គ.ជ.ប ព្រមានចាត់ការតាមផ្លូវច្បាប់ចំពោះការស្ទង់មតិអំពីបក្សនយោបាយតាមហ្វេសប៊ុក
គណៈកម្មាធិការជាតិរៀបចំការបោះឆ្នោត(គ.ជ.ប) បានព្រមានចាត់វិធានការតាមផ្លូវច្បាប់ដល់បណ្តាម្ចាស់ទំព័រហ្វេសប៊ុកទាំងឡាយណាដែលធ្វើការស្ទង់មតិលើគណបក្សនយោបាយមួយចំនួនដែលខុសនឹងច្បាប់បោះឆ្នោត។ បើតាមគ.ជ.ប ការស្ទង់មតិបែបនេះ អាចបង្កឲ្យមហាជនមានការយល់ច្រឡំដោយសារតែលទ្ធផលបានពីការស្ទង់មតិនេះ។
ចុះផ្សាយនៅថ្ងៃ៖
ស្តាប់ - ០១:៤៥
តាមរយៈសេចក្តីអំពាវនាវរបស់ខ្លួនកាលពីថ្ងៃពុធ គណៈកម្មាធិការជាតិរៀបចំការបោះឆ្នោត(គ.ជ.ប)បានចាត់ទុកការស្ទង់មតិនៅតាមបណ្តាញសង្គមហ្វេសប៊ុកលើគណបក្សនយោបាយថា ជាការធ្វើឡើងផ្ទុយពីគោលការណ៍ច្បាប់ និងគ្មានវិជ្ជាជីវៈត្រឹមត្រូវ។ បើតាមច្បាប់បោះឆ្នោត បទបញ្ជា និងនីតិវិធីរបស់គ.ជ.ប គឺការស្ទង់មតិត្រូវគោរពតាមគោលការណ៍មួយចំនួនដូចជា ដំណើរការប្រកបដោយតម្លាភាព និងភាពមិនលម្អៀង។
ជាមួយគ្នានេះ ការស្ទង់មតិត្រូវរៀបចំឡើងដោយអង្គការឫស្ថាប័នដែលមានវិជ្ជាជីវៈ ត្រូវគោរពសិទ្ធិ សេរីភាពបុគ្គល រក្សាការសម្ងាត់នៃការបោះឆ្នោតរបស់អ្នកបោះឆ្នោត មិនបង្កឲ្យមានអសន្តិសុខ ភាពចលាចលឫការប៉ះពាល់ដល់សណ្តាប់ធ្នាប់សាធារណៈឫធ្វើឲ្យភាន់ច្រឡំក្នុងដំណើរការបោះឆ្នោត។ លើសពីនេះទៅទៀត លទ្ធផលនៃការស្ទង់មតិត្រូវបញ្ជាក់អំពីប្រភពផ្តល់ព័ត៌មាន ពេលវេលា ចំនួនប្រជាពលរដ្ឋដែលត្រូវជ្រើសរើសមកស្ទង់មតិ កម្រិតលម្អៀងនៃលទ្ធផលព្រមទាំងត្រូវផ្តល់ជូនគណបក្សនយោបាយនិងផ្សព្វផ្សាយជូនសាធារណជនស្មើភាព។
សូមបញ្ជាក់ថា ការព្រមាននិងបង្ហាញពីភាពត្រឹមត្រូវនៃការស្ទង់មតិពីគណៈកម្មាធិការជាតិរៀបចំការបោះឆ្នោត(គ.ជ.ប)នេះ គឺធ្វើឡើងបន្ទាប់ពីមានទំព័រហ្វេសប៊ុកមួយចំនួននាពេលប៉ុន្មានថ្ងៃនេះ បានធ្វើការស្ទង់មតិរបស់ខ្លួនអំពីចំនួនអ្នកគាំទ្រលើគណបក្សនយោបាយ។ គណបក្សនយោបាយដែលគេពេញនិយមធ្វើការស្ទង់មតិជាងគេ គឺគណបក្សប្រជាជនកម្ពុជា គណបក្សសង្គ្រោះជាតិ និងគណបក្សសម្ព័ន្ធដើម្បីប្រជាធិបតេយ្យ។ ក្រៅពីគណបក្សនយោបាយ ទំព័រហ្វេសប៊ុកខ្លះទៀតក៏បានធ្វើការស្ទង់មតិលើបុគ្គលដែលជាប្រធានគណបក្សនីមួយៗនោះផងដែរ។
ចំពោះបញ្ហាទាំងនេះ ក្រៅពីព្រមានចាត់វិធានការតាមផ្លូវច្បាប់ គ.ជ.ប ក៏បានអំពាវនាវឲ្យបញ្ឈប់ជាបន្ទាន់ចំពោះការស្ទង់មតិលើបណ្តាញសង្គមហ្វេសប៊ុកនេះ ដើម្បីជៀសវាងការភាន់ច្រឡំណាមួយពីសំណាក់មហាជនលើដំណើរការនៃការរៀបចំការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ