សុន្ទរកថាចុងក្រោយរបស់លោក ហ៊ុន សែន ជាមួយកម្មករត្រូវបញ្ចប់នៅថ្ងៃនេះ និងឮឡើងវិញក្រោយការបោះឆ្នោត
ជំនួបសំណេះសំណាលរវាងលោកនាយករដ្ឋមន្ត្រី ហ៊ុន សែន ជាមួយនឹង កម្មករ និយោជិក នៃវិស័យកាត់ដេរ និងដេរស្បែកជើង នៅថ្ងៃទី០៥ កក្កដានេះ គឺជាជំនួបចុងក្រោយហើយ មុនពេលការបោះឆ្នោតឈានចូលមកដល់។ ការសម្រាកថ្លែងសុន្ទរកថាទៅកាន់កម្មករកាត់ដេរ របស់ប្រមុខរដ្ឋាភិបាល ក៏ដោយសារ តែច្បាប់ស្តីពីការបោះឆ្នោត មិនអនុញ្ញាតឲ្យមានជំនួប សំណេះសំណាល ដែលភ្ជាប់ទៅជាមួយនូវជំនួយឧបត្ថម្ភ។
ចុះផ្សាយនៅថ្ងៃ៖
ស្តាប់ - ០២:១០
ចាប់ពីថ្ងៃស្អែកទៅ សុន្ទរកថាថ្មីៗ ដែលថ្លែងចេញពីជំនួប រវាងលោកនាយករដ្ឋមន្ត្រី ហ៊ុន សែន ជាមួយកម្មករ និយោជិក នៃវិស័យវាយនភ័ណ្ឌ កាត់ដេរ និងដេរស្បែកជើង នឹងលែងឮទៀតហើយ។ ក៏ប៉ុន្តែ ក្រោយការបោះឆ្នោតជ្រើសតាំងតំណាងរាស្ត្រថ្ងៃទី២៩កក្កដាខាងមុខ លោកនឹងបន្តថ្លែងការណ៍ជាមួយកម្មករឡើងវិញ។
គិតចាប់តាំងពីថ្ងៃទី២០ ខែសីហា ឆ្នាំ២០១៧ ដល់ថ្ងៃទី០៥ ខែកក្កដា ឆ្នាំ២០១៨នេះ លោក ហ៊ុន សែន ក្នុងនាមប្រមុខរដ្ឋាភិបាល បានជួបសំណេះសំណាលជាមួយ កម្មករ និយោជិក រដ្ឋបាលរោងចក្រ ចំនួន៤៩លើក និងជួបកម្មករសរុប ជាង៦៨ម៉ឺននាក់។ ទាក់ទងទៅនឹងជំនួបរវាងកម្មករនៃវិស័យកាត់ដេរ និងប្រមុខរដ្ឋាភិបាលនេះ ត្រូវបានអ្នកតាមដានសង្គម និងការងារកត់សម្គាល់ថា ជាឱកាស ដែលប្រមុខរដ្ឋាភិបាល បង្ហាញនូវការផ្ញើសារចំនួន៣មុខព្រួញ គឺជាការទាក់ទាញការគាំទ្រផ្នែកនយោបាយ ពីសំណាក់ កម្មករ កម្មការិនី ជាឱកាសឆ្លើយតប ទៅនឹងក្រុមប្រឆាំងនឹងលោក និងចុងក្រោយ គឺជាសារផ្ញើដល់ប្រជាពលរដ្ឋស្តីពីការងាររបស់រដ្ឋាភិបាល និងការអភិវឌ្ឍប្រទេសជាតិ។
ទោះយ៉ាងណា ក្រុមអ្នកសហជីព ដែលមាននិន្នាការចំរុះទទួលស្គាល់ថា ជំនួបដែលមិនដែលមានកាលពីអាណត្តិកន្លងមករបស់លោក ហ៊ុន សែន ជាមួយកម្មករ គឺបានផ្តល់ផលចំណេញជាច្រើនដល់កម្មករ។ អត្ថប្រយោជន៍សំខាន់ទាំងនោះរួមមាន ការជម្រុញឲ្យមានប្រាក់ឈ្នួលអប្បបរមា១៧០ដុល្លារ ក្នុង១ខែ សម្រាប់កម្មករកាត់ដេរ។ ទទួលបាន សេវាពិនិត្យសុខភាព និងព្យាបាលជំងឺនៅតាមមន្ទីរពេទ្យរដ្ឋដោយឥតគិតថ្លៃ។ ទទួលបានការជិះរថយន្តក្រុងដោយមិនបង់ប្រាក់។
ទទួលប្រាក់ជំនួយក្នុងអត្រា១២០% រយៈពេល៣ខែ ចំពោះកម្មការិនីសម្រាលកូនហើយអំឡុងពេលមានផ្ទៃពោះ កម្មការិនីក៏ទទួលបានការអនុញ្ញាតឲ្យចេញពីធ្វើការមុនម៉ោងយ៉ាងតិច១៥នាទី។ និយោជកជាអ្នកបង់ថ្លៃធានារ៉ាប់រង បេឡាជាតិរបបសន្តិសុខសង្គម ជំនួសកម្មករ។ ទទួលបានការសម្រួលក្នុងការបញ្ចុះថ្លៃទឹកថ្លៃភ្លើងផ្ទះជួល ទទួលបានរបបសោធននិវត្តន៍ និងអត្ថប្រយោជន៍ផ្សេងមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ