ក្រសួងធនធានទឹកប្រាប់ឲ្យប្រជាពលរដ្ឋត្រៀមលក្ខណៈសម្រាប់រដូវវស្សាឆ្នាំថ្មី
នៅដើមរដូវវស្សាឆ្នាំនេះ នឹងមានរបាយទឹកភ្លៀងល្អ ប៉ុន្តែនៅពាក់កណ្តាលរដូវអាចនឹងមានកូនរដូវប្រាំងមួយ។ នេះបើតាមក្រសួងធនធានទឹក។ ដោយហេតុនេះ ការផលិតស្រូវស្រាល គឺមិនសូវប្រឈមនឹងបញ្ហាគ្រោះរាំងស្ងួតទេ។ ទន្ទឹមគ្នានេះ ក្រសួងក៏បានអំពាវនាវឲ្យមានការប្រុងប្រយ័ត្នចំពោះ បាតុភូតរន្ទះ និងខ្យល់កន្ត្រាក់ ដែលអាចនឹងកើតមានឡើងច្រើននៅដើមរដូវវស្សានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
លោកចាន់ យុត្ថាអ្នកនាំពាក្យក្រសួងធនធានបានឲ្យដឹងថា នៅដើមរដូវវស្សានេះ មានរបាយទឹកភ្លៀងល្អ ប្រសើរ ហើយនៅពាក់កណ្តាលរដូវអាចមានភាពរអាក់រអួលខ្លះ ជាពិសេសក្នុងសប្តាហ៍ទី៣ និងសប្តាហ៍ទី៤ នៃខែកក្កដា ប៉ុន្តែភាពរអាក់រអួលនោះមិនគ្រប់ដណ្តប់ក្នុងក្របខ័ណ្ឌទូទាំងប្រទេសទេ ពោលគឺកើតឡើងតែក្នុងតំបន់មួយចំនួននៃខេត្តកំពត តាកែវ ស្វាយរៀង មួយផ្នែកនៃខេត្តកណ្តាល និងតំបន់ផ្នែកខាងក្រោយនៃជួរភ្នំក្រវាញ។ លោកបន្ថែមថានៅចុងរដូវវស្សារបាយទឹកភ្លៀងនឹងបន្តធ្លាក់រាយប៉ាយបានល្អឡើងវិញ។
អ្នកនាំពាក្យរូបនេះ បានលើកឡើងថា បើប្រជាពលរដ្ឋធ្វើស្រូវស្រាល គឺមិនសូវប្រឈមនឹងគ្រោះរាំងស្ងួតទេ ប៉ុន្តែបើប្រជាកសិករធ្វើពូជស្រូវធ្ងន់ នោះអាចនឹងជួបគ្រោះរាំងស្ងួត ដែលទាមទារឲ្យមានការអន្តរាគមបន្ថែម។ ចំពោះបញ្ហាទឹកជំនន់វិញ អ្នកនាំពាក្យរូបនេះក៏បានបង្ហាញការព្រួយបារម្ភដែរ ប្រសិនបើមានភ្លៀងធ្លាក់គំហុកខ្លាំង ជាពិសេសនៅក្នុងតំបន់ទំនាបកណ្តាល។
បើតាមសេចក្តីជូនដំណឹងរបស់ក្រសួងធនធានទឹក រដូវវស្សាក្នុងប្រទេសកម្ពុជាបានចូលមកដល់ចាប់តាំងពីថ្ងៃទី០៦ ខែឧសភា ហើយភ្លៀងក៏ចាប់ផ្តើមធ្លាក់រាយប៉ាយពីបង្គួរទៅច្រើន ក្នុងក្របខ័ណ្ឌស្ទើរទូទាំងប្រទេស។ ក្រសួងធនធានទឹកក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់បំផុត ចំពោះបាតុភូតរន្ទះ និងខ្យល់កន្ត្រាក់ ដែលអាចនឹងបន្តកើតមានញឹកញាប់នៅដើមរដូវវស្សានេះ។
លោក កែវ វី អ្នកនាំពាក្យនៃគណៈកម្មាធិការជាតិគ្រប់គ្រងគ្រោះមហន្តរាយវិញ បានប្រាប់វិទ្យុបារាំងអន្តរជាតិនៅថ្ងៃទី០៧ ខែឧសភា ថា នៅក្នុងរយៈពេល៤ខែដើមឆ្នាំ២០១៧នេះ មានខ្យល់ព្យុះបានកើតឡើងប្រមាណ៧៩លើក ក្នុងរាជធានីខេត្តចំនួន១៨ បណ្តាលឲ្យមនុស្សស្លាប់២នាក់ និងរងរបួស១៨នាក់។ ចំណែកឯករណីរន្ទះវិញ បណ្តាលឲ្យមនុស្សស្លាប់២១នាក់ របួស២៦នាក់ ងាប់គោក្របី៣០ក្បាល។
អ្នកនាំពាក្យគណៈកម្មាធិការជាតិគ្រប់គ្រងមហន្តរាយបានបន្ថែមថាក្នុងរយៈពេលមួយសប្តាហ៍ចុងក្រោយនេះវិញ មានករណីខ្យល់ព្យុះកើតឡើងប្រមាណ១៣លើក និងមានមនុស្សរបួស១០នាក់។ ចំណែកឯករណីរន្ទះបណ្តាលឲ្យមនុស្សស្លាប់៦នាក់ របួស៧នាក់ និងងាប់គោក្របី១៧ក្បាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ