ពលរដ្ឋមានទំនាស់ដីធ្លីនៅខេត្តព្រះវិហារឡើងមករកដំណោះស្រាយពីក្រសួងមហាផ្ទៃ
តំណាងពលរដ្ឋ២៥៣គ្រួសារ មកពីខេត្តព្រះវិហារនៅថ្ងៃទី២៩មីនានេះ បានយកញត្តិទៅដាក់នៅក្រសួងមហាផ្ទៃ ដើម្បីស្វែងរកដំណោះស្រាយសម្រាប់ទំនាស់ដីធ្លីរបស់ពួកគាត់ ដែលបានកើតឡើង៨ឆ្នាំមកហើយ។ ក្រសួងមហាផ្ទៃបានស្នើឲ្យពលរដ្ឋកែតម្រូវចំណុចខ្លះនៅក្នុងញត្តិ សឹមយកទៅដាក់ម្ដងទៀត។ ចំណែកអាជ្ញាធរខេត្តព្រះវិហារ តាមរយៈវិទ្យុបារាំងអន្ដរជាតិ បានស្នើឲ្យពលរដ្ឋស្វែងរកការដោះស្រាយត្រឹមថ្នាក់ខេត្តវិញ។
ចុះផ្សាយនៅថ្ងៃ៖
លោក ផាន់ ធឿន តំណាងពលរដ្ឋ២៥៣គ្រួសារ មកពីខេត្តព្រះវិហារ បានអះអាងប្រាប់វិទ្យុបារាំងអន្តរជាតិ RFI ថា ថ្នាក់ខេត្តមិនបានអើពើដោះស្រាយបញ្ហាដីធ្លីជូនពួកគាត់ឡើយ បើទោះបីជាក្រសួងមហាផ្ទៃចេញលិខិតទៅខេត្ត ឲ្យដោះស្រាយបញ្ហានេះម្ដងជាពីរដងក៏ដោយ។ បើតាមពលរដ្ឋ ទំនាស់ដីធ្លីរវាងពលរដ្ឋចំនួន២៥៣គ្រួសារ ជាមួយអាជ្ញាធរ បានកើតឡើងតាំងឆ្នាំ២០១០ នៅភូមិស្វាយជ្រំ ឃុំកន្ទួត ស្រុកជាំក្សាន្ត ខេត្តព្រះវិហារ អំឡុងពេលកើតមានទំនាស់ព្រំដែនរវាងកម្ពុជា និងថៃ។ កាលណោះ អាជ្ញាធរបានជម្លៀសពលរដ្ឋទៅរកកន្លែងមានសុវត្ថិភាព តែក្រោយបញ្ចប់ការបាញ់បោះ ពលរដ្ឋជាម្ចាស់ដីមិនអាចត្រឡប់ទៅរស់នៅលើដីធ្លីរបស់ខ្លួនវិញបានឡើយ ដោយអាជ្ញាធរអះអាងថា ដីទាំងនោះត្រូវទុកជាសម្បត្តិរដ្ឋ។ នេះបើតាម លោក ផាន់ ធឿន។
តំណាងពលរដ្ឋរូបនេះគូសបញ្ជាក់បន្តថា សព្វថ្ងៃ ពលរដ្ឋកំពុងរស់នៅដោយគ្មានទីជម្រកច្បាស់លាស់ និងគ្មានដីស្រែធ្វើចំការ ហើយខ្លះត្រូវធ្វើចំណាកស្រុកទៅរកការងារធ្វើនៅប្រទេសថៃជាដើម។
ផ្ទុយពីការលើកឡើងរបស់តំណាងពលរដ្ឋ លោក អ៊ុន ចាន់ដា អភិបាលខេត្តព្រះវិហារបានបដិសេធថា មិនមានបញ្ហាបែបនេះកើតឡើងឡើយ។ បើតាមលោកអភិបាលខេត្ត កន្លងមក ទំនាស់ដីធ្លីមួយបានកើតឡើងនៅតំបន់អភិរក្សអាជ្ញាធរប្រាសាទព្រះវិហារ តែបញ្ហានោះបានដោះស្រាយបញ្ចប់ហើយនៅថ្នាក់ជាតិ។ លោកអភិបាលខេត្តក៏បានជម្រុញទៅប្រជាពលរដ្ឋ ឲ្យយកបញ្ហាដីធ្លីនេះទៅដោះស្រាយនៅខេត្តប្រសើរជាង។ ការលើកឡើងរបស់លោក អ៊ុន ចាន់ដា យ៉ាងដូច្នេះ ត្រូវបានលោក ផាន់ ធឿន តំណាងប្រជាពលរដ្ឋចាត់ទុកថា គ្រាន់តែជាការគេចវេសពីទំនួសខុសត្រូវប៉ុណ្ណោះ។
ជុំវិញទំនាស់ដីធ្លីនេះដែរ មន្ដ្រីអង្គការសង្គមស៊ីវិលបានកត់សម្គាល់ថា ភាគច្រើន មន្ដ្រីនៅថ្នាក់ខេត្តហាក់ដូចជាមិនសូវប្រឹងប្រែងដោះស្រាយជូនពលរដ្ឋឲ្យអស់ពីលទ្ធភាពឡើយ។ នេះហើយជាហេតុដែលធ្វើឲ្យពលរដ្ឋអស់ជំនឿ ហើយឡើងមកភ្នំពេញដើម្បីស្វែងរកអន្តរាគមន៍។ នេះបើតាមលោក អ៊ិន គង់ជិត មន្ត្រីបំរើការងារនៅអង្គការលីកាដូ ដែលបានតាមដានយ៉ាងជាប់លាប់ពីបញ្ហាទំនាស់ដីធ្លីនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ