ក្រសួងដែនដី៖ ក្រុមហ៊ុន និងពលរដ្ឋរាប់រយគ្រួសារព្រមព្រៀងគ្នាបញ្ចប់ករណីវិវាទដីធ្លីនៅកោះកុង
ក្រសួងដែនដីកាលពីថ្ងៃម្សិលមិញ បានឲ្យដឹងថាក្រុមហ៊ុនស្ករ និងប្រជាពលរដ្ឋរាប់រយគ្រួសារនៅក្នុងខេត្តកោះកុងបានព្រមព្រៀងគ្នាបញ្ចប់ករណីវិវាទដីធ្លីដ៏រ៉ាំរ៉ៃ។ តែមន្រ្តីអង្គការសង្គមស៊ីវិលអះអាង ថាករណីវិវាទដីធ្លីនៅឃុំជីខលើ ខេត្តកោះកុង មិនទាន់បញ្ចប់ទាំងស្រុងនៅឡើយទេ។ មិនទាន់បញ្ចប់ ដោយសារតែពលរដ្ឋជាង២០០គ្រួសារទៀត មិនទាន់ទទួលបានដំណោះស្រាយផ្លូវការណាមួយពីក្រសួងស្ថាប័នពាក់ព័ន្ធ រួមនឹងក្រុមហ៊ុនស្ករនៅឡើយ។ នេះបើតាមមន្ដ្រីអង្គការសង្គមស៊ីវិល។
ចុះផ្សាយនៅថ្ងៃ៖
ស្តាប់ - ០២:២២
កាលពីថ្ងៃទី២២ ខែមីនា ក្រសួងដែនដី នគរូបនីយកម្ម និងសំណង់ បានប្រកាសថាជម្លោះដីធ្លីរវាងក្រុមហ៊ុន និងប្រជាពលរដ្ឋប្រមាណ៣៧៥គ្រួសារក្នុងខេត្តកោះកុង ត្រូវបានដោះស្រាយបញ្ចប់ជាស្ថាពរ ដោយក្រុមប្រជាពលរដ្ឋបានយល់ព្រមទទួលយកដំណោះស្រាយពីក្រុមហ៊ុន និងក្រសួងពាក់ព័ន្ធ។
ក្នុងនោះ ភាគីក្រុមហ៊ុនយល់ព្រមឲ្យរដ្ឋកាត់ដីទំហំ៨២៥ហិកតា ស្ថិតនៅក្នុងឃុំជីខលើ ស្រុកស្រែអំបិល ខេត្តកោះកុង ចេញពីដីសម្បទានសេដ្ឋកិច្ច ដើម្បីរដ្ឋធ្វើប្រទានកម្មជាកម្មសិទ្ធិជូនប្រជាពលរដ្ឋ១៧៥គ្រួសារ ក្នុងទំហំដី៣ហិកតា និងថវិកាចំនួន២.៥០០ដុល្លារក្នុងមួយគ្រួសារ។ ហើយក្រុមប្រជាពលរដ្ឋ២០០គ្រួសារផ្សេងទៀត យល់ព្រមទទួលយកដំណោះស្រាយជាដីទំហំ១,៥ហិកតា ក្នុងមួយគ្រួសារ។
សូមជម្រាប ករណីវិវាទដីធ្លីដ៏រ៉ាំរ៉ៃរវាងប្រជាពលរដ្ឋប្រមាណ៣៥៧គ្រួសារ និងក្រុមហ៊ុន Koh kong Plantation Co., Ltd. និងក្រុមហ៊ុន Koh Kong Suger Industry Co.,Ltd. នេះ កើតឡើងជាង១០ឆ្នាំកន្លងមកហើយ ចាប់តាំងពីពេលដែលក្រុមហ៊ុន ទទួលបានសិទ្ធិសម្បទានសេដ្ឋកិច្ចនៅឃុំជីខលើ និងឃុំកណ្ដោល ខេត្តកោះកុង ដើម្បីវិនិយោគដំណាំអំពៅ។
យ៉ាងណាក៏ដោយ លោក អ៊ិន គង់ជិត មន្ដ្រីអង្គការការពារសិទ្ធិមនុស្ស លីកាដូ ប្រចាំខេត្តកោះកុង និងជាអ្នកតាមដានករណីវិវាទដីធ្លីនេះ បានថ្លែងប្រាប់វិទ្យុបារាំងអន្តរជាតិថា ការដោះស្រាយរបស់ក្រសួងដែនដីនៅពេលនេះ គឺមិនទាន់ចប់នៅឡើយទេ។ ពោលគឺនៅមានប្រជាពលរដ្ឋប្រមាណជាង២០០គ្រួសារទៀត ដែលមិនទាន់ទទួលបានដោះស្រាយនៅឡើយ។
លោកបន្ថែមថា បណ្តឹងរបស់ប្រជាពលរដ្ឋជាង២០០គ្រួសារផ្សេងទៀត មិនត្រូវបានដោះស្រាយនោះទេ ដោយសារតែពួកគាត់មិនបានចូលរួមការតវ៉ាញឹកញាប់ ហើយប្រជាពលរដ្ឋ ដែលមិនទាន់ទទួលបានការដោះស្រាយនឹងធ្វើការតវ៉ានាពេលខាងមុខនេះ។
បើតាម លោក អ៊ិន គង់ នៅក្នុងខេត្តកោះកុងទាំងមូល មានករណីវិវាទដីធ្លីធំៗចំនួន៥ករណី ហើយរហូតមកដល់ពេលនេះមិនទាន់មានដំណោះស្រាយនៅឡើយទេ។
របាយការណ៍ប្រចាំឆ្នាំរបស់ក្រសួងដែនដីកាលពីឆ្នាំ២០១៧ បង្ហាញថា គណៈកម្មការសុរិយោដីបានដោះស្រាយចប់ករណីវិវាទដីធ្លីចំនួន៨៥ករណី នៅទូទាំងប្រទេស ខណៈវិវាទដីធ្លីចំនួន៧៣១ករណីទៀតកំពុងដោះស្រាយបន្ត។ ចំណែកវិវាទដីធ្លីដោះស្រាយដោយក្រុមការងារក្រសួង មាន១២៣ករណី៖ ក្នុងនោះដោះស្រាយបញ្ចប់ចំនួន២៥ករណី និងបានធ្វើលិខិតឆ្លើយតបទៅម្ចាស់បណ្តឹង ឬបង្វែរទៅសមត្ថកិច្ចពាក់ព័ន្ធចំនួន៩៨ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ