គ.ជ.ប ទទួលបានបណ្តឹងតិចតួច បើធៀបនឹងអាណត្តិមុនៗ
មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងនៅក្នុងសន្និសីទកាសែតព្រឹកនេះថា ដំណើរការឃោសនាបោះឆ្នោតជ្រើសរើសក្រុមប្រឹក្សា ឃុំសង្កាត់ គិតចាប់តាំងពីថ្ងៃទី២០ ឧសភា មក គ.ជ.ប បានទទួលបណ្តឹងត្រឹមតែ៣៤ប៉ុណ្ណោះ។ មន្ត្រីដដែលថាមិនមានបណ្តឹងធំដុំទេ ដោយសារតែច្បាប់តឹងរឹងជាងមុន ហើយគណបក្សនយោបាយមានភាពចាស់ទុំជាងមុន។
ចុះផ្សាយនៅថ្ងៃ៖
ស្តាប់ - ០១:៤៦
លោកកែវ ផល្លា ទីប្រឹក្សា គ.ជ.ប បានថ្លែងថាបណ្តឹងទាំង៣៤នោះ មាននៅក្នុងខេត្តបន្ទាយមានជ័យ២បណ្តឹង, បាត់ដំបង២បណ្តឹង, កំពង់ឆ្នាំង១បណ្តឹង, កំពង់ស្ពឺ១បណ្តឹង, កំពង់ធំ១១បណ្តឹង, ព្រៃវែង៤បណ្តឹង, សៀមរាប៣បណ្តឹង, ស្ទឹងត្រែង២បណ្តឹង, ស្វាយរៀង១បណ្តឹង, តាកែវ៣បណ្តឹង, និងខេត្តប៉ៃលិន៤បណ្តឹង។
ទីប្រឹក្សា គ.ជ.ប រូបនេះបញ្ជាក់ថា បណ្តឹងទាំងនោះ កើតឡើងភាគច្រើនលើរឿងហែរក្បួន ចែកចាយខិត្តប័ណ្ណ ការជេរប្រមាថ និងការមិនគោរពកាលវិភាគ។ លោកលើកឡើងថាបណ្តឹងទាំងអស់នេះ មិនធ្ងន់ធ្ងរទេ ប្រៀបធៀបនឹងអាណត្តិកន្លងទៅ ហើយបណ្តឹងទាំងអស់នេះត្រូវបានដោះស្រាយនៅត្រឹមថ្នាក់ឃុំ មានតែបណ្តឹង៣ប៉ុណ្ណោះ ត្រូវបានបញ្ជូនមកកាន់គណៈកម្មាការរៀបចំការបោះឆ្នោតប្រចាំខេត្ត។ លោកកែវ ផល្លាបញ្ជាក់ថាគណបក្សប្រជាជនកម្ពុជាបានប្តឹងចំនួន២៩បណ្តឹង ហើយគណបក្សសង្គ្រោះជាតិបានប្តឹងតែ៥បណ្តឹងប៉ុណ្ណោះ។
ទាំងលោកសុខ ឥសាន អ្នកនាំពាក្យគណបក្សកាន់អំណាច, លោកស្រីមូរ សុខហួរ អនុប្រធានគណបក្សប្រឆាំង, និងតំណាងអង្គការខុមហ្វ្រែល បានថ្លែងថា ដំណើរការនៃឃោសនាបោះឆ្នោតអាណត្តិទី៤នេះ ប្រព្រឹត្តិទៅជាវិជ្ជាមាន និងល្អប្រសើរជាងអាណត្តិកន្លងទៅ។
ប៉ុន្តែលោកស្រីមូរ សុខហួរ អនុប្រធានគណបក្សសង្គ្រោះជាតិ បានលើកឡើងថា ការពិន័យ និងច្បាប់តឹងរឹងពេក ជាក់ស្តែងដូចជាការកំណត់ចំនួនអ្នកចូលរួមក្នុងការឃោសនាបោះឆ្នោតជាដើម។ លោកស្រីបន្តថា គោលការណ៍របស់ គ.ជ.ប នៅក្នុងអាណត្តិនេះ គួរតែត្រូវបានកែប្រែនៅក្នុងអាណត្តិក្រោយៗទៀត ព្រោះប៉ះពាល់ទៅដល់គោលការណ៍នៃលទ្ធិប្រជាធិបតេយ្យ។
សូមជម្រាបជូនថា ប្រទេសកម្ពុជានឹងរៀបចំការបោះឆ្នោតជ្រើសរើស ក្រុមប្រឹក្សា ឃុំ សង្កាត់ អាណតិ្តទី ៤ នៅថ្ងៃទី ៤ ខែមិថុនាខាងមុខ មានគណបក្សនយោបាយចំនួន ១២គណបក្សនឹងចូលរួមប្រកួតប្រជែងដណ្តើមបេក្ខភាពមេឃុំ នៅក្នុងឃុំ-សង្កាត់ចំនួន ១,៦៤៦ ទូទាំង ២៥រាជធានី-ខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ