អ្នកប្រើហ្វេសប៊ុកម្នាក់ទៀតត្រូវបានចាប់ដាក់គុក ព្រោះបង្ហោះព័ត៌មានរឿងចាប់ក្មេងវះយកគ្រឿងក្នុង
អ្នកប្រើប្រាស់ហ្វេសប៊ុកម្នាក់ទៀតនៅក្នុងខេត្តតាកែវ ត្រូវបានតុលាការខេត្តនេះសម្រេចឃុំខ្លួនបណ្តោះអាសន្នហើយនៅក្នុងពន្ធនាគារកាលពីល្ងាចមិញនេះ បន្ទាប់ពីគាត់បានបង្ហោះព័ត៌មានថា មានការចាប់ក្មេងវះយកគ្រឿងក្នុងនៅក្នុងខេត្តតាកែវ។ នេះបើតាមបញ្ជាក់របស់តុលាការខេត្តតាកែវនៅព្រឹកនេះ។ ការចាប់ខ្លួនដាក់ពន្ធនាគារនេះ បានធ្វើឡើងប៉ុន្មានថ្ងៃប៉ុណ្ណោះក្រោយពីអ្នកប្រើប្រាស់ហ្វេសប៊ុកម្នាក់ក្នុងខេត្តកំពង់ធំត្រូវបានតុលាការចាប់ឃុំខ្លួនកាលពីថ្ងៃទី៣០ កក្កដាកន្លងទៅ។
ចុះផ្សាយនៅថ្ងៃ៖
ស្តាប់ - ០១:៥៨
អ្នកប្រើប្រាស់ហ្វេសប៊ុកថ្មីនេះ មានឈ្មោះថា លី ឆៃយ៉ា អាយុ៣០ឆ្នាំដែលជាម្ចាស់គណនីហ្វេសប៊ុកឈ្មោះថា«La chhaya»។ គាត់ត្រូវបានអាជ្ញាធរចាប់ខ្លួនកាលពីល្ងាចថ្ងៃចន្ទដើមសប្តាហ៍នេះ និងបានឃុំខ្លួនក្នុងពន្ធនាគារក្រោមបទចោទប្រកាន់ចំនួនពីរ គឺបទក្លែងព័ត៌មាន និងបទញុះញ៉ង់ឲ្យប្រព្រឹត្តបទឧក្រិដ្ឋជាអាទិ៍។ តាមក្រមព្រហ្មទណ្ឌកម្ពុជា បុរសម្នាក់នេះអាចប្រឈមនឹងការជាប់ពន្ធនាគារពី១ឆ្នាំ ទៅ២ឆ្នាំ និងពិន័យជាទឹកប្រាក់ពី ២លានរៀល ទៅ៤លានរៀលចំពោះបទល្មើសក្លែងព័ត៌មាន។ រីឯបទល្មើសញុះញ៉ង់ឲ្យប្រព្រឹត្តបទឧក្រិដ្ឋជាអាទិ៍ អាចប្រឈមនឹងជាប់ពន្ធនាគារពី៦ខែ ទៅ២ឆ្នាំ និងពិន័យជាប្រាក់ពី ១លានរៀល ទៅ៤លានរៀល។
ជាការកត់សម្គាល់ នេះ គឺជាករណីទីពីរហើយដែលជាប់គុកច្រវាក់ដោយសារបង្ហោះព័ត៌មានលើហ្វេសប៊ុករឿងចាប់ក្មេងនេះ។ ករណីទីមួយ គឺបានកើតឡើងនៅក្នុងខេត្តកំពង់ធំ ដោយអ្នកប្រើប្រាស់ហ្វេសប៊ុកម្នាក់ត្រូវបានតុលាការចាប់ដាក់ពន្ធនាគារ បន្ទាប់ពីគាត់បានបង្ហោះលើហ្វេសប៊ុកថា មានយួនចូលមកចាប់ក្មេងវះយកក្រលៀននិងភ្នែកបង្កចលាចលនៅក្នុងស្រុកបារាយណ៍ខេត្តកំពង់ធំ។
ចំពោះរឿងរ៉ាវទាំងនេះ អាជ្ញាធរកម្ពុជាបានអះអាងម្តងជាពីរដងរួចមកហើយថា មកដល់ពេលនេះ មិនមានករណីចាប់ក្មេងវះយកគ្រឿងក្នុងដូចការបំពុលតាមហ្វេសប៊ុកកើតមាននៅក្នុងប្រទេសកម្ពុជាឡើយ។ចំណែកក្រសួងយុត្តិធម៌កម្ពុជាវិញ បានព្រមានថា តំណាងអយ្យការទូទាំងប្រទេសកំពុងបន្តតាមដានយ៉ាងយកចិត្តទុកដាក់ ធ្វើការពិនិត្យស្រាវជ្រាវ និងអនុវត្តច្បាប់យ៉ាងម៉ឹងម៉ាត់ចំពោះជនទាំងឡាយណាដែលធ្វើការផ្សព្វផ្សាយព័ត៌មាននានាដែលបង្កឲ្យមានការភ័យខ្លាច និងចលាចលនៅក្នុងសង្គមពាក់ព័ន្ធនឹងករណីថាមានការចាប់ក្មេងវះយកគ្រឿងក្នុងនេះ។
ប្រឈមមុខនឹងការបង្ហោះព័ត៌មានដែលអាជ្ញាធរចាត់ទុកថាជាការបំពុលសង្គមនេះ លោកនាយករដ្ឋមន្រ្តីហ៊ុន សែន កាលពីថ្ងៃអង្គារ៍ក៏បានអំពាវនាវដល់អ្នកប្រើប្រាស់ហ្វេសប៊ុកទាំងអស់ឲ្យបញ្ឈប់បំពុលបរិយាកាសសង្គម ដោយសារតែការបង្ហោះព័ត៌មាននេះទៀត។ លោកចាត់ទុកថា នេះគឺជាទង្វើបង្កគ្រោះថ្នាក់ដល់ជាតិ ដែលគ្មានទទួលបានផលចំណេញអ្វីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ