អាល្លឺម៉ង់ផ្តល់ប្រាក់កម្ចីដល់កម្ពុជាដោយភ្ជាប់នឹងលក្ខខណ្ឌសិទ្ធិមនុស្សនិងសិទ្ធិធ្វើនយោបាយ
រដ្ឋាភិបាលអាល្លឺម៉ង់តាមរយៈទីភ្នាក់ងារអភិវឌ្ឍន៍បារាំង( AFD)និងសហភាពអឺរ៉ុប បានសម្រេចផ្តល់កម្ចីដល់កម្ពុជាក្នុងទំហំទឹកប្រាក់ជាង ៨០លានអឺរ៉ូ ឬជិត ៩០លានដុល្លារ។ ប៉ុន្តែប្រាក់កម្ចីរបស់ប្រទេសលោកសេរីទាំងនេះគឺបានភ្ជាប់នឹងលក្ខខណ្ឌសិទ្ធិមនុស្ស និងសិទ្ធិធ្វើនយោបាយរបស់កម្ពុជាផងដែរ ខណៈ មន្រ្តីជាន់ខ្ពស់អាល្លឺម៉ង់លើកឡើងថា ប្រសិនបើកម្ពុជាបើកលំហបរិយាកាសនយោបាយ និងសិទ្ធិស៊ីវិលឡើងវិញ នោះកម្ពុជានឹងអាចគេចផុតពីការបាត់បង់EBAរបស់សហភាពអឺរ៉ុប។
ចុះផ្សាយនៅថ្ងៃ៖
ស្តាប់ - ០១:៤១
«ការគោរពសិទ្ធិមនុស្ស សិទ្ធិសង្គម សិទ្ធិសេដ្ឋកិច្ច និងសិទ្ធិធ្វើនយោបាយ គឺជាគ្រឹះរបស់កិច្ចសហប្រតិបត្តិការអាល្លឺម៉ង់ ដើម្បីការអភិវឌ្ឍន៍»។ នេះជាគូសបញ្ជាក់ច្បាស់ៗរបស់ស្ថានទូតអាល្លឺម៉ង់ក្នុងសេចក្ដីប្រកាសព័ត៌មានរបស់ខ្លួនថ្ងៃទី១៥ខែឧសភា។
ការគូសបញ្ជាក់បែបនេះរបស់អាល្លឺម៉ង់គឺដោយសារតែកម្ពុជាទទួលបានកម្ចីក្នុងទំហំទឹកប្រាក់ជាង៨០លានអឺរ៉ូ ឬជិត៩០លានដុល្លារអាមេរិក។ ជាកម្ចីតាមរយៈទីភ្នាក់ងារអភិវឌ្ឍន៍បារាំង(AFD)និងសហភាពអឺរ៉ុប ក្នុងនោះក៏មានប្រាក់កម្ចីរបស់អាល្លឺម៉ង់ចំនួន៣០លានអឺរ៉ូផងដែរ។ លើសពីនេះទៀត អាល្លឺម៉ង់ក៏បានផ្ដល់ជំនួយឥតសំណងជាង៥លានអឺរ៉ូ និងជំនួយបច្ចេកទេសដែលមានតម្លៃជាទឹកប្រាក់ជិត២០លានអឺរ៉ូ និងជំនួសលើគម្រោងអាហារូបត្ថម្ភ១០លានអឺរ៉ូផ្សេងទៀត។
សូមបញ្ជាក់ថា កិច្ចព្រមព្រៀងផ្តល់ឥណទាននេះត្រូវបានធ្វើឡើងនៅទីក្រុងប៊ែរឡាំង កាលពីថ្ងៃទី១៤ ដល់ថ្ងៃទី១៦ ខែឧសភានេះ នៅក្នុងជំនួបរវាងសមាជិកសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការ និងអភិវឌ្ឍសេដ្ឋកិច្ច លោក Nobert BARTHLE និងលោក ឈៀង យ៉ាណារ៉ា អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា។
បើតាម លោក Nobert BARTHLE ការបើកលំហសិទ្ធិនយោបាយ និងសង្គមស៊ីវិល ដើម្បីបន្ដទទួលបានប្រព័ន្ធអនុគ្រោះពន្ធ EBA របស់អឺរ៉ុប គឺរដ្ឋាភិបាលកម្ពុជាមិនពិបាកនឹងធ្វើនោះទេ ដោយលោកបញ្ជាក់ថា ច្បាប់ជាតិ និងការអនុវត្តជាក់ស្ដែងត្រូវស្របតាមកាតព្វកិច្ចសិទ្ធិមនុស្សអន្ដរជាតិ ដូចជា សេរីភាពនៃការបញ្ចេញមតិ និងសេរីភាពខាងការជួបជុំឬប្រមូលផ្ដុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ