ក្រសួងបរិស្ថានស្នើឲ្យម្ចាស់បុរី និងខុនដូ ពង្រឹងនិងគោរពបទដ្ឋានបរិស្ថានជាចំបង ក្នុងការសាងសង់
រដ្ឋមន្ត្រីក្រសួងបរិស្ថាន កាលពីថ្ងៃពុធម្សិលមិញ បានកោះហៅម្ចាស់បុរី និងខុនដូ ទៅកាន់ក្រសួងបរិស្ថាន ដើម្បីបើកកិច្ចប្រជុំពិភាក្សាគ្នាជុំវិញការសាងសង់លំនៅដ្ឋាននានា នៅក្នុងបុរី និងខុនដូដោយគោរពទៅតាមនិយាមបរិស្ថាន។ កិច្ចពិគ្រោះយោបល់ រវាងចៅក្រសួងបរិស្ថាន និងក្រុមថៅកែសាងសង់វិស័យអចលនទ្រព្យនេះ ធ្វើឡើងខណៈដែលសន្ទុះនៃការអភិវឌ្ឍសំណង់ផ្ទះល្វែង វីឡា និងខុនដូ មានការរីកដុះដាលយ៉ាងសម្បើម។
ចុះផ្សាយនៅថ្ងៃ៖
ស្តាប់ - ០២:៣១
យ៉ាងហោចណាស់មានតំណាងក្រុមហ៊ុនវិនិយោគ និងអភិវឌ្ឍន៍លំនៅដ្ឋានចំនួន៤០ ក្រុមហ៊ុន រួមទាំងសហគមន៍ ទទួលបានការអញ្ជើញដោយក្រសួងបរិស្ថាន ដើម្បីជជែកគ្នាជុំវិញការសាងសង់ បុរី និងខុនដូ ក្នុងគោលបំណងធ្វើការរួមគ្នា រៀបចំលំនៅដ្ឋាន និងលើកកម្ពស់ហេដ្ឋារចនាសម្ព័ន្ធ ការរៀបចំក្រុង និងធ្វើយ៉ាងណាប្រែក្លាយលំនៅដ្ឋាន ក៏ដូចជាបុរីទាំងអស់នោះ ប្រកបដោយភាពបៃតង មានសោភណភាព និងបរិស្ថានស្អាត។
នៅក្នុងកិច្ចប្រជុំពិគ្រោះយោបល់នេះ រដ្ឋមន្ត្រីក្រសួងបរិស្ថាន លោក សាយ សំអាល់ បានលើកឡើងពីការរៀបចំគោលនយោបាយទាក់ទងនឹងការសាងសង់លំនៅដ្ឋាន ដែលត្រូវអនុវត្តទៅតាមស្ថានភាពជាក់ស្តែង ដោយគិតគូរបញ្ហាបរិស្ថានជាចំបង ក្នុងនោះស្នើដល់ ក្រុមហ៊ុនវិនិយោគទាំងអស់ មុននឹងធ្វើការសាងសង់ត្រូវគិតពីបញ្ហាលូ និងប្រព័ន្ធចំរោះទឹក ការញែក និងគ្រប់គ្រងសំរាម ក៏ដូចជាការសាងសង់យ៉ាងណា ដើម្បីមានបរិស្ថាន និងមានបរិយាកាសល្អ។ គោលការណ៍នេះ ក៏នឹងត្រូវអនុវត្តនៅក្នុងការវិនិយោគ និងការអភិវឌ្ឍលំនៅដ្ឋាននៅថ្នាក់ខេត្តផងដែរ។ នេះបើតាមលោក សាយ សំអាល់។
ការសម្រុកសាងសង់បុរីផ្ទះល្វែង វីឡា និងខុនដូនានា កន្លងមកត្រូវបានគេរិះគន់ថា បុរីខ្លះ ដើម្បីតែការកេងយកចំណេញខ្លាំងពេក បានបំពានទៅដល់បញ្ហាបរិស្ថាន ដូចជាមិនមាន សួនបៃតង ឬក៏មានតិចតួច ខ្វះទីធ្លាសាធារណៈ សំណង់ប្រកបដោយភាពចង្អៀត ប្រព័ន្ធលូ មិនត្រូវតាមស្តង់ដារ ឬឆ្លើយតបទៅនឹងចំនួនផ្ទះដ៏ច្រើនសន្ធឹកសន្ធាប់ និងមិនបានគិតគូរពីប្រព័ន្ធចំរោះទឹកអ្វីទាំងអស់។
ក៏ប៉ុន្តែនិន្នាការបច្ចុប្បន្ននេះ លោក ហ៊ុន ចាន់សាន ដែលជាស្ថាបត្យករមួយរូប តែងទទួលភារកិច្ចគូសប្លង់សំណង់បុរី ផ្ទះល្វែងដែរនោះ បានថ្លែងថា ការសាងសង់នៅពេលនេះ គឺមានការគិតគូរច្រើន ដល់បញ្ហាបរិស្ថាន និងផ្ទៃធម្មជាតិ ដើម្បីតម្រូវទៅតាមការចង់បានរបស់អតិថិជន។ ការប្រែប្រួលនេះ ខុសពីអ្វីដែលបានកើតមាន កាលពីមុន ដែលការគិតគូរពីបញ្ហាបរិស្ថាននៅមានកំរិត។
ទោះយ៉ាងណា អ្នកនាំពាក្យក្រសួងបរិស្ថានលោក នេត្រ ភក្ត្រា បានបញ្ជាក់ថា ជំនួបរវាងរដ្ឋមន្ត្រីក្រសួងបរិស្ថាន ជាមួយនឹងក្រុមហ៊ុនសាងសង់ពេលនេះ គឺចង់ឲ្យអ្នកវិនិយោគកាន់តែមានការទទួលខុសត្រូវបន្ថែមទៀត ក្នុងការគ្រប់គ្រងសំណល់រឹង រាវ ឲ្យបានល្អ និងត្រូវបង្កើតនូវអាងចំរោះទឹកកខ្វក់រួមមួយ ក្នុងបុរីនីមួយៗ ដើម្បីចំរោះទឹកមុននឹងបង្ហូរទៅក្នុងលូ។
សូមរំលឹកដែរថា កាលពីពេលថ្មីៗ ក្រសួងដែនដី បានកំណត់ថារាល់គម្រោងសាងសង់ផ្សេង ៗ មុននឹងមានការអនុញ្ញាត ចាំបាច់ត្រូវតែឆ្លងកាត់ការពិនិត្យរបស់ក្រសួងបរិស្ថាន ជាមុនសិន ដើម្បីឲ្យមានការគោរពតាមបទដ្ឋានបរិស្ថាននានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ