រដ្ឋមន្ត្រីក្រសួងពាណិជ្ជកម្មស្នើសុំលោកនាយករដ្ឋមន្ត្រី ពិចារណារឿងបញ្ចុះបញ្ចូលសមាជិកសហភាពអឺរ៉ុប
លោករដ្ឋមន្ត្រីក្រសួងពាណិជ្ជកម្មកម្ពុជាបានលើកឡើងតាមរយៈលិខិត កាលពីថ្ងៃទី៤ខែធ្នូថា ដើម្បីទប់ស្កាត់ការសម្រេចព្យួរសម្បទានពន្ធគយលើគ្រប់មុខទំនិញ ដោយសភាអឺរ៉ុបជាយថាហេតុ កម្ពុជាគួរបញ្ចុះបញ្ចូល (lobby) បណ្តាប្រទេសជាមិត្ត ដែលជាសមាជិកសហភាពអឺរ៉ុប តាមរយៈការទូត និងពាណិជ្ជកម្ម។ ការស្នើបែបនេះ ធ្វើឡើងមុនពេលកម្ពុជាទទួលការព្រមានព្យួរពន្ធនៃការនាំចូលទំនិញទៅសហភាពអឺរ៉ុប ជុំវិញស្ថានការនយោបាយចុងក្រោយរបស់កម្ពុជា។
ចុះផ្សាយនៅថ្ងៃ៖
ក្នុងលិខិតដដែល លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានបន្តថា ការបញ្ចុះបញ្ចូល បណ្តាប្រទេសជាមិត្ត ដែលជាសមាជិកសហភាពអឺរ៉ុប តាមរយៈបណ្តាញការទូត និងពាណិជ្ជកម្ម ព្រោះសហភាពអឺរ៉ុបច្រើនមានភាពទន់ភ្លន់ និងយោគយល់ដល់ស្ថានការណ៍របស់កម្ពុជា។
ការថ្លែងរបស់លោក ប៉ាន សូរស័ក្តិ ធ្វើឡើងក្នុងលិខិតសង្ខេបរបាយការណ៍ស្តីពីការនាំចេញទៅសហភាពអឺរ៉ុប និងសហរដ្ឋអាមេរិក ក្រោមប្រព័ន្ធអនុគ្រោះពាណិជ្ជកម្ម ដែលបានជម្រាបទៅលោកនាយករដ្ឋមន្ត្រីហ៊ុន សែន កាលពីដើមខែធ្នូ កន្លងទៅនេះ។ នេះបើតាមលោក ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជា នៅថ្ងៃទី១៨ ខែធ្នូ។
ក្នុងលិខិត២ទំព័រនោះ លោក ប៉ាន សូរស័ក្តិបានប្រាប់លោកនាយករដ្ឋមន្ត្រី ហ៊ុន សែន ថា ប្រសិនបើជាសហរដ្ឋអាមេរិក តម្រូវឲ្យកម្ពុជាបង់ពន្ធនាំចូលនោះ ប្រាប់ពន្ធដែលត្រូវបង់មានបរិមាណតិចតួច គឺ១០លានដុល្លារអាមេរិកប៉ុណ្ណោះ ព្រោះការនាំចេញរបស់កម្ពុជាទៅកាន់ទីផ្សារអាមេរិកបានបង់ពន្ធស្ទើរតែទាំងស្រុងទៅហើយ។ លោកបន្តថា ប្រសិនបើសហភាពអឺរ៉ុបតម្រូវឲ្យកម្ពុជាបង់ពន្ធនាំចូលនោះ ប្រាប់ពន្ធដែលត្រូវបង់គិតជាមធ្យម មានរហូតដល់ ៦៧៦លានដុល្លារអាមេរិក ក្នុងមួយឆ្នាំ ដែលផលិតកម្មទំនិញនាំចេញទាំងនេះប្រើប្រាស់កម្មករប្រមាណ៤០ម៉ឺននាក់។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានបញ្ជាក់ប្រាប់វិទ្យុបារាំងថា ប្រសិនបើមានការដកការអនុគ្រោះពន្ធនាំចូលលើគ្រប់មុខទំនិញ(EBA)ដោយសហភាពអឺរ៉ុប នោះកម្ពុជានឹងខាតលុយប្រមាណជាង៦០០លានដុល្លារអាមេរិក ដូច្នេះកម្ពុជាគួរតែទៅពន្យល់ប្រទេសទាំងនោះពីស្ថានភាពរបស់ប្រទេសកម្ពុជា និងតម្រូវការរបស់ប្រជាពលរដ្ឋកម្ពុជា។
លោកច័ន្ទ សុផល នាយកមជ្ឈមណ្ឌលសិក្សាគោលនយោបាយ និងអ្នកវិភាគសេដ្ឋកិច្ចកម្ពុជា ធ្លាប់បានថ្លែងប្រាប់វិទ្យុបារាំងកាលពីថ្ងៃទី១៦ ខែធ្នូថា ប្រសិនបើការព្យួរប្រព័ន្ធអនុគ្រោះពន្ធនោះកើតឡើងមែន នោះមុខទំនិញរបស់កម្ពុជាមួយចំនូនអាចនឹងបាត់បង់ទីផ្សារនៅក្នុងតំបន់អឺរ៉ុប ដោយសារតែគេនឹងងាកទៅទិញទំនិញពីប្រទេសផ្សេងដែលមិនមានការបង់ពន្ធជំនួសវិញ។ តែលោក ច័ន្ទ សុផល បញ្ជាក់ថា នេះគឺគ្រាន់តែជាសំណូមពររបស់សភាអឺរ៉ុបប៉ុណ្ណោះ មិនមែនជាចំណាត់ការរបស់ប្រទេសជាសមាជិកឡើយ។
សូមជម្រាបជូនថា កាលពីថ្ងៃទី១៣ ខែធ្នូ សភាអឺរ៉ុបបានលើកឡើងថា សិទ្ធិមនុស្សជាមូលដ្ឋាន គឺជាតម្រូវការចាំបាច់សម្រាប់កម្ពុជាក្នុងការបន្តទទួលបានផលប្រយោជន៍ពីប្រព័ន្ធអនុគ្រោះពន្ធរបស់សហភាពអឺរ៉ុប។ សម្រាប់សភាអឺរ៉ុប ប្រសិនបើកម្ពុជាធ្វើសកម្មភាពបំពាននឹងកាតព្វកិច្ចរបស់ខ្លួន នោះប្រព័ន្ធអនុគ្រោះពន្ធនឹងត្រូវព្យួរជាបណ្តោះអាសន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ