NGO៖សិទ្ធិជាមូលដ្ឋានទាំងបួនរបស់កុមារនៅកម្ពុជានៅតែមិនទាន់ពេញលេញ
នៅថ្ងៃនេះគឺជាទិវាសិទ្ធិកុមារអន្តរជាតិ ១មិថុនា ខួបលើកទី៦៨ ក្រោមប្រធានបទ " លើកកម្ពស់ការចូលរួមរបស់កុមារ ដើម្បី អភិវឌ្ឍសង្គម " ។ ជារៀងរាល់ឆ្នាំរាជរដ្ឋាភិបាលតែងតែចាត់តាំងឱ្យស្ថាប័នពាក់ព័ន្ធនានា រៀបចំមេទិ្ទញថ្នាក់ជាតិ និង កម្មវិធីកំសាន្តផ្សេងៗសម្រាប់កុមារ ដើម្បីរំលឹកដល់សិទ្ធជាមូលដ្ឋាន និងបង្ហាញពីការយកចិត្តទុកដាក់របស់រាជរដ្ឋាភិបាលក្នុងការដោះស្រាយបញ្ហាប្រឈមទាំងឡាយរបស់កុមារ។ ប៉ុន្តែទោះជាយ៉ាងនេះក្តី អង្គការដែលធ្វើការពាក់ព័ន្ធនឹងកុមារនៅកម្ពុជាមើលឃើញថា សិទ្ធិជាមូលដ្ឋានទាំងបួនរបស់កុមារនៅកម្ពុជាតែមិនទាន់ពេញលេញ។
ចុះផ្សាយនៅថ្ងៃ៖
ស្តាប់ - ០២:០២
សិទ្ធិជាមូលដ្ឋាទាំងបួននោះរួមមាន៖ សិទ្ធរស់រានមានជីវិត សិទ្ធិអភិវឌ្ឍន៍ សិទ្ធិទទួលបានការការពារ និង សិទ្ធនៅក្នុងការចូលរួម។ លោក ង៉ែត ធី ជានាយកប្រតិបត្តិ នៃ មជ្ឃមណ្ឌលកម្ពុជា ដើម្បីការពារសិទ្ធិកុមារ បានលើកឡើងថា ថ្វីត្បិតតែស្ថានភាពសិទ្ធិកុមាររយៈពេលចុងក្រោយនេះមានល្អប្រសើរបន្តិចមែន ប៉ុន្តែសព្វថ្ងៃនេះ គេនៅតែសង្កេតឃើញមានឧបសគ្គជាច្រើនដែលរាំងស្ទះដល់ការអប់រំរបស់កុមារខ្មែរ ពិសេសកុមារដែលរស់នៅតំបន់ដាច់ស្រយាល។ ឧបសគ្គរាំងស្ទះទាំងនោះ រួមមាន អំពើពុករលួយក្នុងការផ្តល់សេវាអប់រំ ការខ្វះលទ្ធភាពរបស់ក្រុមគ្រួសារ កង្វះអាហារូបត្ថម្ភ សាលារៀននៅឆ្ងាយ និងគុណភាពនៅមានកម្រិតជាដើម។
មិនត្រឹមតែប៉ុណ្ណោះពលកម្មកុមារក៏នៅតែជាបញ្ហាចម្បងសម្រាប់កម្ពុជា។ លោកបន្តថា កុមារជាច្រើនបានត្រូវគេបង្ខំឱ្យធ្វើការហួសកម្លាំង រកប្រាក់តាមរយៈការសុំទាន ការប្រើប្រាស់កុមារសម្រាប់ការរកប្រាក់តាមវិធីផ្សេងៗ និងការជួញដូរកុមារជាដើម។
យោងតាមរបាយការណ៍ ការអប់រំសម្រាប់ទាំងអស់គ្នាឆ្នាំ២០១៥ បង្ហាញឲ្យដឹងថា ចាប់តាំងពីឆ្នាំ២០០០ ដល់២០០៧ ចំនួនកុមារចុះឈ្មោះចូលរៀនថ្នាក់មត្តេយ្យ កើនឡើងជាលំដាប់ ពីជាង៦ភាគរយ ទៅជាង៣៣ភាគរយ ហើយបន្តកើនឡើងតទៀត ដល់ជាង៥៥ភាគរយ នៅឆ្នាំ២០១៣។ ក៏ប៉ុន្តែ គេសង្កេតឃើញថា ពួកកុមារទាំងនោះ បានបោះបង់ការសិក្សាចោលទៅវិញ នៅពេលដែលឡើងថ្នាក់ធំបន្តិច ដោយហេតុតែសាលានៅឆ្ងាយ និងគ្មានលទ្ធភាពរៀនតជាដើម។
លោកស្រី ញ៉េប សុភាព រដ្ឋលេខាធិការនៃអគ្គលេខាធិការដ្ឋានក្រុមប្រឹក្សាជាតិដើម្បីកុមារ
បានទទួលស្គាល់នៅអ្វីដែលអង្គការសង្គមស៊ីវិលបានលើកឡើង ប៉ុន្តែមិនទាំងស្រុងនោះទេ! ព្រោះប្រសិទ្ធិភាពដែលរដ្ឋាភិបាលបានធ្វើមានជាក់ស្តែង តួយ៉ាងដូចជាការកាត់បន្ថយអាត្រាមរណៈភាព និង ការចុះឈ្មោះចូលរៀនរបស់កុមារ មានការកើនឡើងជាលំដាប់។ តាំងតែពីពេលដែលបានចុះអនុសញ្ញាជាមួយអង្គការសហប្រជាជាតិ ស្តីពីសិទ្ធិកុមារ មក, រយៈពេល ២៥មកនេះ លោកស្រី បានលើកឡើងថា រដ្ឋាភិបាលបានចងក្រង និង ពិនិត្យលើច្បាប់ជាច្រើនដែលធ្វើយ៉ាងណាសំដៅដល់ការការពារលើកុមារ ។ ហើយទាំងអស់នេះ សឲ្យឃើញពីការយកចិត្តទុកដាក់ ដល់ការអប់រំ និងការការពារសិទ្ធិដល់កុមារនៅកម្ពុជា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ