លោកស្រីរ៉ូណា ស្មីតចោទសួរពី“ភាពជឿជាក់”នៃការឈ្នះឆ្នោតភ្លូកទឹកភ្លូកដីរបស់CPPនៅចំពោះក្រុមប្រឹក្សាសិទ្ធិមនុស្សUN
លោកស្រីរ៉ូណា ស្មីត (Rhona Smith) អ្នករាយការណ៍ពិសេសស្តីពីស្ថានភាពសិទ្ធិមនុស្សនៅកម្ពុជាកាលពីរសៀលថ្ងៃទី២៦ កញ្ញាម្សិលមិញនេះ បានចោទសួរពី“ភាពជឿជាក់”នៃការបោះឆ្នោតជាតិកម្ពុជាដែលបក្សកាន់អំណាចបានឈ្នះអាសនៈទាំងអស់ក្នុងរដ្ឋសភានៅចំពោះមុខក្រុមប្រឹក្សាសិទ្ធិមនុស្សនៃអង្គការសហប្រជាជាតិ។ ជាមួយនឹងការចោទសួរនេះ លោកស្រីរ៉ូណា ស្មីត ក៏បានប្រាប់ទៅក្រុមប្រឹក្សាសិទ្ធិមនុស្សថា មានភាពមិនប្រក្រតីខ្លះនៅមុនការបោះឆ្នោតកើតឡើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
“ភាពត្រឹមត្រូវដែលអាចជឿជាក់បាន”នៃការឈ្នះការបោះឆ្នោតភ្លូកទឹកភ្លូកដីរបស់គណបក្សប្រជាជនកម្ពុជា គឺជាសំណួរដែលលោកស្រីរ៉ូណា ស្មីត (Rhona Smith) បានលើកឡើងនៅចំពោះមុខក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។ លោកស្រីរ៉ូណា ស្មីត (Rhona Smith) បានរៀបរាប់ប្រាប់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិថា មុនការបោះឆ្នោតជាតិកម្ពុជា ដំណើរការបោះឆ្នោតត្រូវបានធ្វើឲ្យល្អឡើងជាលំដាប់ដែលគោរពទៅតាមស្តង់ដារសិទ្ធិមនុស្សអន្តរជាតិ និងច្បាប់នានារបស់កម្ពុជា។ ប៉ុន្តែនៅក្នុងរបាយការណ៍ដែលបញ្ជូនមកកាន់ក្រុមប្រឹក្សាសិទ្ធិមនុស្ស លោកស្រីរ៉ូណា ស្មីតបានអះអាងថា ការរំលាយគណបក្សប្រឆាំងធំបំផុត និងការហាមឃាត់មន្ត្រីជាន់ខ្ពស់បក្សនេះមិនឲ្យធ្វើនយោបាយ៥ឆ្នាំ បានក្លាយជាសំណួរដែលចោទសួរពីភាពជឿជាក់នៃការបោះឆ្នោតនេះ។
លោកស្រីរ៉ូណា ស្មីត បានអះអាងទៀតថា ការប្រើប្រាស់ច្បាប់ ដើម្បីរឹតបន្តឹងការប្រកួតប្រជែង និង សំដៅទៅលើប្រព័ន្ធផ្សព្វផ្សាយ គូបដិបក្ខនយោបាយ អង្គការសង្គមស៊ីវិល និងបុគ្គលនានា រួមបញ្ចូលទាំងការចោទប្រកាន់ពីបទឧក្រិដ្ឋផងនោះ បានបង្រួមបរិយាកាសសម្រាប់ការប្រកួតប្រជែងនយោបាយនៅក្នុងប្រទេសកម្ពុជា។ លោកស្រីបានសង្កត់ធ្ងន់ថា ការប្រកួតប្រជែងនយោបាយពហុបក្ស សំខាន់ណាស់ក្នុងការធានាបាននូវភាពជឿជាក់នៅក្នុងការបោះឆ្នោត។ បន្ថែមលើនេះ លោកស្រីរ៉ូណា ស្មីត ក៏បានលើកឡើងពីការព្រួយបារម្ភពីការបំភិតបំភ័យ និងគំរាមកំហែងដល់អ្នកបោះឆ្នោត បន្ទាប់ពីមានការអំពាវនាវកុំអោយពលរដ្ឋទៅបោះឆ្នោតផងដែរ។
ក្រោយពីលទ្ធផលបោះឆ្នោតបង្ហាញថា គណបក្សប្រជាជនកម្ពុជាបានឈ្នះការបោះឆ្នោតនោះ សមាជិកបក្សប្រឆាំងមួយចំនួន និងសមាជិកសង្គមស៊ីវិលត្រូវបានដោះលែង ហើយខ្លះក្នុងចំណោមនេះ ត្រូវបានលើកលែងទោស។ ក្នុងនោះ លោកកឹម សុខា ប្រធានអតីតគណបក្សសង្រ្គោះជាតិក៏ត្រូវបានប្តូរពីការឃុំនៅពន្ធនាគារមកឃុំនៅក្នុងផ្ទះវិញផងដែរ។ ប៉ុន្តែពួកគេទាំងនេះ ត្រូវបានដាក់ស្ថិតនៅក្រោមការឃ្លាំមើលពីសំណាក់តុលាការ។ នេះបើតាមការកត់សម្គាល់ពីលោកស្រីរ៉ូណា ស្មីត។
ក្រៅពីបញ្ហានេះ លោកស្រីរ៉ូណា ស្មីត ក៏មិនភ្លេចលើកឡើងពីការដោះលែងមន្រ្តី និងអតីតមន្ត្រីសមាគមការពារសិទ្ធិមនុស្សអាដហុកចំនួន៥នាក់ផងដែរ។ អ្នកទាំង៥នាក់នេះ បើទោះបីដោះលែងនៅក្រៅឃុំ ប៉ុន្តែចុងក្រោយតុលាការនៅតែកាត់ឲ្យពូកគេមានទោស តែត្រូវព្យួរវិញ។ ចំពោះបញ្ហានេះ លោកស្រីរ៉ូណា ស្មីតបានអំពាវនាវឲ្យរដ្ឋាភិបាលកម្ពុជា បង្កើតនូវបរិយាកាសល្អសម្រាប់អង្គការសង្គមស៊ីវិលនានានៅកម្ពុជា។ យ៉ាងណាក៏ដោយ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ មិនទាន់បង្ហាញការយល់ឃើញ ឬការសម្រេចណាមួយ ឆ្លើយតបនឹងការលើកឡើងទាំងអម្បាលម៉ានរបស់លោកស្រីរ៉ូណា ស្មីតនេះនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ