ម្នាក់ស្លាប់និងម្នាក់ទៀតរងរបួសធ្ងន់ ក្នុងបេសកកម្មបោសសម្អាតមីនក្នុងខេត្តប៉ៃលិន
នាព្រឹកថ្ងៃទី១៣ ខែមករា ឆ្នាំ២០១៧ បុគ្គលិករបស់អង្គការ HALO ម្នាក់ត្រូវបានស្លាប់បាត់បង់ជីវិតនៅក្នុងបេសកកម្មបោសសំអាតមីនមិនបានសម្រេចនៅចំណុចអូរតាផៃ ភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន។ ហេតុការណ៍នេះ ក៏បានបណ្តាលឲ្យបុគ្គលិកនារីម្នាក់ទៀតដែលកំពុងភារកិច្ចរំដោះមីននៅក្បែរខាងនោះ រងរបួសយ៉ាងធ្ងន់ធ្ងរផងដែរ។ សូមបញ្ជាក់ថា ឧបទ្ទេវហេតុផ្ទុះមីននេះ បានកើតឡើងចំថ្ងៃតែមួយដែលរដ្ឋាភិបាលស្វីសបានផ្តល់ជំនួយហិរញ្ញវត្ថុជាង៣លានដុល្លារ ដើម្បីគាំទ្រដល់សកម្មភាពបោសសំអាតមីននៅកម្ពុជាចាប់ពីឆ្នាំ ២០១៧ ដល់ឆ្នាំ២០១៩។ អត្ថបទដោយ ព្រឿន បញ្ញារី
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
បុគ្គលិករបស់អង្គការ HALO ម្នាក់បានស្លាប់ និងម្នាក់ទៀតរងរបូសយ៉ាងធ្ងន់ធ្ងរនៅក្នុងឧបទ្ទេវហេតុផ្ទុះមីននៅក្នុងទីរួមខេត្តប៉ៃលិន។ សូមជម្រាបជូនថា ហេតុការណ៍នេះ ដំបូងគឺចាប់ផ្តើមចេញពីជនរងគ្រោះដែលបានស្លាប់បាត់បង់ជីវិតឈ្មោះ លឿង រស្មី អាយុ ៥៥ឆ្នាំ បានប្រទះឃើញគ្រាប់មីនប្រភេទ GYATA ហើយភ្លាមៗនោះ លោកបានចាប់ផ្ដើមសកម្មភាពរំដោះមីន។
យ៉ាងណាមិញ បេសកកម្មនេះមិនបានប្រព្រឹត្តទៅដោយជោគជ័យទេ។ មិនជោគជ័យដោយសារតែ មីនបានផ្ទុះនៅក្នុងអំឡុងពេលធ្វើសកម្មភាព ដែលបណ្តាលឲ្យជនរងគ្រោះស្លាប់នៅនឹងកន្លែង។ ហេតុការណ៍នេះក៏បានបង្កឲ្យបុគ្គលិកស្រីម្នាក់ទៀតរបស់អង្គការ HALO ដែលកំពុងបំពេញបេសកកម្មរំដោះមីននៅក្បែរគ្នា ឈ្មោះ ងុយ ថានី អាយុ២៨ឆ្នាំ បានរងរបួសយ៉ាងធ្ងន់ធ្ងរផងដែរ។ គួរឲ្យដឹងផងដែរ នាពេលភ្លាមនោះ ជនរងគ្រោះដែលរងរបួសធ្ងន់ធ្ងរបានត្រូវដឹកតាមឧទ្ធម្ភាគចក្រយកទៅសង្គ្រោះនៅឯមន្ទីរពេទ្យមួយនៅរាជធានីភ្នំពេញ។ ចំនែកឯជនរងគ្រោះដែលបានបាត់បង់ជីវិត ក៏ត្រូវបានក្រុមគ្រួសារបញ្ជូនយកទៅធ្វើបុណ្យតាមប្រពៃណីផងដែរ។
សូមបញ្ជាក់ថា ឧបទ្ទេវហេតុផ្ទុះមីននេះ បានកើតឡើងចំថ្ងៃតែមួយដែលរដ្ឋាភិបាលស្វីសបានផ្តល់ជំនួយហិរញ្ញវត្ថុជាង៣,៥លានដុល្លារ ដើម្បីគាំទ្រដល់សកម្មភាពបោសសំអាតមីននៅកម្ពុជាចាប់ពីឆ្នាំ ២០១៧ ដល់ឆ្នាំ២០១៩ បន្ថែមពីលើការគាំទ្រថវិកាដែលបានផ្តល់ជូនរួចមកហើយកាលពីឆ្នំា២០១៣ ដល់ឆ្នាំ២០១៩។ ថវិកានេះក៏នឹងត្រូវប្រើប្រាស់ដើម្បីគាំទ្ររដ្ឋាភិបាលកម្ពុជាដើម្បីសម្រេចបានលទ្ធផលកម្ចាត់មីនជាអតិបរមាលើការអភិវឌ្ឍមនុស្សសម្រាប់សហគមន៍ក្រីក្រក្នុងខេត្តបាត់ដំបង បន្ទាយមានជ័យ និងប៉ៃលិន ពោលគឺធ្វើឡើងតាមរយៈគម្រោងបោសសម្អាតមីនដើម្បីលទ្ធផលដំណាក់កាលទី៣។
សូមបញ្ជាក់ថា ក្នុងរយៈពេល៥ឆ្នាំ ពោលគឺចាប់ពីឆ្នាំ ២០១១ ដល់ឆ្នាំ២០១៦ ស្វីសបានផ្ដល់ជំនួយបោសសម្អាតមីនក្នុងផ្ទៃដីអាទិភាពប្រមាណ១០៩លានម៉ែត្រក្រឡាដែលរួមមាន មីនប្រឆាំងមនុស្សចំនួន ២០.២៤០គ្រាប់ មីនប្រឆាំងរថក្រោះចំនួន ៣២៥គ្រាប់ និងយុទ្ធភ័ណ្ឌមិនទាន់ផ្ទុះចំនួន ២៤.៥៥០គ្រាប់។ ប្រជាជនខ្មែរជិត ៤២០.០០០នាក់ បានទទួលផលពីគម្រោងបោសសម្អាតមីននេះ ខណៈរដ្ឋាភិបាលដាក់ផែនការរំដោះមីនឲ្យអស់ចេញពីផ្ទៃដីកម្ពុជា នៅឆ្នាំ២០២៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ