សមាគមជនជាតិកូរ៉េនៅកម្ពុជា លើកបដាតវ៉ាចំពោះការអភិវឌ្ឍអាវុធនុយក្លេអ៊ែររបស់កូរ៉េខាងជើង
នៅរសៀលថ្ងៃអង្គារនេះ ជនជាតិកូរ៉េដែលរស់នៅក្នុងប្រទេសកម្ពុជាប្រមាណជិត ៥០នាក់ បានប្រមូលផ្តុំគ្នា លើកបដា តវ៉ានៅមុខសមាគមរបស់ខ្លួន ក្នុងសង្កាត់ភ្នំពេញថ្មី ដើម្បីប្រឆាំងចំពោះការប៉ុនប៉ងអភិវឌ្ឍអាវុធនុយក្លេអ៊ែររបស់ប្រទេសកូរ៉េខាងជើង។ សមាគមជនជាតិកូរ៉េនៅកម្ពុជា ដែលតំណាងអោយជនជាតិកូរ៉េ នៅកម្ពុជាជាង ២មឺននាក់ បានទាមទាអោយមេដឹកនាំកូរ៉េខាងជើង សូមបញ្ឈប់ជាបន្ទាប់ និងបំផ្លាញអាវុធនុយក្លេអ៊ែរទាំងអស់ចោល ដោយងាកមកការចរចារកដំណោះស្រាយសន្តិភាពវិញ។
ចុះផ្សាយនៅថ្ងៃ៖
ស្តាប់ - ០២:០២
បដាជាអក្សរកូរ៉េ និងរូបថត លោក គីម ជុងអ៊ុន ប្រធានាធិបតីកូរ៉េខាងជើង និងរូប មីស៊ីល ដែលខ្វែងទឹកថ្នាំពណ៌ក្រហម ពីលើ ត្រូវបាន ជនជាតិកូរ៉េខាងត្បូង មួយក្រុម ប្រើជាឧបករណ៍តវ៉ានៅរសៀល ថ្ងៃទី១៣ កញ្ញានេះ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ នៅមុខស្នាក់ការ សមាគមជនជាតិកូរ៉េនៅកម្ពុជា ប្រធានសមាគម លោក គីម យ៉ុនសិក (Kim Hyun Sick) បានថ្លែង (តាមរយះអ្នកបកប្រែ) ថាសកម្មភាពតវ៉ានេះនឹងធ្វើឡើងជាបន្តបន្ទាប់ ដើម្បីប្រឆាំងនឹងការប៉ុនប៉ងអភិវឌ្ឍអាវុធនុយក្លេអ៊ែរ របស់ប្រទេសកូរ៉េខាងជើង។
ប្រធានសមាគមរូបនេះ បានបន្ថែមថា សេចក្តីថ្លែងការណ៍ របស់សមាគម ដែលតំណាងអោយ ជនជាតិ កូរ៉េ ជាង ២មឺន នាក់ កំពុងស្នាក់នៅកម្ពុជានឹងផ្ញើទៅកាន់ស្ថានទូតកូរ៉េខាងត្បូង និងអង្គការសហប្រជាជាតិ ដើម្បីទាមទារអោយ កូរ៉េខាងជើង បញ្ឈប់ជាបន្ទាន់ ហើយបំផ្លាញអាវុធនុយក្លេអ៊ែរចោលទាំងស្រុង។
បើតាមលោក គីម យ៉ុនសិក សមាគមជនជាតិកូរ៉េនៅកម្ពុជា មានការខឹងសម្បារ នឹងការសាកល្បងអាវុធនុយក្លេអ៊ែររបស់កូរ៉េខាងជើង ដែលជាមូលហេតុមួយ បណ្តាលអោយ លោកស្រីប្រធានាធិបតីកូរ៉េខាងត្បូង ប៉ាក់ គុនហេ ពន្យាពេល មកទស្សនកិច្ចនៅកម្ពុជាធ្វើអោយសមាគមកូរ៉េ ខកខានឱកាសល្អ ដើម្បីជួបប្រមុខរដ្ឋពួកគេ ដើម្បីបង្ហាញពីទំនាក់ទំនងសង្គមកូរ៉េ ក្នុងកិច្ចសហប្រតិបត្តិការជាមួយប្រទេសកម្ពុជា។
គួរជម្រាបថា ការតវ៉ារបស់ជនជាតិកូរ៉េនៅកម្ពុជា នេះ ធ្វើឡើងមួយថ្ងៃ ក្រោយពេល ក្រសួងការបរទេសកម្ពុជា កាលពីថ្ងៃទី១២ កញ្ញា បានចេញសេចក្តីថ្លែងការណ៍មួយ សម្តែងកង្វល់ ចំពោះ ការសាកល្បងអាវុធនុយក្លេអ៊ែរ កាលពីថ្ងៃទី០៩ កញ្ញា ២០១៦ របស់ កូរ៉េខាងជើង ដែលបានបំពានយ៉ាងច្បាស់ទៅលើ សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងអាចងាយបង្កហេតុអោយស្ថានភាពកាន់តែយ៉ាប់ឡើង ក្នុងឧបទ្វីបកូរ៉េ។ កម្ពុជា បានបញ្ជាក់ជាថ្មី ពី សារៈសំខាន់នៃសន្តិភាព និងសន្តិសុខ ក្នុងឧបទ្វីបកូរ៉េ ព្រមទាំងគាំទ្រពេញទំហឹង ចំពោះការដកចោលនូវអាវុធនុយក្លេអ៊ែរ ក្នុងតំបន់នេះ ដើម្បីជាប្រយោជន៍សន្តិភាព សន្តិសុខ និងស្ថេរភាព។ កម្ពុជា ទទូចជាខ្លាំងដល់ កូរ៉េខាងជើង អោយអនុលោមតាម រាល់សេចក្តីសម្រេចរបស់ ក្រុមប្រឹក្សាសន្តិសុខអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ