ពលរដ្ឋកោះកុងចង់បានដំណោះស្រាយដូចពលរដ្ឋរស់នៅប៊ូឌីញដែរ
ពលរដ្ឋឡើងពីខេត្តកោះកុង ប្រមាណជា៥០នាក់ នៅថ្ងៃទី១៧ខែសីហានេះ បានជួបជុំគ្នានៅមុខខុទ្ទកាល័យលោកនាយករដ្ឋមន្ត្រី ហ៊ុន សែន ដើម្បីតាមដានញត្តិរបស់ពួកគេដែលបានដាក់កាលពីដើមឆ្នាំក្នុងការស្វែងរកដំណោះស្រាយរឿងទំនាស់ដីធ្លី។ តំណាងពលរដ្ឋម្នាក់ក្នុងចំណោម៥០នាក់នោះបានអះអាងប្រាប់វិទ្យុបារាំងថា ពួកគេចង់ឲ្យរដ្ឋាភិបាលដោះស្រាយបញ្ហារបស់ពួកគេដូចពលរដ្ឋរស់នៅប៊ូឌីញដែរ។
ចុះផ្សាយនៅថ្ងៃ៖
ស្តាប់ - ០១:៥៥
នេះគឺជាការអះអាងរបស់អ្នកស្រីគន្ធា តំណាងពលរដ្ឋមកពីខេត្តកោះកុងដែលរូបគាត់ផ្ទាល់ និងអ្នកភូមិដទៃទៀតមានទំនាស់ដីធ្លីជាមួយក្រុមហ៊ុនឯកជនដាំអំពៅ។ បច្ចុប្បន្នពលរដ្ឋកោះកុង ១៧៥គ្រួសាររស់នៅ សហគមន៍ ជីខក្រោម សហគមន៍ជីខលើ សហគមន៍ដងពែង និងភូមិ តាំកន ពួកគេនៅមិនទាន់ទទួលបានដំណោះស្រាយនៅឡើយទេ។
គួរជម្រាបថា កាលពីដើមឆ្នាំ២០១៧ពួកគេបានយកញត្តិមកដាក់នៅរដ្ឋសភា សហភាពអឺរ៉ុបប្រចាំនៅកម្ពុជា និងខុទ្ទកាល័យលោកនាយករដ្ឋមន្ត្រី ហ៊ុន សែន ។ តែនៅថ្ងៃនេះខុទ្ទកាល័យលោក ហ៊ុន សែន ប្រាប់ប្រជាពលរដ្ឋឲ្យបំពេញបែបបទឡើងវិញ នឹងយកលិខិតអន្តរាគមន៍នោះមកដាក់ជាថ្មីទៀត។ ប៉ុន្តែអ្នកស្រីគន្ធាដូចជាគ្មានជំនឿចិត្តសោះចំពោះញត្តិយកមកដាក់លើកក្រោយនឹងទទួលបានដំណោះស្រាយឬការឆ្លើយតបភ្លាមនោះ។
បើតាមគម្រោងប្រជាពលរដ្ឋទាំងនេះ នឹងស្នាក់នៅវត្តសាមគ្គីរង្ស៊ី ដើម្បីបន្តតាមដានចំពោះញត្តិដែលបានដាក់នៅរដ្ឋសភា និងសហភាពអឺរ៉ុប ជាបន្តទៀត។ អ្នកភូមិម្នាក់សុំមិនបញ្ចេញឈ្មោះបានគូសបញ្ជាក់ថា ពួកគេមិនត្រឹមតែជាជនរងគ្រោះដោយសារដីធ្លីទេ តែបានរងបណ្ដឹងរបស់តុលាការទៀតផង។
សូមបញ្ជាក់ថា ទំនាស់ដីធ្លីរវាងប្រជាពលរដ្ឋរស់នៅខេត្តកោះកុង និងក្រុមដាំអំពៅគិតមកដល់ពេលនេះ គឺមានរយៈពេល១២ឆ្នាំដោយទំនាស់នេះចាប់ផ្ដើមតាំងពីឆ្នាំ២០០៦មកម្លេះ។ អ្នកស្រីគន្ធាអះអាងថា ពួកគាត់មានបញ្ហាជាមួយក្រុមហ៊ុនដាំអំពៅលោកឧកញ៉ា លី យ៉ុងផាត់ និង លោកឧកញ៉ា ហេង ហ៊ុយ។ តែយ៉ាងណាក៏ដោយតំណាងក្រុមហ៊ុន លី យ៉ុងផាត់ អះអាងជាថ្មីទៀតថា ក្រុមហ៊ុន លី យ៉ុងផាត់លែងជាប់ពាក់ព័ន្ធជាមួយនឹងទំនាស់ដីធ្លីនៅកោះកុងនេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ