ក្រសួងបរិស្ថានសរសើរចំណាត់ការរបស់សមត្ថកិច្ច ឃាត់ខ្លួនជនសង្ស័យ៦នាក់ បាញ់សម្លាប់អ្នកការពារព្រៃឈើ
ក្រសួងបរិស្ថាន នៅថ្ងៃទី ៥ កុម្ភៈ នេះ បានចេញសេចក្តីថ្លែងការណ៍មួយ ដោយបានកើតសរសើរចំពោះចំណាត់ការប្រកបដោយប្រសិទ្ធភាពរបស់កងកម្លាំងមានសមត្ថកិច្ចកម្ពុជា ក្នុងប្រតិបត្តិការស៊ើបអង្កេត និងឈានទៅចាប់ខ្លួនជនសង្ស័យបាន៦នាក់ ករណីបាញ់សម្លាប់អ្នកអភិរក្សធនធានធម្មជាតិ៣រូប កាលពីសប្តាហ៍មុន។ បច្ចុប្បន្ន ជនសង្ស័យទាំង៦នាក់ដែលមានម្នាក់ គឺជានាយនគរបាលប៉ុស្ដិ៍អូររលែ នៃវរការពារព្រំដែនលេខ ៦២១ នៃស្នងការដ្ឋាននគរបាលខេត្តមណ្ឌលគិរី និងជាជនដៃដល់ផង កំពុងស្ថិតនៅក្រោមការសាកសួររបស់តុលារការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
សេចក្តីថ្លែងការណ៍របស់ក្រសួងបរិស្ថាន បានធ្លាក់មកនៅប៉ុន្មានម៉ោងក្រោយពីកងកម្លាំងសមត្ថកិច្ចពាក់ព័ន្ធ បានឃាត់ខ្លួនជនសង្ស័យបាន៦នាក់ ដែលជាប់ពាក់ព័ន្ធនឹងករណីពួនស្ទាក់ និងបាញ់សម្លាប់អ្នកអភិរក្សធនធានធម្មជាតិ៣រូប កាលពីថ្ងៃទី ៣០ មករា កន្លងទៅ។ តាមតុល្យការចុងក្រោយ សមត្ថកិច្ចបានឃាត់ខ្លួនជនល្មើសចំនួន៦រូប គឺឈ្មោះ ផល ពេញ ជាជនដៃដល់ និងជានាយនគរបាលប៉ុស្ដិ៍អូររលែ នៃវរការពារព្រំដែនលេខ ៦២១ នៃស្នងការដ្ឋាននគរបាលខេត្តមណ្ឌលគិរី និង៥នាក់ទៀតជាអ្នកចូលរួមពាក់ព័ន្ធរួមមាន ឈ្មោះ កើត វេហា ឈាង វ៉ាននិត កើត វេត្តា ឡាយ សាវី និង ទន ធារ៉ា ដែលត្រូវបានសមត្ថកិច្ចចាប់ខ្លួន សាកសួរ និងបញ្ជូនសំណុំរឿងទៅសាលាដំបូងខេត្តមណ្ឌលគីរី ដើម្បីបន្តនីតិវិធីច្បាប់ស្វែងរកយុត្តិធម៌ជូនដល់ជនរងគ្រោះ។
គួរជំរាបជូនថា ជនរងគ្រោះទាំង៣នាក់ រួមមាន៖ លោក តើន សុខណៃ មន្ដ្រីឧទ្យានុរក្សនៃមន្ទីរបរិស្ថានខេត្តមណ្ឌលគិរី មន្ដ្រីអាវុធហត្ថលើផ្ទៃប្រទេសលោក សេក វឌ្ឍនា និងបុគ្គលិកអង្គការសមាគម អភិរក្សសត្វព្រៃ Wildlife Conservation Society (WCS) លោក ធុល ខ្នា ត្រូវបានជនសង្ស័យទាំង៦នាក់ ពួនស្ទាក់បាញ់សម្លាប់ កាលពីរសៀល ថ្ងៃទី ៣០ ខែមករានៅត្រង់ ចំណុចប៉ុស្ដិ៍អូររលែ ឃុំសែនមនោរម្យ ស្រុកអូររាំង ខេត្តមណ្ឌលគិរី។ មូលហេតុនៃការបាញ់សម្លាប់នេះ ត្រូវបានគេអះអាងថា គឺដោយសារតែការទាស់សំដីគ្នា ករណីបទល្មើសព្រៃឈើ ដោយសារតែជនជាតិវៀតណាម បានចូលមកកាប់ឈើនៅក្នុងទឹកដីខ្មែរ។
ទោះបីជាយ៉ាងណាក៏ដោយ នៅក្នុងសេចក្តីថ្លែងការណ៍នៅថ្ងៃនេះ ក្រសួងបរិស្ថាន បានសំដែងការសោកស្តាយយ៉ាងខ្លាំង ចំពោះការបាត់បង់វរជនការពារនិងអភិរក្សធនធានធម្មជាតិទាំងបីរូប និងបានវាយតម្លៃខ្ពស់ចំពោះការលះបង់ដ៏ថ្លៃថ្លារបស់ពួកគេ ដែលមិនអាចកាត់ថ្លៃបាន។ ហើយដើម្បីជាការផ្តល់កិត្តិយស ក្រសួងបរិស្ថាន ក៏បានបំពាក់គ្រឿងឥស្សរិយយសបច្ឆាមរណៈ ដល់មន្រ្តីអភិរក្សធនធានធម្មជាតិទាំង៣រូបផងដែរ។
សូមបញ្ជាក់ថា នេះគឺជាករណីលើកទី១ហើយសម្រាប់ឆ្នាំ២០១៨នេះ ដែលកើតមានករណីបាញ់ប្រហារទៅលើអ្នកការពារនិងអភិរក្សព្រៃឈើនៅក្នុងប្រទេសកម្ពុជា បន្ទាប់ពីករណីបាញ់សម្លាប់លោក ឈុត វុទ្ធី អ្នកកាពារព្រៃឈើដ៏សកម្មនៅក្នុងខេត្តកោះកុងកាលពីឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ