ប្រមុខកាទូតខ្មែរធានានៅចំពោះមុខប្រតិភូអឺរ៉ុបថា នឹងខិតខំធ្វើអ្វីគ្រប់យ៉ាងដើម្បីរក្សាEBA
រដ្ឋមន្ដ្រីក្រសួងការបរទេសកម្ពុជា នៅថ្ងៃទី៦មិថុនានេះ បានទទួលជួបគណៈប្រតិភូសហភាពអឺរ៉ុប ដែលជាថ្ងៃទី៣ នៃដំណើការស្វែងរកការពិតរបស់ពួកគេ ដើម្បីសង្គ្រោះការដកប្រព័ន្ធអនុគ្រោះពន្ធ EBA ។ នៅក្នុងជំនួបនោះពេញមួយព្រឹកនេះ ប្រមុខការទូតកម្ពុជា បានធានានៅចំពោះមុខប្រតិភូអឺរ៉ុបថា នឹងខិតខំធ្វើអ្វីគ្រប់យ៉ាងដើម្បីរក្សា EBA ។
ចុះផ្សាយនៅថ្ងៃ៖
ស្តាប់
បើទោះជា រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានធានានៅចំពោះមុខ គណៈប្រតិភូអឺរ៉ុបថា នឹងធ្វើអ្វីគ្រប់យ៉ាងដើម្បីរក្សាប្រព័ន្ធអនុគ្រោះពន្ធEBA បែបនេះក្ដី តែកិច្ចប្រឹងប្រែងរបស់កម្ពុជាទាំងមូល មិនអាចដើរឲ្យហួសពីបន្ទាត់ក្រហមបានឡើយ។ បន្ទាត់ក្រហមដែលកម្ពុជាគូរទុកសម្រាប់ដើរ ដែលជាលក្ខខណ្ឌចរចាជាមួយអឺរ៉ុប ដើម្បីរក្សាប្រព័ន្ធអនុគ្រោះពន្ធEBA គឺមិនយកអធិបតេយ្យភាពរបស់ខ្លួនទៅប្ដូរជាមួយ EBA ឡើយ។ នេះជាជំហរចាស់របស់កម្ពុជា តែត្រូវបានលើកយកមកបញ្ជាក់ជាថ្មី នៅក្នុងជំនួបរវាង លោក ប្រាក់ សុខុន និងលោក Jean-Christophe Belliard អគ្គលេខាធិការរង នៃមន្ទីរការបរទេសសហភាពអឺរ៉ុប ដែលលទ្ធផលនៃជំនួបត្រូវបានបញ្ជាក់ដោយ កេត សោផាន់ អ្នកនាំពាក្យក្រសួងការបទេសកម្ពុជា។
សម្រាប់កម្ពុជា តាមរយៈរដ្ឋមន្ត្រីក្រសួងការបរទេស EBA បានផ្ដល់ការងារឲ្យកម្មករកម្មការិនីខ្មែរប្រមាណ៧០ម៉ឺននាក់ ខណៈអ្នកទទួលបានផលប្រយោជន៍ពី EBA មានចំនួនប្រមាណជាជិត២លាននាក់។ ដូច្នេះហើយទើបកម្ពុជានៅតែបេ្ដជ្ញាស្វែងរកដំណោះស្រាយ ដោយមានការឯកភាពពីគណៈប្រតិភូអឺរ៉ុបផងនោះ រួមគ្នាស្វែងរកដំណោះស្រាយរក្សា EBA ក្នុងស្មារតីនៃការគោរពគ្នា។ សូមជម្រាបថា នេះគឺជាដំណើរទស្សនកិច្ចស្វែងរកការពិតលើកទីពីរ របស់សហភាពអឺរ៉ុបនៅកម្ពុជា។
ដំណាលគ្នានឹងដំណើរស្វែងរកការពិតពីគណៈប្រតិភូរបស់សហភាពអឺរ៉ុប ការិយាល័យឧបការីតំណាងពាណិជ្ជកម្មអាមេរិក ក៏បានជាមួយក្រសួងពាណិជ្ជកម្មកម្ពុជា កាលពីថ្ងៃទី៥មិថុនា ដែលជំនួបនោះផ្ដោតលើកម្មវិធីអនុគ្រោះពន្ធ (GSP) របស់សហរដ្ឋអាមេរិក។ មែនទែនទៅ GSP ក៏ត្រូវបានសមាជិកព្រឹទ្ធសភាអាមេរិកមួយចំនួនប្រកាសចូលរួមជាមួយអឺរ៉ុបដែរ ដើម្បីឈានទៅកាន់ផ្ដាច់ប្រព័ន្ធនេះ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្ដិ ទទួលស្គាល់នៅចំពោះមុខភាគីអាមេរិកថា GSP ធ្វើឲ្យការនាំចេញផលិតផលកម្ពុជាទៅអាមេរិកកើនឡើងជាលំដាប់។ ជាក់ស្ដែងក្នុងឆ្នាំ២០១៨ ផលិតផលកាបូបធ្វើដំណើរបាននាំទៅអាមេរិក ក្នុងទំហំទឹកប្រាក់ជិត៥០០លានដុល្លារអាមេរិក។ លើសពីនេះទៀត ការផ្ដល់ការអនុគ្រោះពន្ធគយនេះ ក៏បានទាក់ទាញវិនិយោគិនអាមេរិកដែរ។ ជាក់ស្ដែងក្រុមហ៊ុនផលិតកាបូបប្រណិតម៉ាក Tumi។
ចំណែកភាគីអាមេរិក បានសង្កត់ធ្ងន់ថា កម្ពុជាជាប្រទេសទី៨ ដែលទទួលបានប្រយោជន៍ដ៏ធំពីកម្មវិធី GSP ក្នុងវិស័យកាត់ដេរ ស្បែកជើង និងកាបូបនៅកម្ពុជា។ គួរជម្រាបជូនថា ប្រព័ន្ធអនុគ្រោះពន្ធរបស់អាមេរិកសម្រាប់កម្ពុជា មានសុពលភាពចាប់ពីថ្ងៃទី០១មករាឆ្នាំ២០១៨ រហូតដល់ថ្ងៃទី៣១ ខែធ្នូ ឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ