ក្រសួងបរិស្ថាន អំពាវនាវឲ្យមន្រ្តីឧទ្យានុរក្សបង្កើនការថែរក្សាសុខភាព ក្រោយមន្រ្តីពីររូបស្លាប់ ដោយសារជម្ងឺឆ្លង
ក្រសួងបរិស្ថាន នៅថ្ងៃនេះ បានណែនាំមន្រ្តីឧទ្យានុរក្សដែលកំពុងបំពេញភារកិច្ចនៅតាមតំបន់ការពារធម្មជាតិទាំងអស់ ឲ្យបង្កើនការប្រុងប្រយ័ត្នខ្ពស់ ដោយកុំបរិភោគសាច់សត្វដែលចម្អិនមិនបានឆ្អិនល្អ និងប្រុងប្រយ័ត្នពីការយាយីពីសត្វចម្លងជម្ងឺនានា។ សេចក្តីណែនាំរបស់ក្រសួងបរិស្ថាននាពេលនេះ ធ្វើឡើង ក្រោយមានករណីផ្ទុះឡើងជម្ងឺហើមសាច់ដុំ និងជម្ងឺគ្រុនចាញ់ ដែលបានបណ្តាលឲ្យមន្រ្តីពីរនាក់ បាត់បង់ជីវិត។
ចុះផ្សាយនៅថ្ងៃ៖
ស្តាប់ - ០១:៤២
បើតាមសេចក្តីណែនាំរបស់ក្រសួងបរិស្ថាន ចុះថ្ងៃទី២២ កញ្ញា ករណីផ្ទុះឡើងនូវជម្ងឺហើមសាច់ដុំ (ហើមដៃ ជើងនិងបំពង់ក) បណ្តាលឲ្យមន្រ្តីឧទ្យានុរក្សចំនួន១៣ នាក់ ប្រចាំការនៅដែនជម្រកសត្វព្រៃ «ព្រៃឡង់» ដែលស្ថិតនៅភូមិសាស្រ្តខេត្តកំពង់ធំ ត្រូវបានបញ្ជូនទៅកាន់មន្ទីរពេទ្យនៅរាជធានីភ្នំពេញ។ ក្នុងនោះមានមន្រ្តីឧទ្យានុរក្សម្នាក់បានទទួលមរណៈភាព កាលពីថ្ងៃទី ២១ កញ្ញា។ ក្រសួងបរិស្ថាន អះអាងថា ជម្ងឺហើមសាច់ដុំនេះ ក៏បាននិងកំពុងយាយីដល់អាយុជីវិតរបស់ប្រជាជនមួយចំនួនផ្សេងទៀតនៅក្នុងតំបន់ព្រៃឡង់ផងដែរ។
តាមរយៈការសង្កេត និងការសន្និដ្ឋានបឋមរបស់គ្រូពេទ្យជំនាញ ជម្ងឺហើមសាច់ដុំនេះ បង្កឡើងដោយប្រភេទប៉ារ៉ាស៊ីតម្យ៉ាង ឆ្លងចូលទៅក្នុងខ្លួនមនុស្សតាមរយៈការបរិភាគសាច់សត្វ ដែលមិនចម្អិនល្អ រួមទាំងការប្រើប្រាស់ទឹកតាមដងអូរក្នុងព្រៃ ហើយប៉ារ៉ាស៊ីតដ៏កាចសាហាវនេះ កំពុងមានវត្តមាននៅក្នុងតំបន់ព្រៃឡង់។
ព្រមជាមួយគ្នានេះ ក្រសួងបរិស្ថានក៏បានក្រើនរំឮកឲ្យមន្រ្តីក្រោមឱវាទក្រសួងទាំងអស់ ជាពិសេសមន្រ្តីឧទ្យានុរក្ស ឲ្យប្រុងប្រយ័ត្នចំពោះការផ្ទុះឡើងនូវករណីជម្ងឺគ្រុនចាញ់ផងដែរ បន្ទាប់ពីមន្រ្តីឧទ្យានុរក្សនៅខេត្តស្ទឹងត្រែង។
ឆ្លើយតបនឹងបញ្ហានេះ ក្រសួងបរិស្ថាន អំពាវនាវឲ្យគ្រប់ប្រធានមន្ទីរបរិស្ថាន ឲ្យចាត់វិធានការជាបន្ទាន់ក្នុងការជួយដល់ការការពារ និងការថែរក្សាសុខភាព និងសុវត្ថិភាពមន្រ្តីរាជការក្រោមឱវាទរបស់ខ្លួន រួមទាំងវិធានការការពារគ្រោះថ្នាក់ចរាចរ។ ចំពោះមន្រ្តីឧទ្យានុរក្ស ដែលកំពុងប្រចាំការបំពេញភារកិច្ចនៅតំបន់ការពារធម្មជាតិ ក្រសួងបរិស្ថានបានអំពាវនាវឲ្យពួកគាត់ កុំបរិភោគសាច់សត្វដែលចម្អិនមិនបានឆ្អិនល្អ ត្រូវបរិភោគ ទឹកដាំពុះដែលធានាថានឹងមានសុវត្ថិភាព និងត្រូវប្រុងប្រយ័ត្នពីការយាយីពីសត្វចម្លងជម្ងឺនានា ជាពិសេសមូសដែកគោល ដែលបង្កឲ្យកើតមានជម្ងឺគ្រុនចាញ់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ