ប្រាក់ឈ្នួលថ្មីរបស់កម្មករកាត់ដេរសម្រាប់ឆ្នាំ២០១៩ ត្រូវបានដំឡើង១៨២ដុល្លារនៅក្នុងមួយខែ
នៅទីបំផុតទៅ រដ្ឋាភិបាលកម្ពុជាបានសម្រេចកំណត់ដំឡើងប្រាក់ឈ្នួលអប្បបរមាថ្មីលើវិស័យ វាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ២០១៩ ចំនួន ១៨២ដុល្លារក្នុងមួយខែ។ ប្រាក់ឈ្នួលថ្មីនេះ នឹងចាប់ផ្តើមអនុវត្ត ពីថ្ងៃទី ១ ខែ មករា ឆ្នាំ ២០១៩ តទៅ។ ការសម្រេចដំឡើងប្រាក់ឈ្នួលគោល១៨២ដុល្លារនេះ ធ្វើឡើងបន្ទាប់ពីការចរចាត្រីភាគីអស់រយៈពេល៩លើកកន្លងទៅនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ប្រាក់ឈ្នួលថ្មីរបស់កម្មករកាត់ដេរកម្ពុជាសម្រាប់ឆ្នាំ២០១៩ ត្រូវបានដំឡើងពី១៧០ដុល្លារនៅឆ្នាំ២០១៨ ដល់១៨២ដុល្លារនៅឆ្នាំ២០១៩ខាងមុខ សម្រាប់កម្មករពេញសិទ្ធិ និង១៧៧ដុល្លារ សម្រាប់កម្មករនិយោជិតសាកល្បង។ ប្រាក់ឈ្នួលថ្មីនេះ នឹងមិនរាប់បញ្ចូលនូវប្រាក់អត្ថប្រយោជន៍ផ្សេងៗ ដែលកម្មករនិយោជិតធ្លាប់ទទួលបាននោះទេ។ លើសពីនេះ កម្មករនិយោជិតដែលទទួលបានប្រាក់ឈ្នួលគិតតាមបរិមាណផលិតផល (ដេរស៊ីបុង) ត្រូវទទួលបានប្រាក់ឈ្នួលតាមទិន្នផលជាក់ស្តែងដែលខ្លួនបានធ្វើ។ នេះបើយោងតាមប្រកាសរបស់ក្រសួងការងារនិងបណ្តុះបណ្តាលវិជ្ជាជីវៈ ស្តីពី ការកំណត់ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ ២០១៩ ចេញផ្សាយនៅថ្ងៃទី ៥ តុលា។
យោងតាមប្រកាសនេះ ដើម្បីទទួលបានការដំឡើងប្រាក់ឈ្នួលថ្មី១៨២ដុល្លារនេះ លោកនាយករដ្ឋមន្ត្រី ហ៊ុន សែន បានសម្រេចបន្ថែមទឹកប្រាក់៥ដុល្លារ លើទឹកប្រាក់១៧៧ដុល្លារដែលស្នើឡើងដោយភាគីថៅកែរោងចក្រ ខណៈភាគីសហជីពបានស្នើតួលេខ១៨២ដុល្លារ។ ប៉ុន្តែជាថ្នូនឹងការសម្រេចបន្ថែមទឹកប្រាក់៥ដុល្លារនេះ រដ្ឋាភិបាលកម្ពុជា ត្រូវជួយសម្រួលបន្ទុកថ្លៃចំណាយអគ្គិសនីរបស់ភាគីថៅកែររោងចក្រក្នុងអត្រា 0.១៤៧ ដុល្លារអាមេរិក ក្នុង១គីឡូវ៉ាត់ម៉ោង។ នេះបើយោងតាមសេចក្តីប្រកាសព័ត៌មានដាច់ដោយឡែកមួយទៀត របស់ក្រសួងការងារនិងបណ្តុះបណ្តាលវិជ្ជាជីវៈ នៅក្នុងថ្ងៃដដែលនេះ។
គួរជំរាបជូនថា ការចរចាប្រាក់ឈ្នួលថ្មីរបស់កម្មករកាត់ដេរកម្ពុជាសម្រាប់ឆ្នាំ២០១៩ ដែលបានចាប់ផ្ដើមតាំងពីខែកញ្ញា បានបិទបញ្ចប់ជាផ្លូវការហើយ នៅថ្ងៃសុក្រ ទី៥តុលា នេះ តាមរយៈកិច្ចប្រជុំលើកទី១០និងជាលើកចុងក្រោយ របស់ក្រុមការងារត្រីភាគី។ ក្រុមការងារត្រីភាគីដែលមានសមាសភាពមកពីរដ្ឋាភិបាល១៦រូប តំណាងថៅកែរោងចក្រ១៦រូប និងសហជីព ដែលជាតំណាងកម្មករនិយោជិតចំនួន១៦រូប។ ប៉ុន្តែនៅប៉ុន្មានម៉ោងមុនការសម្រេចនេះ ប្រមុខរដ្ឋាភិបាលកម្ពុជាលោក ហ៊ុន សែន បានបង្ហើបជាមុនថា ប្រាក់ឈ្នួលអប្បបរមាសម្រាប់កម្មករកាត់ដេរសម្រាប់ឆ្នាំ២០១៩ គឺមិនក្រោម១៨០ដុល្លារនោះទេ។
ប្រាក់ឈ្នួលថ្មីរបស់កម្មករកាត់ដេរកម្ពុជានេះ នឹងចាប់ផ្តើមអនុវត្តពីថ្ងៃទី ១ ខែមករា ឆ្នាំ ២០១៩ តទៅ។ នេះបើយោងតាមសេចក្តីប្រកាសព័ត៌មានរបស់ក្រសួងការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ