Naga 3 ឬ ហៅថារមណីយដ្ឋានកាស៊ីណូ នឹងចាប់ផ្ដើមការសាងសង់នៅចុងខែកញ្ញា ឬដើមខែតុលាខាងមុខនេះ
គម្រោង Naga 3 ឬ ហៅថា រមណីយដ្ឋានកាស៊ីណូ នឹងចាប់ផ្ដើមការសាងសង់នៅចុងខែកញ្ញា ឬដើមខែតុលា ឆ្នាំ ២០១៩ ខាងមុខនេះ ដោយគ្រោងវិនិយោគទឹកប្រាក់ប្រមាណពី ៣,៨ ទៅ ៤ពាន់លានដុល្លារអាមេរិក។ នេះបើយោងតាមសេចក្តីប្រកាសព័ត៌មានរបស់ ក្រុមហ៊ុន Naga Corp Ltd ដែលគ្រប់គ្រង NagaWorld ហើយត្រូវបានចុះផ្សាយដោយគេហទំព័រ ដែលនិយាយអំពីវិស័យឧស្សាហកម្មកាស៊ីណូនៅតំបន់អាស៊ី GGRAsia។ គួរជម្រាបជូនថា គម្រោង Naga 3 នេះត្រូវសាងសង់ លើផ្ទៃដីសរុប ១៦ ៨៣៧ ម៉ែត្រការ៉េ ស្ថិតនៅអតីតអគារ ប៊ូលឌីង ក្នុងសង្កាត់ទន្លេបាសាក់ ក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០១:៥៧
គម្រោង Naga 3 ឬ ហៅថា រមណីយដ្ឋានកាស៊ីណូនេះ មានសភាពប្លែកពី គម្រោង Naga1 និង Naga2។ ខុសគ្នាត្រង់ថា មិនមែនត្រឹមតែជាទីតាំងសម្រាប់ការលេងល្បែងប៉ុណ្ណោះទេ ប៉ុន្តែក៏រួមបញ្ចូលទាំងទីតាំងឧទ្យានកម្សាន្តផងដែរ។
Naga3 ទទួលបានអនុម័តជាគោលការណ៍ពីរដ្ឋាភិបាលកម្ពុជា ក្នុងការសាងសង់អគារ ចំនួន៥ប្លុក ដែលមានកម្ពស់ ៦៦ ជាន់។ ក្នុងនោះរួមមាន ឧទ្យានកម្សាន្ត អាងហែលទឹកលំហរអាកាស ទីតាំងសន្និសីទ ផ្សារទំនើប និង សណ្ឋាគារដែលមានបន្ទប់ជាង ៤ ៧២០ បន្ទប់ ផងដែរ។
លោក Philip Lee អនុប្រធានក្រុមហ៊ុន NagaCorp បានប្រាប់គេហទំព័រ Inside Asian Gamingថា គម្រោង Naga3 សាងសង់ឡើងមួយផ្នែកធំជាពិសេស ក៏ដើម្បីបំពេញតម្រូវការរបស់ទេសចរចិន ដែលលោករំពឹង ថានឹងមានទេសចរចិនប្រមាណ ៥លាន ៥សែន នាក់ មកទស្សនាប្រទេសកម្ពុជានៅឆ្នាំ ២០២៥។ ។ ហើយក្រៅពីនេះ វាក៏អាចឈានទៅបង្កើតនូវឱកាសការងារចំនួន ១៨ ០០០ កន្លែង។
ក្រោមអាជ្ញាប័ណ្ណកាស៊ីណូផ្តាច់មុខរបស់ខ្លួននៅភ្នំពេញ ក្រុមហ៊ុនមិនមានការរឹតត្បិតលើចំនួនតុល្បែង ម៉ាស៊ីនល្បែងអេឡិចត្រូនិក (EGMs) និង កន្លែងលេងល្បែង នោះទេ។ មានន័យថា Naga3នេះ អាចរាប់បញ្ចូលតុល្បែងរហូតដល់ ៨០០ តុនិងរហូតដល់ ២៥០០ម៉ាស៊ីនល្បែងអេឡិចត្រូនិក (EGMs)។
គួរជម្រាបជូនថា ក្រុមហ៊ុន Naga Corp Ltd ដែលគ្រប់គ្រង NagaWorld ជាកាស៊ីណូមានអាជ្ញាប័ណ្ណតែមួយគត់នៅទីក្រុងភ្នំពេញ។ Naga1 បានបើកដំណើរការនៅខែធ្នូឆ្នាំ ២០០៦ ខណៈពេល ការពង្រីកNaga២ បានបើកដំណើរការនៅខែវិច្ឆិកាឆ្នាំ ២០១៧។ បន្ទាប់មកNaga ទំាងពីរបានតភ្ជាប់គ្នា តាមរយៈផ្សារទំនើបក្រោមដី ដែលមានឈ្មោះថា NagaCity Walk។
ដោយឡែក តាមរយៈសេចក្តីប្រកាសព័ត៌មានរបស់ខ្លួន ដែលផ្សព្វផ្សាយកាលពីពេលថ្មីៗនេះ ក្រុមហ៊ុន Naga Corp រកចំណូលបាន ៣២១,២ លានដុល្លារ ក្នុងត្រីមាសទី ១ នៃឆ្នាំ ២០១៩ ពោលគឺកើនឡើង ៣២ ភាគរយបើធៀបនឹងត្រីមាសទី១ ក្នុងឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ