នានៅទីក្រុងប៉ារីស ដើម្បីប្រារព្ធខួប២៦ឆ្នាំ នៃសន្ធិសញ្ញាសន្តិភាពក្រុងប៉ារីស ២៣តុលា។ ជាការជួបជុំ ដើម្បីទាមទារឲ្យរដ្ឋាភិបាលលោកនាយករដ្ឋមន្ត្រីហ៊ុន សែនគោរពកិច្ចព្រមព្រៀងសន្តិភាពក្រុងប៉ារីស។
ក្រៅពីគណបក្សនយោបាយទាំងពីរនេះ ក្រុមយុវជនមកពីអង្គការសង្គមស៊ីវិលក្នុងប្រទេសកម្ពុជាក៏បានប្រារព្ធខួប២៦ឆ្នាំនៃកិច្ចព្រមព្រៀងសន្តិភាពទីក្រុងប៉ារីសដែរ។ ក្រុមយុវជនបានបង្ហាញការព្រួយបារម្ភចំពោះស្ថានភាពសិទ្ធិមនុស្ស និងលទ្ធិប្រជាធិបតេយ្យកម្ពុជា និងអំពាវនាវឲ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសអនុវត្តឲ្យបានពេញលេញចំពោះកិច្ចព្រមព្រៀងនេះ។
សូមជម្រាបជូនថាកិច្ចព្រមព្រៀងក្រុងប៉ារីស ២៣ តុលា ១៩៩១ គឺធ្វើឡើង ដើម្បីបញ្ចប់សង្រ្គាមស៊ីវិលខ្មែរហើយហត្ថលេខីនៃកិច្ចព្រមព្រៀងក្រុងប៉ារីស មាន ១៨ប្រទេស + កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ