ជនសង្ស័យទី៣ ពាក់ព័ន្ធនឹងករណីជួញដូរក្រលៀនត្រូវបានតុលាការសម្រេចឃុំខ្លួន
ជនសង្ស័យម្នាក់ទៀត ក្នុងសំណុំរឿងជួញដូរក្រលៀន ត្រូវបានតុលាការក្រុងភ្នំពេញសម្រេចឃុំខ្លួនបណ្តោះអាសន្នហើយ កាលពីថ្ងៃម្សិលមិញ។ ការឃុំខ្លួនជនទី៣ ក្នុងសំណុំរឿងនេះ ធ្វើឡើងបន្ទាប់តុលាការក្រុង កាលពីខែឧសភាកន្លងទៅបានសម្រេចចោទប្រកាន់លើមនុស្សពីរនាក់ ពាក់ព័ន្ធនឹងការជួញដូរសរីរាង្គមនុស្សដោយខុសច្បាប់។
ចុះផ្សាយនៅថ្ងៃ៖
ស្តាប់ - ០២:១៥
ជនសង្ស័យម្នាក់ទៀតក្នុងសំណុំរឿងជួញដូរក្រលៀនឈ្មោះជឿន ធី អាយុ៣៨ឆ្នាំ ត្រូវបានសមត្ថកិច្ចឃាត់ខ្លួនកាលពីថ្ងៃទី១៧ ខែតុលាកន្លងទៅ ហើយត្រូវបានតុលាការសម្រេចឃុំខ្លួនជាបណ្តោះអាសន្ន។ បើតាមការចុះផ្សាយរបស់ប្រព័ន្ធផ្សព្វផ្សាយក្នុងស្រុក ជនសង្ស័យខាងលើ គឺជាអ្នករត់ការឯកសារបញ្ជូនមនុស្សឆ្លងដែនទៅប្រទេសឥណ្ឌា ដើម្បីវះកាត់ដូរសរីរាង្គក្រលៀន។
លោកវរសេនីយ៍ឯកកែវ ធា ប្រធានការិយាល័យនគរបាលប្រឆាំងការជួញដូរមនុស្ស និងការពារអនីតិជនរាជធានីភ្នំពេញបានបដិសេធការធ្វើអធិប្បាយលើរឿងខាងលើ ដោយលោកអះអាងថាសំណុំរឿងនេះ គឺផុតដៃរបស់សមត្ថកិច្ច ហើយកំពុងស្ថិតនៅក្នុងនីតិវិធីរបស់សាលាដំបូងក្រុងភ្នំពេញ។
លោកអ៊ី រិន្ទ ប្រធានលេខាធិការដ្ឋានរដ្ឋបាលសាលាដំបូង បានថ្លែងប្រាប់វិទ្យុបារាំងអន្តរជាតិនៅថ្ងៃទី២០ ខែតុលានេះថា សំណុំរឿងនេះ បានមកដល់ដៃចៅក្រមស៊ើបសួរ ហើយចៅក្រមបានសម្រេចឃុំខ្លួនឈ្មោះ ជឿន ធី បណ្តោះអាសន្ន កាលពីថ្ងៃទី១៩ ខែតុលា ពាក់ព័ន្ធនឹងការ នាំចេញដោយមិនស្របច្បាប់ដោយមានគោលដៅ តាមមាត្រា១០នៃច្បាប់ស្តីពីការបង្រ្កាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
សូមជម្រាបជូនថា កាលពីថ្ងៃទី៣០ ខែឧសភា កន្លងទៅមនុស្សពីរនាក់ត្រូវបានតុលាការសម្រេចចេញដីកាឃុំខ្លួន ដែលក្នុងនោះមាន ឡាច ម៉េងហុង ភេទប្រុស អាយុ៣៤ឆ្នាំ និងអឿ ឡាត ភេទស្រី អាយុ៣៨ឆ្នាំ ពីបទជួញដូរមនុស្សឆ្លងដែន តាមមាត្រា១០ និងមាត្រា១៥ នៃច្បាប់ស្តីពីការបង្រ្កាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។ ក្រោយពេលចាប់ខ្លួនជនជាប់ចោទខាងលើធ្លាប់បានបញ្ជាក់ថា គេជួញដូរក្រលៀនមួយក្នុងតម្លៃប្រមាណ៤ម៉ឺនដុល្លារអាមេរិក។
លោកស្រីជូ ប៊ុនអេង អនុប្រធានគណៈកម្មាធិការជាតិប្រឆាំងនឹងការជួញដូរមនុស្សកម្ពុជា បានថ្លែងប្រាប់វិទ្យុបារាំងអន្តរជាតិនៅថ្ងៃទី២០ ខែតុលានេះថា ករណីនៃការជួញដូរសរីរាង្គនៅក្នុងប្រទេសកម្ពុជាបន្ទាប់ពីមានការចាប់ខ្លួនជនល្មើស កាលពីខែឧសភាកន្លងទៅ ហាក់មិនមានករណីថ្មីកើតឡើងបន្តទៀតទេ។
លោកស្រីបន្ថែមថាការជួញដូរក្រលៀននេះ មិនត្រឹមតែប៉ះពាល់ដល់ផ្នែកសន្តិសុខ និងសេដ្ឋកិច្ច ប៉ុណ្ណោះទេ តែថែមទាំងប៉ះពាល់ដល់សុខភាព ដែលអាចឈានដល់ការបាត់បង់អាយុជីវិតថែមទៀតផង។ លោកស្រីក៏បានអំពាវនាវឲ្យប្រជាពលរដ្ឋគិតគូរឲ្យបានច្បាស់លាស់ និងជៀសវាងឲ្យបានពី ការជួញដូរមនុស្ស ជួញដូរពលកម្ម ជួញដូរផ្លូវភេទ និងសរីរាង្គមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ